Founga ke Aʻu Ai ki he Loto ʻo e Faʻahinga ʻOku Tau Akoʻí
1. Ko e hā ʻa e ola ʻo e akonaki ʻa Sīsuú ki he loto ʻo ʻene kau fanongó?
1 Naʻe aʻu ʻa Sīsū Kalaisi ki he loto ʻo ʻene kau fanongó. ʻI ha tuʻunga ʻe taha, naʻe “vela” ʻa e loto ʻo ʻene kau ākongá ʻi he hili ʻene fakamatalaʻi lelei ange ʻa e ngaahi konga Tohi Tapú. (Luke 24:32) Koeʻuhi ko e talangofua ki he ʻOtuá kuo pau ke haʻu ia mei he lotó, ʻe lava fēfē ke tau ueʻi ʻa e ongoʻi ʻa e faʻahinga ʻoku tau akoʻí ke nau fai ha liliu ʻi heʻenau moʻuí?—Loma 6:17.
2. ʻOku anga-fēfē tokoni ʻa e fakapotopotó mo e ʻiloʻiló ke aʻu ki he loto ʻo e tokotahá?
2 Ngāueʻaki e Fakapotopoto mo e ʻIloʻilo: Ko e kakai tokolahi, ko hono tala ange kia kinautolu ʻa e meʻa ʻoku tonú mo halá ʻe ʻikai ueʻi ai kinautolu ke fai ha meʻa. Ko hono moʻoní, ko hono fakafepakiʻi ʻenau tui fakalotú ʻi hono nafui ʻaki ha ngaahi veesi Tohi Tapú te nau toe fakamamaʻo ange. Ke ueʻi ha tokotaha, kuo pau ke tau ʻuluaki ʻiloʻi ʻa e ʻuhinga ʻokú ne tui mo fakafeangai pehē aí. Ko e ngaahi fehuʻi fakapotopoto mo fakatupu fakakaukaú ʻe fakalototoʻaʻi ai ia ke fakamatala ki heʻene ngaahi fakakaukau loloto tahá. (Pal. 20:5) Ko e toki taimi ia ke tau fili ha fakamatala mei he Folofola ʻa e ʻOtuá ʻe aʻu nai ki hono lotó. Ko ia ai, kuo pau ke tau fakahāhā ʻa e mahuʻingaʻia fakafoʻituitui pea hoko ʻo anga-kātaki. (Pal. 25:15) Manatuʻi ʻoku kehekehe ʻa e vave ʻo e fakalakalaka fakalaumālie ʻa e tokotaha taki taha. Fakaʻatā ha taimi ki he laumālie māʻoniʻoni ʻo Sihová ke ne tākiekina ʻenau fakakaukaú mo e ngāué.—Mk. 4:26-29.
3. ʻE lava fēfē ke tau tokoniʻi e faʻahinga ʻoku tau akoʻí ke fakatupulekina ha ngaahi ʻulungaanga lelei?
3 Tokoniʻi Ke Nau Fakatupulekina ʻa e ʻUlungaanga Lelei: ʻOku lava ke tokoniʻi ʻe he ngaahi fakamatala Fakatohitapu ʻokú ne fakatātaaʻi ʻa e lelei mo e ʻofa ʻa Sihová ʻa e faʻahinga ʻoku tau akoʻí ke fakatupulekina ha ngaahi ʻulungaanga lelei. ʻOku lava ke tau ngāueʻaki ʻa e konga Tohi Tapu hangē ko e Saame 139:1-4 pe Luke 12:6, 7 ke fakahaaʻi ʻa e lahi ʻo e mahuʻingaʻia fakafoʻituitui ʻa e ʻOtuá ʻiate kitautolu taki taha. ʻI hono fakatupulekina ʻe he tokotaha taki taha ʻa e houngaʻia loloto ki he ʻofa maʻataʻatā ʻa Sihová, ʻe tupulaki ai ʻenau ʻofa mo e anga-līʻoa fakaʻotuá. (Loma 5:6-8; 1 Sio. 4:19) ʻIkai ko ia pē, ʻi heʻenau ʻiloʻi ʻoku kaunga tonu ʻenau tōʻongá kia Sihová, ʻe ueʻi nai kinautolu ke nau ngāue ʻi ha founga ʻe fakahōifua mo fakalāngilangiʻi ai ia.—Saame 78:40, 41; Pal. 23:15.
4. ʻI hono akoʻi ʻa e niʻihi tāutahá ʻi heʻetau ngāue fakafaifekaú, ʻe lava fēfē ke tau fakaʻapaʻapaʻi ʻenau tauʻatāina ke filí?
4 ʻOku ʻikai ke fakamālohiʻi ʻe Sihova ha taha ke talangofua ki heʻene ngaahi fekaú. ʻI hono kehé, ʻokú ne fakaofiofi ki he tokotaha taki taha ʻaki hono fakahaaʻi mai ʻa e fakapotopoto ʻo e muimui ki heʻene faleʻí. (ʻAi. 48:17, 18) ʻOku tau faʻifaʻitaki kia Sihova ʻi heʻetau faiako ʻi ha founga ʻe lava ke tokoniʻi ai ʻa e kakaí ke nau fai pē ʻenau fakamulitukú. ʻI he taimi ʻoku ʻiloʻi pau ai ʻe he niʻihi tāutahá ʻa e fiemaʻu ke fai ha liliu ʻi heʻenau moʻuí, ʻoku iku ki ha ʻaonga tuʻuloa. (Loma 12:2) ʻOku toe tohoakiʻi ai kinautolu ke nau toe ofi ange ki he tokotaha “sivi loto,” ʻa Sihova.—Pal. 17:3.