Hanganaki Tokangataha ki he Ngaohi Ākongá
1. Ko e hā ʻoku fiemaʻú koeʻuhi ke fakahaofi ai ʻa e kakaí?
1 Ko e līpooti ngāue fakataʻu 2014 ʻoku fakaeʻa ai ʻa e faivelenga ʻa e kakai ʻa e ʻOtuá mo ʻenau fakapapau ke malangaʻi ʻa e ongoongo lelei ʻo e Puleʻangá. (Māt. 24:14) Fakafou ʻi he ngāue fale-ki-he-falé, ko e feingangāue makehe ki hono tufaki ʻa e ʻū tulekí mo e tohi fakaafé, mo ʻetau tamuʻomuʻa ʻi he faifakamoʻoni ʻi he feituʻu kakaí, ʻoku tau aʻu ai mo e pōpoaki ʻo e Tohi Tapú ki he kakai tokolahi ange ʻi ha toe taimi ki muʻa. Kae kehe, ke fakahaofi ʻa e niʻihi tāutahá, kuo pau ke tau tokoniʻi kinautolu ke nau hoko ko e kau ākonga ʻa Sīsū ʻaki hono ako ʻa e Tohi Tapú mo kinautolu.—1 Tīm. 2:4.
2. Ko e hā ʻa e ngaahi fehuʻi ʻe lava ke ne tokoniʻi kitautolu ke mateuteu ke kamata ha ako Tohi Tapu?
2 Mateuteu ke Kamata ha Ako Tohi Tapu: ʻI hono fakahāhā ʻe ha taha ha mahuʻingaʻia, ʻokú ke feinga mālohi ke maʻu hono tuʻasilá pea toe foki vave mo e taumuʻa ke kamataʻi ha ako Tohi Tapu? Ko fē ʻa e taimi fakamuimui naʻá ke feinga ai ke fakahāhā ha ako Tohi Tapu ʻi he fuofua ʻaʻahí? Ko fē ʻa e taimi fakamuimui naʻá ke tuʻuaki ai ha ako Tohi Tapu ki hoʻo kau tukuʻanga makasini paú? Kuó ke fakahaaʻi ʻa e vitiō Ko e Hā ke Ako Ai ʻa e Tohi Tapú? mo e Ko e Hā ʻOku Fai ʻi ha Ako Tohi Tapu? ki ho kaungāngāué, kaungāakó, kaungāʻapí, kāingá mo e ngaahi mahení? ʻI hono ngāueʻaki ʻa e meʻa tuʻuaki tohí, ʻokú ke feinga mālohi ke tala ange ki he faʻahinga ʻoku nau ʻave ʻa e tohi akó ʻoku fai mo ha ako Tohi Tapu taʻetotongi?
3. Ko e hā ʻoku fiemaʻú koeʻuhi ke akoʻi lavameʻa ʻa e moʻoní?
3 Tokoni meia Sihova mo Sīsū: ʻI he kamata ʻe Sīsū ʻene fekau ke ‘ngaohi ākongá’ ʻaki ʻa e foʻi lea “mou ō” ʻokú ne fakahaaʻi ai ʻa e fiemaʻu ke tau feinga tōtōivi mo fakahāhā ʻa e tamuʻomuʻa. Kae kehe, naʻe ʻikai ke ne tuku mai pē kia kitautolu ka naʻá ne talaʻofa te ne ʻiate kitautolu. (Māt. 28:19, 20) Tānaki atu ki ai, kuo ʻomai ʻe Sihova hono laumālie māʻoniʻoní pehē ki he ngaahi meʻangāue mo e ako ʻoku tau fiemaʻu ke akoʻiʻaki ʻa e kakaí ki he moʻoní. (Sāk. 4:6; 2 Kol. 4:7) ʻE lava ke tau lotu ke maʻu “ʻa e holi mo e mālohi” ke kau ki he ngāue mahuʻinga ko ení.—Fil. 2:13.
4. Ko e hā ʻoku totonu ai ke tau hanganaki tokangataha ki he ngaohi ākongá?
4 Ko hono malangaʻi ʻa e ongoongo leleí ʻoku tau maʻu ai ʻa e fiefia lahi. Kae kehe, ʻoku tupulaki ʻetau fiefiá ʻi he taimi ʻoku tau akoʻi ai ʻa e moʻoní ki ha taha pea tokoniʻi ia ke kau mo kitautolu ʻi he “hala ʻoku taki atu ki he moʻuí.” (Māt. 7:14; 1 Tes. 2:19, 20) Ko e toe mahuʻinga angé, ʻi heʻetau hanganaki tokangataha ki he ngaohi ākongá, ʻoku tau fakahōifuaʻi ai ʻa Sihova ʻa ia “ʻoku ʻikai te ne finangalo ke ʻi ai ha taha ʻe fakaʻauha ka ʻokú ne finangalo ki he tokotaha kotoa ke nau aʻusia ʻa e fakatomalá.”—2 Pita 3:9.