Ko ʻEtau Puha Meʻangāue Fakafaiakó
1. ʻOku anga-fēfē faitatau ʻa e kau ʻevangeliō Kalisitiané mo e kau tufungá?
1 ʻOku ngāueʻaki ʻe he kau tufungá ʻa e ngaahi meʻangāue kehekehe. Ko e ngaahi meʻangāue ʻe niʻihi ʻoku toki ngāueʻaki pē ki ha ngāue pau, ka ko e ngaahi meʻangāue tefito ʻe niʻihi ʻoku ngāueʻaki maʻu pē. Ko e kau tufungá ʻoku nau faʻo maʻu pē ʻa e ngaahi meʻangāue tefitó ʻi heʻenau puha meʻangāué, pea ko e ngaahi meʻa eni ʻoku nau pōtoʻi taha hono ngāueʻakí. ʻOku fakalototoʻaʻi ʻe he Tohi Tapú ʻa e Kalisitiane taki taha ke kau ʻi he ngāue fakafaifekaú pea hoko “ko ha tangata ngāue ʻoku ʻikai ha meʻa ke mā ai.” (2 Tīm. 2:15) Ko e hā ʻa e meʻangāue mahuʻinga taha ʻi heʻetau puha meʻangāué? Ko e Folofola ʻa e ʻOtuá—ʻa e meʻangāue tefito ʻoku tau ngāueʻaki ki he ‘ngaohi ākonga.’ (Māt. 28:19, 20) Ko ia ai, ʻoku totonu ke tau feinga mālohi ke hoko ʻo pōtoʻi ʻi hono “tofa totonu ʻa e folofola ʻo e moʻoní.” Kae kehe, ʻoku ʻi ai mo e ngaahi meʻangāue kehe ʻoku faʻa ngāueʻaki ʻi heʻetau puha meʻangāue fakafaiakó ʻa ia ʻoku totonu ki he kau Kalisitiané kotoa ke nau ngāueʻaki pōtoʻi ʻi hono akoʻi ʻa e kakaí ki he moʻoní.—Pal. 22:29.
2. Ko e hā ʻetau ngaahi meʻangāue tefitó?
2 Ko ʻEtau Ngaahi Meʻangāue Fakafaiako Tefitó: Tuku kehe ʻa e Tohi Tapú, ko e hā ʻa e ngaahi meʻangāue kehe ʻoku totonu ke tau ngāueʻaki? Ko e meʻangāue tefito kuo tau maʻu ki hono akoʻi ʻa e ngaahi moʻoni Fakatohitapú ko e Ko e Hā ʻOku Akoʻi Moʻoni ʻe he Tohi Tapú? Hili hono fakakakato ʻa e ako ʻi he tohi ko ení mo e tokotaha akó, ʻoku tau hoko ki he Tauhi Kimoutolu ʻi he ʻOfa ʻa e ʻOtuá ke akoʻi ia ke ngāueʻaki ʻa e ngaahi tefitoʻi moʻoni Fakatohitapú ʻi he moʻui fakaʻahó. Ko ia ai, ʻoku totonu ke tau pōtoʻi ʻi hono ngāueʻaki ʻa e ongo tohi ko ení. ʻOku totonu ke faʻo mo ha polosiua pau ʻi heʻetau puha meʻangāue fakafaiakó. Ko e Ongoongo Lelei mei he ʻOtuá! ko e taha ia ʻo ʻetau meʻangāue tefito ki hono kamataʻi ha ngaahi ako Tohi Tapu. Kapau ʻoku ʻi hotau feituʻu ngāué ha kakai ʻoku fakangatangata pē ʻenau malava ke lautohí pe ko ha faʻahinga ʻoku nau lea ʻi ha lea ʻoku siʻisiʻi pē pe ʻikai ke ʻi ai ha tohi ʻi heʻenau leá, ʻoku toe lava ke tau ngāueʻaki ʻa e Fanongo ki he ʻOtuá pe Fanongo ki he ʻOtuá pea Moʻui Taʻengata. Ko e meʻangāue tefito ki hono tataki ʻa e kau akó ki he kautahá ko e Ko Hai ʻOkú Ne Fai ʻa e Finangalo ʻo Sihová ʻi he ʻAho Ní? Ko e ngaahi vitiō ʻoku tokoni ki he ngaohi ākongá hangē ko e Ko e Hā ke Ako Ai ʻa e Tohi Tapú?, Ko e Hā ʻOku Fai ʻi ha Fale Fakatahaʻanga? mo e ʻOku ʻi Ai ha Huafa ʻo e ʻOtuá?, ko e ngaahi meʻangāue eni ʻoku totonu ke tau toe ngāueleleiʻaki.
3. ʻE tokoniʻi kitautolu ʻe he ngaahi ʻīsiu ʻo e Ko ʻEtau Ngāue fakafaifekau ʻi he kahaʻú ke fai ʻa e hā?
3 ʻE tokoniʻi kitautolu ʻe he ngaahi ʻīsiu ʻo e Ko ʻEtau Ngāue Fakafaifekau ʻi he kahaʻú ke hoko ʻo pōtoʻi ʻi hono ngāueʻaki ʻa e ʻū tohi tefito ʻi heʻetau puha meʻangāué. ʻI heʻetau feinga mālohi ke ngāue pōtoʻi ʻaki ʻa e ngaahi meʻangāue ko ení, te tau talangofua ai ki he faleʻi fakamānavaʻí: “Tokanga maʻu ai pē kiate koe tonu pea ki hoʻo faiako ʻoku faí. Kītaki ʻi he ongo meʻá ni, he ʻi hono fai ʻa e meʻá ni te ke fakatou fakahaofi ai koe mo e faʻahinga ko ia ʻoku nau fanongo atu kiate koé.”—1 Tīm. 4:16.