Ki he Kau Lautohí

ʻOKU mau fiefia ke fakahaaʻi atu ʻi he kamata ʻa e ʻīsiu ko ení, ʻe ʻi ai ha ngaahi liliu ʻi he fokotuʻutuʻu ʻo e Taua Leʻo. Ki muʻa ke mau fakamatala ki he meʻa ʻa ia ʻe kehé, tuku ke mau lave ki he meʻa ʻe kei tatau ai peé.

Ko e hingoa ʻo e makasini ko ení, Ko e Taua Leʻo ʻOku Fanongonongo Ai ʻa e Puleʻanga ʻo Sihová, ʻoku ʻikai ke liliu ia. Ko ia ai, ʻe hokohoko atu hono fakalāngilangiʻi ʻe he Taua Leʻo ʻa Sihova ko e ʻOtua moʻoní pea ke fakafiemālieʻi ʻa e kau lautohí ʻaki ʻa e ongoongo lelei ʻo hono Puleʻangá. Ko e ngaahi kupu ʻi he peesi 5 ki he 9 ʻo e ʻīsiú ni ʻoku lāulea ai ki he Puleʻangá pe ko e hā ia pea mo e taimi ʻe hoko mai aí. Tānaki atu ki ai, ʻe hokohoko atu ʻa e Taua Leʻo ʻi hono pouaki ʻa e tui kia Sīsū Kalaisí, pouaki ʻa e moʻoni Fakatohitapú, pea fakamatalaʻi ʻa e ʻuhinga ʻo e ngaahi meʻa ʻoku hoko ʻi he māmaní ʻi he fakamaama ʻa e ngaahi kikite Fakatohitapú, hangē ko ia kuó ne fai ʻi he ngaahi hongofuluʻi taʻu lahi.

Ko e hā leva ʻa e meʻa ʻe kehé? Te mau fakamatala ki he niʻihi ʻo e ngaahi kupu foʻou fakaueʻiloto ʻa ia ʻe hā ʻi he pulusinga fakakuatá.a

ʻE hā ʻi ha ngaahi ʻīsiu ʻa e ngaahi kupu fakatupu fakakaukau. Ko e kupu “Naʻá Ke ʻIloʻi?” ʻe ʻomai ai ʻa e puipuituʻa mahuʻinga ʻoku fakahaaʻi ai ʻa e ʻuhinga ʻo e ngaahi fakamatala Fakatohitapu kuo filifilí. Ko e kupu “ʻUnuʻunu Ofi ki he ʻOtuá” ʻe fakamamafaʻi ai ʻa e meʻa ʻoku lava ke tau ako fekauʻaki mo Sihova mei he ngaahi konga Tohi Tapu pau. Ko e kupu “ʻEke ʻe he Kau Lautohí” ʻe lāulea ai ki he tali ki he ngaahi fehuʻi Fakatohitapu anga-maheni. Ko e fakatātaá, kuo fifili ʻa e kakai tokolahi, “ʻOku ʻi ho lotó ʻa e Puleʻanga ʻo e ʻOtuá?” Te ke maʻu ʻa e talí ʻi he peesi 13.

ʻOku faʻufaʻu ha ngaahi konga hokohoko ke maʻu ʻaonga mei ai ʻa e ngaahi fāmilí. Ko e konga “Kī ki he Fiefia ʻa e Fāmilí,” ʻe ʻoatu ai ʻa e ngaahi tuʻunga moʻoni ʻo e ngaahi palopalema ʻi he moʻui fakafāmilí pea fakahaaʻi ai ʻa e founga ʻoku lava ke tokoni ai ʻa e ngaahi tefitoʻi moʻoni Fakatohitapú ke fakaleleiʻi ʻa e ngaahi palopalemá. Ko e “Akoʻi Hoʻo Fānaú,” ko ha kupu ia ki he ngaahi mātuʻá ke nau lau fakataha mo ʻenau fānaú pea ko e konga “Maʻá e Toʻutupú,” ʻoku ʻomai ai ha polokalama ako Tohi Tapu ke fai ʻe he toʻutupú.

ʻE hā mo ha toe ngaahi kupu kehe ʻi he ʻīsiu ʻe niʻihi. Ko e “Faʻifaʻitaki ki Heʻenau Tuí” ʻe fakalototoʻaʻi ai kitautolu ke tau muimui ʻi he faʻifaʻitakiʻanga ʻa ha tokotaha ʻi he Tohi Tapú. Hangē ko ení, ʻi he peesi 18 ki he 21 ʻo e ʻīsiu ko ení, te ke lau ai ha fakamatala fakaueʻiloto fekauʻaki mo e palōfita ko ʻIlaisiaá pea ako ai ʻa e founga ʻe lava ke tau faʻifaʻitaki ai ki heʻene tuí. Ko e konga “Ko ha Tohi Mei . . . ” ʻe ʻomai ai ha fakamatala hangatonu mei he kau misinale mo e niʻihi kehe ʻi he ngaahi tapa kehekehe ʻo e māmaní. Ko e kupu “Meʻa ʻOku Tau Ako Meia Sīsuú” ʻe fakaeʻa ai ʻa e ngaahi akonaki tefito Fakatohitapú ʻi ha founga faingofua.

ʻOku mau tuipau ʻe hokohoko atu ʻa e fakamānako ʻa e Taua Leʻo ki he kau lautohi ʻa ia ʻoku nau ʻapasia ki he Tohi Tapú pea ʻoku nau loto ke ʻilo ki he meʻa ʻoku akoʻi moʻoni aí. Ko ʻemau ʻamanakí ia ʻe tokoniʻi koe ʻe he pepá ni ke fakalato hoʻomou fieinua ki he moʻoni ʻi he Tohi Tapú.

KAU FAIPULUSÍ

[Fakamatala ʻi lalo]