Ko ha Ngaahi Kupu Hokohoko Foʻou ki Hono Kamata ha Ngaahi Ako Tohi Tapu
1. Ko e hā e ngaahi kupu hokohoko foʻou ʻe ʻasi ʻi he pulusinga Taua Leʻo maʻá e kakaí, pea kuo anga-fēfē hono fakataumuʻá?
1 Kamata ʻi he māhina kahaʻú, ʻe ʻasi atu ha ngaahi kupu hokohoko foʻou ʻi he pulusinga ʻo e The Watchtower maʻá e kakaí ke tokoniʻi kitautolu ke kamata ha ngaahi ako Tohi Tapu. ʻOku fakakaveinga ko e “Ako mei he Folofola ʻa e ʻOtuá.” Lolotonga ko e niʻihi ʻi he feituʻu ngāué ʻoku ʻikai ha toe tālaʻa te nau fiefia ʻi hono lau ʻa e ngaahi kupu hokohoko taki taha, ko e ngaahi kupú kuo fakataumuʻa ia ke fai ai ha fetalanoaʻaki.
2. Ko e hā ʻa e ngaahi tafaʻaki ʻe niʻihi ʻo e ngaahi kupú ni?
2 Ko Hono Ngaahi Tafaʻakí: Ko e kaveingá pea mo e ngaahi kaveinga tokoní kuo hiki ia ko e ngaahi fehuʻi ke ʻeke ki he tokotaha ʻapí lolotonga ʻa e fetalanoaʻakí. Ko e ngaahi konga-tohi tefitó ʻoku fakahaaʻi pē, kae ʻikai fakalea, koeʻuhí ke lava ai ʻa e tokotaha-ʻapí ʻo fiefia ʻi heʻene ako fakahangatonu mei he ngaahi peesi ʻo e Folofola ʻa e ʻOtuá. Ko e ngaahi palakalafí ʻoku nounou kae lava ke lāulea ki ai ʻi he matapaá tonu. Ko e kupu taki taha ʻoku lave ki he tohi Akoʻi ʻe he Tohi Tapú ke tokoniʻi koe ke ʻave ʻa e akó ki he tohi ko iá ʻi heʻene feʻungamālié pē.
3. ʻI he taimi ʻoku ʻalu ai mei he fale ki he falé, ʻe anga-fēfē haʻatau ngāueʻaki ʻa e ngaahi kupu hokohoko ko ení ke kamata ha ako Tohi Tapu ʻi he matapaá?
3 Anga Hono Ngāueʻaki Iá: ʻI he taimi ʻokú ke tuʻuaki ai e ngaahi makasiní ʻe lava ke ke ʻeke ha fehuʻi langaʻi e mahuʻingaʻiá ʻi he kaveinga tefito ʻo e kupú. Ko e fakatātā, ʻi he ʻīsiu ʻo Sanuali 1 ʻoku lāulea ai ki he mahuʻinga ʻo e Tohi Tapú. ʻE lava ke ke ʻeke: “ʻOkú ke vakai ki he Tohi Tapú ko e Folofola ʻa e ʻOtuá pe ko ha tohi lelei pe ia? [Tuku ke ne tali.] ʻOkú ou maʻu ha meʻa mahuʻingamālie ʻi he kaveingá ni.” Tuhu ki he ʻuluaki fehuʻí, lau ʻa e ʻuluaki palakalafí, pea kumi ʻa e konga tohi ʻoku fakahāʻí. Toe lau ʻa e fehuʻí, pea kole ki he tokotaha ʻapí ki haʻane ngaahi tali. Lāulea ki he lahi taha ʻo e fakamatala ʻoku feʻungamālié, ʻo ngāueʻaki ʻa e ngaahi fehuʻi kuo fakafiká ko ha ngaahi poini ia ki he fetalanoaʻakí. Ki muʻa ke mavahé, fakahanga e tokangá ki he fehuʻi hoko kuo fakafiká pea fai ha ngaahi fokotuʻutuʻu pau ke toe foki pea fetalanoaʻaki ai. Toe foki ʻo lāulea lahi ange ki he kupú ʻi he uike taki taha kae ʻoua kuo lava ke ke toe ʻomai e ʻīsiu hokó. Ko e toe fili ʻe tahá ko hono ngāueʻaki ʻa e fakalea fakahangatonu pea tuʻuaki pē ha ako Tohi Tapu ki he tokotaha-ʻapí. Ngāueʻaki leva ʻa e kupu ʻo e makasiní ke fakahāhaaʻi ʻa e akó.
4. ʻE anga-fēfē nai haʻatau ngāueʻaki ʻa e ngaahi kupu ko ení ʻi he taimi ʻoku fai ai e ngaahi toe ʻaʻahí?
4 Te ke toe lava foki ke ngāueʻaki ola lelei ʻa e ngaahi kupu hokohoko foʻou ko ení ʻi hoʻo ngaahi tukuʻanga makasiní mo e ngaahi toe ʻaʻahi kehé. ʻE lava pē ke ke pehē: “ʻOku ʻi ai ha tafaʻaki foʻou ʻi he Taua Leʻó. Tuku ke u fakaʻaliʻali atu kia koe ʻa e anga hono ngāueʻakí.” Ko ʻemau lotú ia ke fakamafeia ʻe he ngaahi kupu hokohoko foʻou ko ení ha tokolahi ange ke “nau aʻusia ʻa e ʻilo kanokano ki he moʻoni.”—1 Tim. 2:4.