“ʻE Fēfē Haʻo Tali?”
1. Ko e hā ʻa e ngaahi tuʻunga faingataʻa ʻoku fehangahangai mo e tokolahi ʻo kitautolu?
1 ʻOkú ke manako ʻi he Folofola ʻa e ʻOtuá kae faingataʻa kiate koe ke ke manatuʻi ʻa e ngaahi fakaikiiki ʻo kau ki he ngaahi fakamatala ʻi he Tohi Tapú pe ko e feituʻu ʻoku hiki ai ʻa e ngaahi fakamatala pau ʻi he Tohi Tapú? Te ke saiʻia ke maʻu ʻe hoʻo fānaú ha mahino totonu ki he ngaahi foʻi moʻoni mo e ngaahi akonaki Fakatohitapu tefitó? Ko e kupu makehe “ʻE Fēfē Haʻo Tali?” ʻa ia ʻoku pulusi ʻi he māhina taki taha ʻi he peesi 31 ʻo e ʻĀ Hake! ʻe lava ke tokoniʻi ai ʻa e iiki mo e lalahi fakatouʻosi ke nau hoko ʻo maheni lelei ange mo e Folofola ʻa e ʻOtuá.—Ng. 17:11.
2. ʻE lava fēfē ke ngāueʻaki ʻa e ngaahi konga kehekehe ʻo e “ʻE Fēfē Haʻo Tali?”
2 ʻE lava fēfē ke ke ngāueleleiʻaki ʻa e kupu makehe ko ení? Naʻe ʻomai ʻi he ʻīsiu ʻo e Awake! ʻo Sanuali 2006 ʻa e ngaahi fokotuʻu ko ení: “Vaheʻi ha taimi ke sio ai ki he peesi 31 . . . Ko e ngaahi konga ʻe niʻihi ʻo e pēsí ʻe fakamānako ki he kau lautohi kei siʻí; ko e ngaahi konga kehé ʻe siviʻi ai ʻa e manatu ʻa e kau ʻilo lahi ange ki he Tohi Tapú. Ko e konga ‘ʻI he Taimi Fē ʻi he Hisitōliá?’ ʻe tokoniʻi ai koe ke ke faʻu ha tēpile hokohoko taimi ʻa ia ʻoku fakahaaʻi ai ʻa e taimi naʻe moʻui ai ʻa e faʻahinga naʻe lave ki ai ʻi he Tohi Tapú pea mo e taimi naʻe hoko ai ʻa e ngaahi meʻa mahuʻinga. Lolotonga ko e ngaahi tali ki he konga ‘Mei he ʻĪsiu ko Ení’ ʻe maʻu ia mei he ngaahi konga kehekehe ʻi he makasiní, ko e tali ki he lahi taha ʻo e ngaahi fehuʻi kehé ʻe hā ia ʻi ha peesi kuo fakahaaʻi ʻi he ʻīsiu tatau, ʻa ia ʻe pulusi ʻo hanga ki lalo. Fēfē ke ke fai ha fekumi ki muʻa ke ke lau ʻa e ngaahi tali ko iá pea vahevahe leva mo e niʻihi kehé ʻa e meʻa ʻokú ke akó! ʻE lava nai ʻo ke ngāueʻaki ʻa e kupu foʻou makehe ko ení, ‘ʻE Fēfē Haʻo Tali?’ ko ha makatuʻunga ia ki he ngaahi fetalanoaʻaki Fakatohitapu fakafāmilí pe fakakulupú.”
3. Kuo anga-fēfē ʻa e maʻu ʻaonga ʻa e ngaahi fāmili ʻe niʻihi mei he kupu makehe ko ení, pea ko e ngaahi konga fē ʻokú ke saiʻia taha aí?
3 Ko e moʻoni, ʻoku fiefia ʻa e ngaahi fāmili lahi ʻi hono ngāueʻaki ʻa e kupu makehe ko ení ko ha makatuʻunga ia ki he ako fakafāmilí. ʻOku tohi ha faʻē ʻe taha: “Naʻá ku pehē mo hoku husepānití ko ha fakakaukau lelei ia ke fakakau ʻa e ‘Kumi Fakatātā ʻa e Fānaú’ ʻi heʻemau ako fakafāmilí ke tauhi ia ke longomoʻui mo fakamānako ki homa ʻofefine taʻu tolú. Naʻá ma fiefia lahi ʻi heʻema sio kiate ia ʻokú ne vēkeveke ke toʻo ʻene tatau fakafoʻituitui ʻo e ʻĀ Hake! ʻo huke ʻa e peesi kotoa pē kae ʻoua kuó ne maʻu ʻa e meʻa naʻá ne kumi ki aí.” ʻOku pehē ʻe ha tamai ʻi Pelēsila: “ʻOku ou saiʻia ʻaupito mo hoku foha taʻu fitú ʻi he kupu makehe ko eni ʻo e ʻĀ Hake! Kuo tokoniʻi ai ʻa Moises ke ne fanongo tokanga, ke ne kumi ʻa e ngaahi konga Tohi Tapú, ke ne ʻuhingaʻi ʻa e ngaahi fakatātaá pea ke ne mahinoʻi ʻa e ngaahi vahaʻa taimí.” ʻOku tohi ʻa Ashley, taʻu valu: “ʻOku ou fakamālō atu ʻi hono pulusi ʻa e ‘ʻE Fēfē Haʻo Tali?’ ʻi he tafaʻaki ki mui ʻo e ʻĀ Hake! ʻOku ou ako mei ai ha meʻa lahi fekauʻaki mo e Tohi Tapú.”
4. ʻE lava fēfē ke ngāueʻaki ʻe ha fāmili ʻa e kupu makehe ko ení ko ha konga ia ʻo ʻenau ako Tohi Tapu fakafāmilí?
4 Fēfē ke ke fakakaukau ke ngāueʻaki ʻi he taimi ki he taimi ʻa e “ʻE Fēfē Haʻo Tali?” ko ha konga ia ʻo hoʻo ako fakafāmilí! ʻE lava ke ke ngāueʻaki ʻa e Index pe Watchtower Library ʻi he CD ke kumi ʻa e ngaahi tali ki he niʻihi ʻo e ngaahi fehuʻi faingataʻa angé. ʻI hoʻo fai iá, te ke akoʻi ai ʻa hoʻo fānaú ki he founga ke fai ai ha fekumí. Kapau ʻoku ʻi ai haʻo fānau lalahi ange, fēfē ke ke vaheʻi ange ke nau fai ʻa e fekumi ki he tali ʻo e ngaahi fehuʻi faingataʻa ange hangē ko ení “Ko Hai Au?” pe “ʻI he Taimi Fē ʻi he Hisitōliá?” ki muʻa ke fai ʻa e ako fakafāmilí! ʻE lava leva ke nau vahevahe ʻa e ola ʻo ʻenau fekumí lolotonga ʻa e akó. Ko hono ngāueʻaki ola lelei ʻa e peesi ko ení ko e taha ia ʻo e founga ʻe lava ai ke uhuʻi ʻe he ngaahi mātuʻá ʻa e Folofola ʻa e ʻOtuá ki heʻenau fānaú, ʻo tokoniʻi kinautolu ke nau ʻiloʻi ʻa e “Tohitapu” mei he kei valevalé.—2 Tim. 3:15; Teu. 6:7.