Ko ha Tokoni Hokohoko ki Heʻetau Ngāue Fakafaifekaú
1. Ko e hā ʻa e taumuʻa mahuʻinga ʻe ua ʻo e konga hokohoko “Ko ha Fetalanoaʻaki mo ha Kaungāʻapi”?
1 ʻI he taimi ki he taimi, ko e pulusinga maʻá e kakaí Ko e Taua Leʻo ʻoku fakaʻaliʻali ai ʻa e konga hokohoko “Ko ha Fetalanoaʻaki mo ha Kaungāʻapi.” Ko e konga hokohoko ko ení ʻoku ʻi ai ʻa e taumuʻa mahuʻinga ʻe ua—ko hono ʻoatu ʻa e ngaahi akonaki ʻa e Tohi Tapú ʻi ha founga fakamānako mo fakahaaʻi mai kia kitautolu ʻa e founga ke tau fai ai ha fakaʻuhinga fakapotopoto ʻi ha ngaahi kaveinga pau. (1 Pita 3:15) ʻE lava fēfē ke tau ngāueleleiʻaki ʻa e ngaahi kupu ko ení?
2. ʻE lava fēfē ke tau ngāueʻaki ʻa e kupu hokohoko ko ení ʻi heʻetau ngāue fakafaifekaú?
2 Ngāueʻaki Ia ʻi he Ngāue Fakafaifekaú: ʻE malava ke ke tauhi nai ha ngaahi tatau ʻo e ʻīsiu ʻo e Taua Leʻo ʻoku kau ai ʻa e kupu ʻo e konga hokohoko ko eni. ʻI he taimi ʻoku ʻeke ai ha fehuʻi ʻe ha tokotaha-ʻapi, tokotaha mahuʻingaʻia pe ko ha ako Tohi Tapu pe langaʻi ha fakafepaki ʻa ia ʻoku hā ʻi ha taha ʻo e ngaahi kupu ko ení, ʻoange kiate ia ha tatau ʻo e kupu ko iá pea fokotuʻu ke lāulea ki ai. Kapau ʻoku ʻikai te ke maʻu ʻa e tatau ʻo e makasiní ʻoku fakaʻaliʻali ai ʻa e kupu ko iá, mahalo ʻe lava ke ke hiki ia mei he jw.org.
3. ʻE anga-fēfē nai ʻetau lāulea ki he taha ʻo e ngaahi kupú mo ha tokotaha-ʻapi?
3 ʻE anga-fēfē nai ke ke lāulea ki he taha ʻo e ngaahi kupu ko ení mo ha taha? ʻOku fakaafeʻi ʻe ha niʻihi ʻa e tokotahá ke ne lau leʻo lahi ʻa e ngaahi lea ʻa e kaungāʻapí, ka ne lau ʻe ia ʻa e ngaahi lea ʻo e tokotaha Fakamoʻoní. Ko e lāulea ki he fetalanoaʻaki ʻoku pulusi ko ení ʻoku lava ke ola lelei koeʻuhí ʻoku malava ai ʻa e tokotaha ko iá ke sivisiviʻi ʻetau ngaahi tuí ʻi ha founga ʻoku ʻikai ke ne ongoʻi hohaʻa ai.—Teu. 32:2.
4. ʻE lava fēfē ke tau ngāueʻaki ʻa e ngaahi kupu mei he konga hokohoko ko ení ke akoʻi kitautolú?
4 Akoʻi Koe mo e Niʻihi Kehé: ʻI hoʻo lau hifo ʻa e ngaahi kupu ko ení, fakatokangaʻi ʻa e ngaahi konga Tohi Tapú, ngaahi talanoa fakatātaá, pea mo e hokohoko ʻo e ngaahi fakaʻuhingá. Fakatokangaʻi ʻa e anga ʻe ʻoatu ai ʻa e pōpoakí. Pea feinga leva ke fai ʻa e fakalea meimei tatau ʻi hoʻo ngāue fakafaifekaú. (Pal. 1:5; 9:9) Naʻe fakatokangaʻi ʻe ha tuofefine, “Ko hono lau ʻa e ngaahi kupu ko ení ʻoku hangē ia ko ha ako mei ha hoa tāimuʻa pōtoʻi—ko ha taha ʻokú ne ʻilo maʻu pē ʻa e meʻa totonu ke leaʻakí!”
5. ʻE lava fēfē ke tau tokoniʻi ʻetau kau ako Tohi Tapú ke mateuteu ki he ngāue fakafaifekaú?
5 ʻE lava ke ke toe ngāueʻaki ʻa e ngaahi konga hokohoko ko iá ke tokoniʻi hoʻo tokotaha ako Tohi Tapú ke mateuteu ki he ngāue fakafaifekaú. Lau fakataha ʻa e fakamatalá, ʻai ʻa e tokotaha akó ke ne lau ʻa e lea ʻa e tokotaha malangá. ʻI he founga ko ení, ʻe lava ai ʻa e kau ako Tohi Tapú ke nau fakahāhā ʻenau tuí ʻi ha founga fakapotopoto. (Kol. 4:6) Ko e moʻoni, ko e ngaahi kupu ko ení ko e taha ia ʻo e ngaahi founga ʻa Sihova ke tokoniʻi kitautolu ke “fakahoko kakato” ʻetau ngāue fakafaifekaú.—2 Tīm. 4:5.