Ngāueʻaki ʻa e jw.org ʻi Hoʻo Ngāue Fakafaifekaú

Ko ʻetau Uepisaití ko e meʻangāue ʻaonga ia ke tokoniʻi kitautolu ke fakamafola ʻa e ongoongo leleí “ki he feituʻu taupotu taha ʻo e māmaní.” (Ngā. 1:8) Ko e kakai tokolahi ʻoku ʻikai ke nau ʻiloʻi ʻa e founga ke aʻu ai ki he jw.org. Kae kehe, ʻoku nau toki ʻilo pē ʻi hano fakahinohino ki ai ʻe ha tokotaha malanga.

Ko ha ʻovasia fefonongaʻaki naʻá ne hiki ʻa e vitiō Ko e Hā ke Ako Ai ʻa e Tohi Tapu? ki heʻene telefoní pea fakaʻaliʻali ia ʻi he faingamālie kotoa pē ʻokú ne maʻú. Ko e fakatātaá, ʻi he taimi ʻokú ne ʻalu ai mei he fale ki he falé, ʻokú ne pehē: “ʻOku ou fai ha ʻaʻahi nounou ke tokoniʻi ʻa e kakaí ke nau ʻilo ʻa e ngaahi tali ki he fehuʻi mahuʻinga ko eni ʻe tolu: Ko e hā ʻoku hulu fau ai ʻa e ngaahi palopalema ʻi he māmaní? ʻE anga-fēfē ke fakaleleiʻi ia ʻe he ʻOtuá? Pea ʻe lava fēfē ke tau fekuki mo ia ʻi he taimí ni? ʻOku tali ʻe he foʻi vitiō nounou ko ení ʻa e ngaahi fehuʻi ko iá.” ʻOkú ne lomiʻi leva ke kamata pea sio ki he anga ʻo e fakafeangai ʻa e tokotaha-ʻapí. ʻOku fuʻu manakoa ʻa e foʻi vitioó, ʻa ia ko e tokolahi taha ʻo e kakaí naʻe ʻikai lava ke nau toe hanga kehe mei ai kae ʻoleva ke ʻosi. ʻOku tala ange leva ʻe he ʻovasia fefonongaʻakí: “Naʻá ke toki fanongo ʻoku lava ke ke kole ki ha ako Tohi Tapu ʻi he ʻinitanetí. Ka ko eni, ʻe lava ke u fakahāhā nounou atu kia koe ʻa e foungá ʻi he taimí ni.” Kapau ʻoku loto ki ai ʻa e tokotaha-ʻapí naʻá ne fakahāhaaʻi ʻa e akó ʻo ngāueʻaki ʻa e polosiua Ongoongo Lelei. Kapau ʻoku ʻikai faingamālie ʻa e tokotaha-ʻapí, ʻokú ne fai ha fokotuʻutuʻu ke fakahoko ia ʻi he ʻaʻahi hokó. ʻI he taimi ʻokú ne ʻalu ai ki ha fale kofi ke mālōlō aí, ʻokú ne pehē ʻokú ne fai ʻa e meʻa tatau ki ha tokotaha pē ʻoku tangutu ofi atu ki ai ʻi he hili hono fai ha kiʻi fetalanoaʻaki anga-fakakaumeʻa. ʻOkú ke ngāueʻaki ʻa e jw.org ʻi hoʻo ngāue fakafaifekaú?