Ngāueʻaki Totonu ʻa e Sioʻatá

Naʻe fakahoa ʻe he ākonga ko Sēmisí ʻa e Tohi Tapú ki ha sioʻata ʻokú ne fakaʻatā kitautolu ke tau sio ki hotau tangata ʻi lotó. (Sēm. 1:​22-25) ʻE lava fēfē ke tau ngāueʻaki totonu ʻa e Tohi Tapú ko ha sioʻata?

Lau fakalelei ia. Kapau ʻoku tau hila fakavave pē kiate kitautolu ʻi ha sioʻata, heʻikai nai ke tau fakatokangaʻi ha fehālaaki ʻe niʻihi ʻi hotau fōtungá. Ke vakai ki ha ngaahi tafaʻaki ʻi hotau tangata ʻi lotó ʻoku fiemaʻu ki ai ha tokanga, ʻoku lelei ke tau sio fakamamaʻu ki he Folofola ʻa e ʻOtuá ʻaki hono lau fakalelei ia.

Siofi pē ʻa koe tonu kae ʻikai ko e niʻihi kehé. ʻI hono puke fakatafaʻaki ha sioʻata ʻe fakahaaʻi mai nai ai ʻa e ngaahi mele ʻo ha taha kehe. ʻI he tuʻunga meimei tatau, ʻe lava ke tau ngāueʻaki ʻa e Tohi Tapú ke fakahaaʻi ʻa e ngaahi tōnounou ʻa ha taha kehe. Ka heʻikai tokoni moʻoni eni kiate kitautolu ke fakatonutonu ʻetau tōnounoú.

Hoko ʻo fakaʻatuʻi. Kapau te tau nōfoʻi pē ʻi heʻetau ngaahi tōnounou ʻa ia ʻoku fakahaaʻi mai ʻi ha sioʻata, te tau hoko nai ai ʻo loto-siʻi. ʻOku fiemaʻu ke tau hoko ʻo fakaʻatuʻi ʻi heʻetau lau ʻa e Folofola ʻa e ʻOtuá ʻaki ʻa e ʻikai ʻamanekina ʻa e meʻa lahi ange meiate kitautolu ʻi he meʻa ʻoku ʻamanekina mai ʻe Sihová.—Sēm. 3:17.