Ngāueʻaongaʻaki Ho Faingamālié ke Talaki ʻa e Pōpoaki ʻo e Puleʻangá!

1. Ko e hā ʻa e lēsoni ʻe lava ke tau ako mei he faʻifaʻitakiʻanga ʻa Tēvitá?

¹ Ko Tuʻi Tēvita ko ha tokotaha ia naʻe ʻikai te ne fakaʻatā hono ngaahi tuʻungá ke fakavaivaiʻi ia. Ko e fakatātaá, naʻe loto ʻa Tēvita ke langa ha fale moʻo Sihova. ʻI he taimi naʻe taʻofi ai ʻa Tēvita mei hono fakahoko iá, naʻá ne feʻunuʻaki ʻene ngaahi taumuʻá pea tokoni kia Solomone ʻi hono teuteu ʻa e ngaahi meʻa ke langa ʻaki ʻa e temipalé. (1 Tuʻi 8:17-19; 1 Kal. 29:3-9) ʻI he ʻikai nōfoʻi ʻa Tēvita ʻi he meʻa naʻe ʻikai lava ke ne faí, naʻá ne tokangataha ki he meʻa naʻe lava ke ne faí. ʻE lava fēfē ke tau faʻifaʻitaki ki he faʻifaʻitakiʻanga ʻa Tēvitá ʻi heʻetau kumi ki he ngaahi founga ke talaki ai ʻa e pōpoaki ʻo e Puleʻangá?

2. ʻE lava fēfē ke tau sivisiviʻi fakafoʻituitui kitautolu?

² Fai ʻa e Meʻa Te Ke Malavá: Kuo fakafaingofuaʻi ʻe he tokolahi ʻenau moʻuí ke nau lava ʻo hoko ai ko e kau tāimuʻa tokoni pe tāimuʻa tuʻumaʻu. (Māt. 6:22) Te ke kau fakataha mo kinautolu? ʻI hono sivisiviʻi fakataha mo e faʻa lotu fekauʻaki mo ho ngaahi tuʻungá, te ke ʻiloʻi nai ai ʻoku fakaava mai kiate koe “ha matapā lahi ʻoku huʻu atu ki he ngāué.” Kapau ko ia, ngāueʻaongaʻaki ʻa e faingamālie ko iá!—1 Kol. 16:8, 9.

3. Ko e hā ʻa e ngaahi faingamālie ʻe lava ke tau ngāueʻaongaʻaki ke faifakamoʻoni ai neongo kapau ʻoku ʻikai fakaʻatā ʻe hotau tuʻungá ke tāimuʻa?

³ Fēfē leva, kapau ʻoku hoko ho ngaahi tuʻungá ke ne taʻofi ai koe mei he ngāue tāimuʻá? ʻOua ʻe tukunoaʻi ʻa e ngaahi faingamālie kehe ʻoku fakaʻatā atu kia koé. Ko e fakatātaá, kapau ʻoku hoko hoʻo ngāue fakamāmaní ke ke fetuʻutaki ai mo e kau taʻetuí, ko e hā ʻoku ʻikai te ke ngāueʻaongaʻaki ai ʻa e faingamālie ko iá ke faifakamoʻoni kia kinautolú? Pe kapau ʻokú ke fehangahangai mo ha palopalema fakaemoʻuilelei, ʻe lava ke ke ngāueʻaongaʻaki ʻa e ngaahi faingamālie ko iá ke faifakamoʻoni ki he kau ngāue tokangaʻi ʻo e moʻui leleí? Manatuʻi ʻoku fakaʻatā mai maʻá e faʻahinga ko ia ʻoku ʻi ai ha fuʻu fakangatangata ʻi heʻenau ngāué, ke nau līpooti ʻa e taimi ʻo ʻenau ngāue fakamalangá ki he miniti ʻe 15 koeʻuhí ko e taʻumotuʻá pe mātuʻaki mahamahaki ʻaupito. ʻI he taimi ʻoku fakafonu ai hoʻo līpooti ngāue fakafaifekau ki he māhiná, fakapapauʻi ke fakakau ai ʻa e taimi naʻá ke fakamoleki he faifakamoʻoni ʻi he founga ʻikai anga-mahení pea pehē ki ha tohi pē naʻe tuku, ʻo kau ai ʻa e ngaahi tulekí mo e ngaahi tohi fakaafe ki he Fakamanatú mo e fakataha-lahí. Te ke ʻohovale nai ʻi he lahi ʻo e taimi kuó ke maʻu ʻi hono fakatahaʻi ʻa e ngaahi faingamālie ne hā ngali iiki ko iá!

4. Ko e hā hoʻo fakapapaú?

⁴ Neongo ai pē pe ko e hā hotau tuʻunga fakafoʻituituí, ʻofa ke tau ngāueʻaongaʻaki ʻa e faingamālie kotoa pē ke talaki ai ʻa e ongoongo leleí. Te tau hokosia ai ʻa e fiemālie ʻi hono ʻiloʻi ʻoku tau fai ʻa e kotoa ʻo ʻetau malavá koeʻuhi ko e Puleʻangá.—Mk. 14:8; Luke 21:2-4.