ʻIo, ko e Pulusinga Akó Eni!

Kuo mau toe fakafōtunga ʻa e pulusinga akó ke hoko ʻo toe fakamānako mo ʻaonga ange kiate koe ʻi hoʻo ako ʻa e Folofola mahuʻinga ʻo e moʻoni ʻa Sihová.—Saame 1:2; 119:97.

ʻI he taʻu ʻe fā kuo maliu atú naʻa mau kamata pulusi ai ʻa e pulusinga ʻe ua ʻo e Taua Leʻo, ko e taha maʻá e kakaí mo e taha maʻatautolu hono kotoa—ʻa e Kau Fakamoʻoni ʻa Sihová mo ʻetau kau ako Tohi Tapu fakalakalaká.

Fekauʻaki mo e pulusinga akó, naʻe tohi ʻe ha sevāniti taimi lōloa ʻa Sihova: “ʻOku tōtōatu mo fakatupu ʻilo—ko ʻeku ongoʻi ia fekauʻaki mo e ʻuluaki pulusinga ako ʻo e Taua Leʻo. Ko e lea mo e fakamatala fakalaumālie loloto angé naʻe lea tonu ia ki hoku lotó. ʻOku ou fakamālō ʻaupito atu ki he tokonaki foʻou fisifisimuʻa ko ení.” Naʻe tohi ʻe ha tokoua ʻe taha: “ʻOku ou hanga atu ki hono fakamoleki ʻa e ngaahi houa fakafoʻituitui ki he pulusinga akó mo ngāueʻaki ʻeku Reference Bible.” ʻOku mau tui te ke maʻu ʻa e ongoʻi pehē.

Hangē ko ia ʻokú ke ʻiló, kuo pulusi ʻa e Taua Leʻo talu mei he 1879, ko ha ngāue ʻa ia kuo malava ʻi he laumālie mo e tāpuaki pē ʻa Sihová. (Sāk. 4:6) Lolotonga ʻa e ngaahi taʻu ko eni ʻe 133, kuo ʻi ai e ngaahi liliu lahi ʻi he takafi ʻo e makasiní. Ki he 2012, ʻe fakahaaʻi ai ʻi he takafi ʻo e pulusinga ako taki taha ha tā fakatātā fakalanu ʻe ha tokotaha ʻaati ʻo ha ʻata ʻo e faifakamoʻoni, ʻo fakamanatu mai ai kia kitautolu ʻetau ngāue kuo ʻomai ʻe he ʻOtuá ke faifakamoʻoni fakaʻāuliliki fekauʻaki mo e Puleʻanga ʻo Sihová. (Ngā. 28:23) ʻI loto he takafí, ʻi he peesi 2, te ke maʻu ai ʻa e laʻitā ʻa ia ʻoku fakatuʻunga mei ai ʻa e tā fakatātaá, fakataha mo ha fakamatala nounou ki he meʻa ʻoku faí mo e feituʻú. ʻI he kotoa ʻo e ako ʻi he taʻú, ʻe fakamanatu mai ai ʻe he meʻá ni kia kitautolu hono kotoa ko e kakai ʻa Sihová ʻoku nau malangaʻi ʻa e ongoongo leleí “ʻi he kotoa ʻo e māmani kuo nofoʻí.”—Māt. 24:14.

Ko e hā e ngaahi liliu kehe kuo fai ki he makasiní? Ko e puha fakamanatú kuo hiki ia ki he kamataʻanga ʻo e kupu ako taki taha. ʻE fakamamafaʻi atu heni kiate koe ʻa e ngaahi poini tefito ʻoku totonu ke ke fakasio ʻi hoʻo lau mo ako ʻa e kupú. Ko e moʻoni, ko e kau faiako Ako Taua Leʻo te nau loto ke hokohoko atu hono ngāueʻaki ʻa e ngaahi fehuʻi ko ení ke fakamanatu ʻa e fakamatalá ʻi he ngataʻanga ʻo e akó. Te ke fakatokangaʻi ko e ʻatā he tafaʻakí kuo kiʻi fakalahi ia pea ko e pēsí mo e ngaahi mataʻifika ʻo e palakalafí ʻoku pulusi ke toe kiʻi ʻasi lelei ange.

Hangē ko ia ʻoku fakamatalaʻi ʻi he ʻīsiu ʻo e māhina ní, ko ha tafaʻaki foʻou, “Mei Hotau Kuohilí,” ʻoku tānaki atu ki ai ke fakahaaʻi ai ʻa e ngaahi fakalakalaka mahuʻinga ʻi he hisitōlia ʻi onopooni ʻo e Kau Fakamoʻoni ʻa Sihová. Pehē foki, ʻe hā he taimi ki he taimi ʻa e ngaahi hokosia moʻoni ʻi he moʻuí ʻi lalo he ʻuluʻi kaveinga “Naʻa Nau Foaki Loto-Lelei Atu Kinautolu.” ʻE fakamatalaʻi maeʻeeʻa heni ʻa e hākailangitau, fiemālie, mo e fiefia kuo hokosi ʻe he fanga tokouá mo e fanga tuofāfiné ʻi he ngāue he feituʻu ʻoku lahi ange ai ʻa e fiemaʻu ʻo e kau fanongonongo ʻo e Puleʻangá.

Fakatauange ke ke fiefia lahi ʻaupito ʻi he taimi te ke fakamoleki ʻi hono ako ʻa e Folofola ʻa e ʻOtuá fakataha mo e tokoni ʻa e makasini ko ení.

Ko e Kau Malangá

[Fakatātā ʻi he peesi 3]

1879

[Fakatātā ʻi he peesi 3]

1895

[Fakatātā ʻi he peesi 3]

1931

[Fakatātā ʻi he peesi 3]

1950

[Fakatātā ʻi he peesi 3]

1974

[Fakatātā ʻi he peesi 3]

2008