ʻE Lava Ke Ke Hū “ʻi ha Matapā Lahi ʻOku Taki Atu ki he Ngāué”?
1. Ko e hā ʻa e “matapā lahi ʻoku taki atu ki he ngāué” ʻoku fakaava mai kia kitautolú?
1 ʻI he taimi naʻe fakaava ai ki he ʻapositolo ko Paulá “ha matapā lahi ʻoku taki atu ki he ngāué,” naʻá ne vēkeveke ke ngāueʻaongaʻaki ʻa e faingamālié ke pouaki ʻa e ngaahi meʻa ʻo e Puleʻangá neongo ʻa e tokolahi ʻo e kau fakafepakí. (1 Kol. 16:9, NW) ʻI he ʻahó ni ko e kau malanga ʻo e Puleʻangá ʻe toko 642,000 nai takatakai ʻi he māmaní kuo nau hū atu ʻi ha matapā lahi ʻo e ngāué ʻaki ʻenau hoko ko e kau tāimuʻa tuʻumaʻu.
2. Ko e hā ʻoku lelei ai ke fakafuofuaʻi hotau tuʻungá ʻi he taimi ki he taimi?
2 ʻOku Liliu ʻa e Ngaahi Tuʻungá: Neongo ko e ngaahi tuʻunga fakafoʻituitui lolotongá ʻoku fakangatangata nai ai ʻetau ngāué, ʻoku liliu ʻa e ngaahi tuʻungá. Ko ia ai, ʻoku lelei kia kitautolu ke tau fakafuofuaʻi hotau tuʻungá tonu ʻi he taimi ki he taimi pea ʻoua ʻe tatali ki he ngaahi tuʻunga lelei tahá. (Koh. 11:4) Ko ha toʻutupu koe ʻoku vavé ni ke ke ʻosi mei he ako māʻolungá? Ko ha mātuʻa tauhi fānau koe ʻoku vavé ni ke hū hoʻo fānaú ki he akó? ʻOkú ke mei mālōlō mei hoʻo ngāue fakamāmaní? Ko e ngaahi liliu peheé ʻoku fakaʻatā atu nai ai ha taimi lahi ange kiate koe ke ke hū ki he ngāue tāimuʻa tuʻumaʻú. Ko ha tuofefine naʻá ne hokosia ki muʻa ha faingataʻaʻia fakaesino naʻá ne fakapapauʻi ke hoko ko ha tāimuʻa ʻi hono taʻu 89. Ko e hā hono ʻuhingá? Koeʻuhi kuo ʻikai te ne toe tokoto ʻi he falemahakí ʻo laka hake ʻi he taʻu ʻe tahá, naʻá ne ongoʻi ai ko ʻene moʻui leleí ʻe fakaʻatā ai ia ke ne tāimuʻa.
3. Kuo anga-fēfē hono fai ʻe he niʻihi ʻa e ngaahi feʻunuʻaki kae lava ke tāimuʻa tuʻumaʻú?
3 ʻI he tuʻunga ʻo Paulá, naʻá ne ʻuluaki fakataumuʻá ke ʻaʻahi ki hono fanga tokoua ʻi Kolinitoó. Ka, naʻá ne liliu ʻene ngaahi fokotuʻutuʻú koeʻuhi ko e ongoongo leleí. Ko e tokolahi ʻoku nau ngāue tāimuʻa tuʻumaʻu ʻi he ʻaho ní kuo nau fai ha feʻunuʻaki koeʻuhi ka nau tāimuʻa. Kuo fakafaingofuaʻi ʻe he niʻihi ʻenau moʻuí ʻo aʻu ki ha tuʻunga ʻa ia ko e meʻa pē ʻoku fiemaʻú ke nau ngāue konga-taimi ke totongiʻaki ʻenau fanga kiʻi fakamolé. Kuo nau maʻu e fiefia ʻi honau monū ko e ngāue tāimuʻá. (1 Tim. 6:6-8) Kuo fai ʻe he ngaahi hoa mali ʻe niʻihi ʻa e ngaahi feʻunuʻaki ʻi heʻenau moʻuí ʻo ngāue ai pē ʻa e husepānití, kae ʻatā ʻa e uaifí ke tāimuʻa.
4. Ko e hā ʻe lava ke tau fai kapau ʻoku ʻikai ke tau fakapapauʻi te tau aʻusia ʻa e houa ʻoku fiemaʻú?
4 ʻOua ʻe fakavave ke tukunoaʻi ʻa e fakakaukau ke ngāue tāimuʻá koeʻuhi ko e manavahē naʻa ʻikai ke ke aʻusia ʻa e houa ʻoku fiemaʻú. Ko ha kiʻi laka siʻi hake pē ʻi he houa ʻe ua ʻi he ʻaho ʻoku fiemaʻú. Kapau ʻoku ʻikai te ke fakapapauʻi ʻe lava ke ke fai ia, ʻahiʻahiʻi ʻa e ngāue tāimuʻa tokoní ʻi ha māhina ʻe taha pe ua kae ʻai hoʻo taumuʻa fakafoʻituituí ko e houa ʻe 70. ʻE lava ai heni ke ke ʻiloʻi ʻa e fiefia ʻoku maʻu ʻi he ngāue tāimuʻá. (Sāme 34:8) Talanoa ki he faʻahinga ʻoku nau lolotonga ngāue tāimuʻá. Kuo nau ikuʻi nai ʻa e ngaahi pole meimei tatau mo koe. (Pal. 15:22) Kole kia Sihova ke tāpuakiʻi hoʻo ngaahi feinga ke fakalahi hoʻo ngāue fakafaifekaú.—1 Sione 5:14.
5. Ko e hā ko ha ngāue ʻaonga ai ʻa e ngāue tāimuʻa tuʻumaʻú?
5 Ko ha Ngāue ʻAonga: Ko e ngāue ko ha tāimuʻa tuʻumaʻú ʻoku ʻomai ai ʻa e ngaahi tāpuaki lahi. ʻOku fakaʻatā ai koe ke ke hokosia ʻa e fiefia lahi ange ʻoku maʻu mei he lahi ʻo e foakí. (Ng. 20:35) Ko e ngāue tāimuʻá ʻoku fakaleleiʻi ai hoʻo malava ke tofa totonu ʻa e Folofola moʻoni ʻa e ʻOtuá. (2 Tim. 2:15) Te ke maʻu ai ʻa e faingamālie lahi ange ke sio ki hono poupouʻi koe ʻe Sihová. (Ng. 11:21; Fili. 4:11-13) ʻE toe tokoniʻi koe ʻe he ngāue tāimuʻá ke fakatupulekina ʻa e ngaahi ʻulungāanga fakalaumālie, hangē ko e kātakí pea fakamafeia ai koe ke ʻunuʻunu ofi ange kia Sihova. (Sem. 4:8) ʻE lava ke ke hū atu ʻi he matapā lahi ʻo e ngāué pea hoko ko ha tāimuʻa tuʻumaʻu?