Ngāueʻaki ʻEtau Uepisaití ʻi he Ngāue Fakafaifekaú​—“Bible Questions Answered”

ʻI he jw.org, ʻoku ʻi ai e konga ko e “Bible Teachings” pea ʻoku ʻi loto ai ʻa e konga ko e “Bible Questions Answered.” Kapau ʻoku tau alāanga mo e ngaahi fehuʻi ko ení, ʻe lava ke tau tataki ʻa e fehuʻi ʻa e tokotaha-ʻapí ki he ngaahi tali Fakatohitapu ʻi heʻetau Uepisaití. ʻE lava foki ke ngāueʻaki ʻa e ngaahi fehuʻi ko ení ke kamata ha ngaahi fetalanoaʻaki ʻi he ngāue fakafaifekaú. ʻOku lava ke tau fili ha fehuʻi ʻa ia ʻe mahuʻingaʻia ai ʻa e kakai ʻi hotau feituʻu ngāué, ʻeke ki he tokotaha-ʻapí ko e hā ʻene fakakaukaú, pea tala ange leva kiate ia ʻa e meʻa ʻoku leaʻaki ʻe he Tohi Tapú, ʻo ngāueʻaki ʻa e fakaʻuhinga mei he jw.org. Hili iá, ʻe lava ke tau fakamatalaʻi pe fakahaaʻi kiate ia ʻa e feituʻu naʻa tau maʻu mei ai ʻetau fakamatalá. Ko ha toe fokotuʻu ʻe taha ko hono ʻai ia ke ne lau hangatonu ʻa e talí mei he Uepisaití. Ko ha uaifi ʻo ha ʻovasia fefonongaʻaki naʻá ne hoko ʻo lavameʻa lelei ʻaki ʻene pehē: “ʻOku fifili ʻa e kakai tokolahi, ‘ʻOku totonu ke tukuakiʻi ʻa e ʻOtuá ki he ngaahi faingataʻa ʻoku tau tofanga aí?’ Te ke saiʻia ke ʻiloʻi ʻa e talí ʻi ha sekoni pē ʻe 51?” Naʻá ne lomiʻi leva ʻene telefoni toʻotoʻó ʻa ia kuó ne ʻosi hiki ki ai ʻa e foʻi vitiō ʻoku ʻi ai e talí. Naʻá ne fakaʻosiʻaki ʻene fakahaaʻi ki he tokotaha-ʻapí ʻa e vahe 11 ʻo e tohi Akoʻi ʻe he Tohi Tapú.