Fakamatalaʻi ʻEtau Tui Fekauʻaki mo e 1914

ʻI he Folofolá ʻoku fakalototoʻaʻi ai kitautolu ke tau “mateuteu . . . ke fai ha taukapo” ki heʻetau ngaahi tuí, kae “fai ia ʻaki ha loto anga-malū mo e fakaʻapaʻapa loloto.” (1 Pita 3:15) Ko hono moʻoní, ʻoku hoko nai eni ko e pole ke fakamatalaʻi ʻa e ngaahi moʻoni loloto ʻi he Tohi Tapú, ʻo hangē ko e founga ʻoku tau ʻiloʻi ai naʻe kamata pule ʻa e Puleʻangá ʻi he 1914. Kuo teuteuʻi mai ʻa e kupu ke tokoniʻi kitautolu ʻa ia ʻoku fakakaveinga “Ko ha Fetalanoaʻaki mo ha Kaungāʻapi—Ko Fē ʻa e Taimi Naʻe Kamata ke Pule Ai ʻa e Puleʻanga ʻo e ʻOtuá?” ʻOku hā ʻa e kupu ko ení ʻi he ʻīsiu Ko e Taua Leʻo ʻa ia te tau tuʻuaki atu ʻi heʻetau ngāue fakafaifekaú ʻi Nōvema mo Tīsema. ʻI hoʻo sivisiviʻi ʻa e kupú, fakakaukau ki he ngaahi fehuʻi hoko maí, ʻoku fekauʻaki ia mo e fakamatala naʻe fai ʻe Kamaloni, ko e tokotaha malanga ʻi he talanoá.

Naʻe anga-fēfē ʻene . . . 

• ngāueʻaki ʻa e fakaongoongoleleí ke fokotuʻu ha makatuʻunga ke loto-tatau ai?—Ngā. 17:22.

• fakahāhā ʻa e anga-fakatōkilaló ʻi he taimi naʻá ne fakamatalaʻi ai ʻene tuí?—Ngā. 14:15.

Ko e hā naʻe lelei ai ʻene . . .

• tuku ha kiʻi taimi ke fakanounouʻi ai ʻa e fakamatalá ki muʻa ke toe tānaki atu ha ngaahi poini?

• kiʻi longo ʻi he taimi ki he taimi pea ʻeke ki he tokotaha ʻapí pe ʻokú ne mahinoʻi ʻa e meʻa kuó ne fakamatala ki aí?

• ʻikai ke feinga ke kāpui ha fuʻu fakamatala lahi ʻi ha fetalanoaʻaki pē ʻe taha?—Sione 16:12.

He houngaʻia ē ko kitautolu ʻia Sihova, ko hotau “Faiako Maʻongoʻongá,” ʻi hono akoʻi kia kitautolu ʻa e founga ke fakamatalaʻi ai ʻa e ngaahi moʻoni loloto ʻi he Tohi Tapú ki he faʻahinga ko ia ʻoku fiekaia ki aí!—ʻAi. 30:20, NW.