ʻOkú Ke Ngāueʻaki Kakato Ia?
1 “ʻOku ʻikai te u kei faʻa tatali ke ngāueʻaki ia ʻi he malaʻe malangá!” Ko e meʻa ia ne tohi ʻe ha tuofefine ʻe taha hili ʻene lau ʻa e Taua Leʻo ʻo Sanuali-Maʻasi 2008. Kuó ke vakai ki he niʻihi ʻo e ngaahi konga ʻoku ʻasi maʻu pē ʻi he pulusinga maʻá e kakaí, pea kuó ke maʻu ha ngaahi founga ke ngāueleleiʻaki ai ia ʻi hoʻo ngāue fakafaifekaú?
2 “Meʻa ʻOku Tau Ako Meia Sīsuú”: Mahalo pē ʻokú ke ʻiloʻi ʻoku ʻaonga lahi ʻa e tafaʻaki ko ení ʻi hono kamata ʻo e ngaahi ako Tohi Tapú. Kapau kuo teʻeki ke ke fai ia, ʻahiʻahi lau ʻa e kaveinga ʻo e kupú ki he tokotaha-ʻapí pea fakahanga leva ʻene tokangá ki he meʻa naʻe leaʻaki ʻe Sīsū fekauʻaki mo e meʻa ko iá, ʻo hangē ko ia naʻe fakahaaʻi ʻi he ʻuluaki palakalafí. ʻI hono fakahā ʻa e fuofua mahuʻingaʻiá, feinga ke hokohoko atu ʻa e fetalanoaʻakí ʻaki hono ngāueʻaki ʻa e ngaahi kaveinga tokoní, ʻa ia ʻoku fokotuʻutuʻu ko e ngaahi fehuʻi fakatupunga-fakakaukau. Fakaafeʻi ʻa e tokotahá ke ne fakamatala ki he fehuʻí. Fakamatalaʻi nounou ha ngaahi fakatātā pē ʻoku felāveʻi mo ia, pea hiki leva ki he palakalafi hokó. Te ke malava nai ke ʻosiki ʻa e ʻuluaki konga ʻo e kupú ʻi he ʻuluaki ʻaʻahí pea toki fetalanoaʻaki leva ki he konga hono uá ʻi hoʻo foki atú. Mateuteu ke hokohoko atu ʻa e akó ʻi he tohi Akoʻi ʻe he Tohi Tapú.
3 “Kī ki he Fiefia ʻa e Fāmilí”: Ko e kupu hokohoko ko ení, ʻoku fakataumuʻa ia ke tokoniʻi ʻa e ngaahi husepānití, uaifí, mo e ngaahi mātuʻá ke nau sio ki he founga ke ngāueʻaki ai ʻa e ngaahi tefitoʻi moʻoni Fakatohitapú ʻi he fekuki mo e ngaahi palopalema ʻoku fakamanamanaʻi ai ʻa e melino ʻi he fāmilí. ʻE lava ke ke toe ngāueʻaki ʻa e ngaahi kupu ko ení ke tokoniʻi ʻa e faʻahinga ʻikai ko e Kau Fakamoʻoní ke nau sio ki he poto ʻoku maʻu ʻi he Tohi Tapú.—2 Tim. 3:16, 17.
4 Kupu Makehe Maʻá e Fānaú: Ko e kupu hokohoko “Maʻá e Toʻutupú” ʻoku ʻomai ai ha meʻa ke fai ʻa ia ʻe lava ʻo ngāueʻaki ke fakatotoloʻi ha talanoa Fakatohitapu pau. ʻE lava ke ke ngāueʻaki ʻa e ngaahi kupu ko ení ke tokoniʻi ʻa e toʻutupu ʻokú ke fetaulaki mo ia ʻi hoʻo ngāue fakafaifekaú ke nau sio ki he mahuʻinga ʻo hono ako ʻo e Folofola ʻa e ʻOtuá. (Sāme 119:9, 105) ʻI he talanoa mo e ngaahi mātuʻá, te ke fakamamafaʻi nai ʻa e kupu hokohoko ko e “Akoʻi Hoʻo Fānaú.” Ko e ngaahi kupú ni ʻe lava ke tokoniʻi ai ʻa e fānau iiki angé ke nau ako ʻa e ngaahi lēsoni mahuʻinga mei he faʻahinga ʻi he Tohi Tapú. Kuó ke maʻu ha faingamālie ke lautohi mo hoʻo fānaú ʻi he ngaahi kupu ko ení?
5 Ngaahi Kupu Kehe: Ko e kupu “ʻEke ʻe he Kau Lautohí” ʻoku lāulea ai ki ha foʻi fehuʻi ʻoku ngalingali ʻe ʻohake ʻe he faʻahinga ʻikai ko e Kau Fakamoʻoní. Te ke fakamamafaʻi nai ʻa e kupu ko ení ʻi hono tuʻuaki ʻa e ngaahi makasiní ʻi he fale ki he fale. Ko e kupu “Ko ha Tohi Mei . . .” ko ha fakamatala hangatonu mo mahino ia ʻoku fakahaaʻi ai ʻa e ngaahi pole ʻoku fehangahangai mo e kau misinalé pea mo e niʻihi kehe ʻi hono fakahoko ʻenau ngāue fakafaifekaú. Ko e ngaahi kupú ni ʻe lava ke tokoniʻi ai ʻa e faʻahinga mahuʻingaʻiá ke nau sio ki hono malangaʻi ʻi māmani lahi ʻa e ongoongo leleí, ko hono fakahoko ia ʻa e fakaʻilonga ʻo e ʻi ai ʻa Kalaisí.—Mt. 24:3, 14.
6 Ko e kupu “ʻUnuʻunu Ofi ki he ʻOtuá,” ʻa ia ʻoku makatuʻunga ʻi he lau Tohi Tapu ki he Ako Fakafaifekau Fakateokalatí, ʻe ueʻi nai ai ʻa e faʻahinga loto-totonú ke nau loto ke ako lahi ange ai fekauʻaki mo Sihova. Ko e kupu hokohoko ko e “Faʻifaʻitaki ki Heʻenau Tuí,” ʻoku faʻufaʻu ia ke tokoniʻi ʻa e kakaí ke nau sioloto atu ki he ngaahi talanoa Fakatohitapú, ʻai ʻa e faʻahinga ʻi he Tohi Tapú—ʻa honau leʻó, ko ʻenau ngaahi polé, ko ʻenau tuí—ke moʻui ki he kau lautohi he ʻaho ní.
7 He fiefia ē ko kitautolu ke maʻu fakakuata ha ʻīsiu kakato ʻo e Taua Leʻo ʻa ia ʻoku faʻufaʻu ke ngāueʻaki ʻi he malaʻe malangá! Ko ia ai, ʻai ke tau hoko ʻo maheni lelei mo e meʻa ʻi lotó pea ngāueʻaki kakato ia ʻi heʻetau ngāue fakafaifekaú.