Ngaahi Liliu Fakafiefia ki he Taua Leʻo!
1 ʻI he konga ki muʻa ʻo e taʻu ní, naʻe maʻu ai ʻe he ngaahi fakatahaʻangá ha fanongonongo fakafiefia: Kamata ʻi Sanuali 2008, ʻe maʻu ai ʻa e Taua Leʻo ʻi he pulusinga kehekehe ʻe ua, ko e taha maʻá e kakaí pea ko e taha ki hotau fanga tokoua faka-Kalisitiané! Mahalo kuó ke fakakaukau: ‘Ko e hā ʻa e kehekehe ʻo e ongo makasiní? Ko e hā ʻa e ngaahi lelei ʻo hono fakamavahevaheʻi ʻa e ongo pulusingá? ʻOku ʻi ai ha ngaahi tafaʻaki foʻou ke fakatuʻotuʻa atu ki ai?’
2 Ko Hono Kehé: ʻE ʻi ai ʻa e pulusinga kehekehe ʻe ua ʻi he faka-Tongá. ʻUluakí, ko ha pulusinga fakakuata ʻo e Taua Leʻo ʻa ia ʻe ʻiloa ia ko e Pulusinga Maʻá e Kakaí. Ko e ngaahi kupu kotoa ʻi he ʻīsiu ko ʻení ʻe teuteuʻi ia ʻo fakataumuʻa ki he kakaí. Ko hono uá, ko e ʻīsiu ʻaho 15 ʻo e māhiná ʻe ʻiloa ia ko e Pulusinga Ako, pea ʻe ʻikai ke tuʻuaki ia ʻi he ngāue fakamalangá. ʻE ʻi ai ʻa e kupu ako kotoa pē ʻoku fiemaʻu ki he māhina ʻe taha pea pehē ki ha toe ngaahi kupu ʻe mahuʻingaʻia tefito ai ʻa e kau Kalisitiane fakatapuí. Ko e Pulusinga Maʻá e Kakaí ʻo e Taua Leʻo ʻe ʻikai ngata pē ʻi heʻene fakamānako ki he Kau Fakamoʻoní ka ʻe tautefito ʻene fakamānakó ki he faʻahinga ʻoku ʻikai ko ha Fakamoʻoni ʻa ia te nau tali nai ʻa e Tohi Tapú. ʻI he tafaʻaki ʻe tahá, ko e ʻĀ Hake! ʻe kei fakataumuʻa pē ia ki ha kau lautohi lahi ange, kau ai ʻa e kau fakataʻetaʻetuí mo e faʻahinga ʻoku ʻikai ʻi ha lotu faka-Kalisitiané.
3 Ko Hono Ngaahi Leleí: ʻI he Pulusinga Akó, ʻe ʻikai ke toe fiemaʻu ai ke fakamatalaʻi ʻa e ngaahi foʻi lea hangē ko e “tāimuʻa” ʻi ha ngaahi founga ke mahinoʻi ʻe he faʻahinga ʻoku ʻikai ko ha Fakamoʻoní. Ko e pulusinga ko ʻení ʻe toe ʻi ai ʻa e fakamatala ʻoku teuteuʻi tefito fakahangatonu pē ki he Kau Fakamoʻoni ʻa Sihová mo e kau ako Tohi Tapu ʻoku nau fakalakalaka fakalaumālié. Fēfē ʻa e Pulusinga Maʻá e Kakaí? Koeʻuhi ko e ngaahi kaveinga mo e founga ʻo hono hikí ʻe fakataumuʻa ia ki he kakaí, ʻe fiefia ha taha ʻoku ʻikai ko ha Fakamoʻoni ʻi hono lau ʻa e makasiní mei he peesi ʻuluakí ki heʻene ʻosi. Ko e moʻoni, ko e Fakamoʻoni kotoa pē ʻa Sihova ʻe maʻu ʻaonga mei hono lau ʻa e ʻīsiu taki taha. Koeʻuhi te tau tuʻuaki ʻa e Taua Leʻo pē taha mo e ʻĀ Hake! ʻe taha ʻi he ngāue fakamalangá ʻi he kuata taki taha, te tau maʻu ai ʻa e māhina ʻe tolu ke fakatupulekina ha ngaahi tuʻuaki ola lelei.
4 Ngaahi Tafaʻaki Foʻou: ʻOku fokotuʻutuʻu ha ngaahi tafaʻaki foʻou fakafiefia ki he Pulusinga Maʻá e Kakaí ʻo e Taua Leʻo. Ko e tafaʻaki ʻe taha ʻe fakamatalaʻi ai ʻa e ngaahi akonaki Fakatohitapu tefitó ʻi ha founga mātuʻaki faingofua. ʻE fakahaaʻi ʻi he tafaʻaki ʻe taha ʻa e founga ʻe lava ke tokoniʻi ai ʻe he Tohi Tapú ʻa e ngaahi fāmilí. ʻE ʻoatu ha ngaahi konga ako Tohi Tapu maʻá e toʻutupú. ʻI he ʻīsiu taki taha ʻe ʻi ai ha kupu ʻoku fakamatalaʻi ai ʻa e ngaahi konga Tohi Tapu tefito ʻa ia ʻoku akoʻi mai ai kia kitautolu ʻa e tokotaha ko Sihová.
5 ʻOku tau lotu ke tāpuakiʻi ʻe Sihova ʻa e fokotuʻutuʻu foʻou ko ʻeni ki he Taua Leʻo. ʻOfa ke fakaaʻu atu ʻe he makasini ko iá fakataha mo e ʻĀ Hake! ʻa e ongoongo leleí ki ha faʻahinga loto-totonu tokolahi ange.—Mt. 10:11.