Ko e Teuteú—Ko ha Kī Ia ki he Ngaahi Toe ʻAʻahi Ola Leleí
1. ʻI he founga fē naʻe teu ke fakalahi atu ai ʻa e muʻaki ngāue fakafaifekau faka-Kalisitiané?
1 Naʻe teuʻi fakaʻāuliliki ʻe Sīsū ʻa ʻene kau ākongá ke nau hoko ko e kau malangaʻi ola lelei ʻo e “ogoogolelei oe buleaga.” (Mt. 4:23; 9:35, PM) Naʻe fai hono akoʻi kinautolú ʻi heʻenau ngāue fakamalanga pē ko ia ʻi Pālesitainé. Kae kehe, ki muʻa ke ne hāʻele ki hēvaní, naʻe ʻai ʻe Sīsū ke ʻiloʻi ko e ngāue fakafaifekau faka-Kalisitiané ʻe fakalahi atu ia ki māmani lahi koeʻuhi ke “ngaohi ʻa e ngāhi kakai kotoa pe ko [e] kau ako.”—Mt. 28:19, 20.
2. Ko e hā ʻoku kau ki he talangofua ki he fekau ʻa Sīsū ke ‘ngaohi ākongá’?
2 ʻE kau ki he ngāue ko iá ʻa e toe foki ki he faʻahinga tāutaha naʻa nau fakahāhā ʻa e mahuʻingaʻia ʻi he ongoongo lelei ʻo e Puleʻanga ʻo e ʻOtuá pea akoʻi kinautolu ke tauhi ʻa e ngaahi meʻa kotoa pē kuo tuʻutuʻuni ʻe Kalaisí. Ke fai ha ngaahi toe ʻaʻahi ola lelei pehē, ʻoku fiemaʻu ke tau mateuteu lelei.
3. Naʻa mo e ʻuluaki ʻaʻahí, ʻe anga-fēfē nai haʻo fakaʻatā ʻa e hala ki ha toe ʻaʻahí?
3 Palani ki Muʻa: ʻOku feinga ʻa e kau malanga ʻe niʻihi ke ʻohake ha fehuʻi ʻi he fakaʻosinga ʻo e ʻuluaki ʻaʻahí pea fai ha palōmesi ke toe foki ki ai ʻo lāulea ki he talí. ʻOku nau ʻiloʻi ko hono fai ha fakamatala mei he tohi Akoʻi ʻe he Tohi Tapú ʻi he toe ʻaʻahí kuo tokoniʻi ai kinautolu ke nau kamata ha ako Tohi Tapu ʻi he taimi pē ko iá.
4. Ko e hā ʻoku ʻikai totonu ai ke tau tautoloi ʻi hono fai ʻo e ngaahi toe ʻaʻahí kae ʻoua ke tau toki maʻu ʻa e ngaahi ʻīsiu foʻou ʻo e makasiní?
4 Ko hono maʻu ha foʻi seti pē ʻe taha ʻo e ngaahi makasini ki he māhina taki taha ʻoku ʻikai ʻuhinga ia aí ʻoku totonu ke tau tatali kae ʻoua ke tau toki maʻu ʻa e ngaahi ʻīsiu ʻo e māhina hoko maí ki muʻa ke fai ha toe ʻaʻahi. ʻE malava nai ke fakalahi ʻa e mahuʻingaʻiá ʻaki hono fai ha fakamatala ki he meʻa ʻoku ʻomai ʻi he makasini kuo ʻosi maʻu ʻe he tokotahá.
5. Ko e hā ʻa e ʻaonga ʻo e tomuʻa fakakaukau ki ha taumuʻá?
5 Fokotuʻu ha Taumuʻa: Ki muʻa ke fai ha toe fokí, vaheʻi ha miniti siʻi ke vakaiʻi ai hoʻo ngaahi lēkōtí pea fakapapauʻi ʻa e meʻa ʻokú ke loto ke fakahokó. Ko e fakatātaá, lāulea ki ha poini mei ha tohi naʻá ke tuku ki muʻa. Pe ko hoʻo tuku mo ha toe tohi kehe ʻoku fakamatala ai ki ha meʻa naʻá mo talanoa ki ai ki muʻa. Kapau naʻá ke langaʻi ha fehuʻi ʻi he taimi fakamuimuí, ko e moʻoni ko hoʻo taumuʻá ia ke fakapapauʻi ke fakakau ai ʻa hono tali ʻa e fehuʻi ko iá. ʻI hono fakamamafaʻi ha konga Tohi Tapu ʻa ia ʻokú ne fakapapauʻi ha poini naʻá ke lave ki ai, feinga ke lau hangatonu mei he Tohi Tapú.
6. Ko e hā ʻetau taumuʻa ki hono fai ʻo e ngaahi toe ʻaʻahí?
6 Ko ʻEtau Taumuʻá: Ko hono moʻoní, ko ʻetau taumuʻá ia ke kamata ha ako Tohi Tapu. Ko ha tokoua ʻe taha naʻá ne tuʻuaki ha ako Tohi Tapu ʻi ha toe ʻaʻahi, ka naʻe fakafisi ʻa e tangatá. Naʻe toe foki atu ʻa e tokouá mo e ngaahi makasini fakamuimui tahá peá ne pehē, “ʻI he lolotonga ʻema ʻi hení, ʻokú ma tali ai ha fehuʻi Fakatohitapu ʻe taha maʻá e kakaí he ʻahó ni.” ʻI he hili ʻa e tali ki ai ʻa e tangatá, naʻe lau ʻe he tokouá ha konga Tohi Tapu mo ha palakalafi feʻungamālie mei ha tohi naʻe ngāueʻaki ki he ngaahi ako Tohi Tapú. Naʻe iku atu ai ki ha ako Tohi Tapu tuʻumaʻu.
7. Kuo anga-fēfē hono tokoniʻi koe ʻe he teuteu leleí ke kamataʻi ha ako Tohi Tapu?
7 Ko hono vaheʻi ha taimi ke teuteu ai ki he ngaahi toe ʻaʻahí ʻoku tuha moʻoni ia mo e feingá. ʻE tupulaki ʻetau fiefiá, pea te tau maʻu nai ai ʻa e monū ko hono tokoniʻi ha taha “hehema totonu” ʻi he hala ki he moʻuí.—Ng. 13:48, NW.