Fakaleleiʻi ʻEtau Pōtoʻi ʻi he Ngāue Fakafaifekaú—Tuʻuaki ʻa e Tohi Akoʻi ʻe he Tohi Tapú

ʻUhinga ʻOku Mahuʻinga Aí: Ko e tohi Akoʻi ʻe he Tohi Tapú ko ha meʻangāue tefito ia ʻi heʻetau puha meʻangāue fakafaiakó. Kae kehe, ki muʻa ke tau ngāueʻaki ia ke akoʻi ha taha, kuo pau ke tau ʻuluaki ʻoange ia kiate ia. Ko ia ai, ʻoku totonu ke tau feinga mālohi ke hoko ʻo pōtoʻi ʻi hono tuʻuaki ʻa e tohi Akoʻi ʻe he Tohi Tapú ʻi he ngāue fakafaifekaú. (Pal. 22:29) ʻOku lahi ʻa e ngaahi foungá, pea ʻoku totonu ke ngāueʻaki ʻe he kau malangá ʻa e meʻa ʻoku ola lelei kiate kinautolú.

Founga Hono Fai Iá:

ʻEke ha fehuʻi langaʻi mahuʻingaʻia ʻe lava ke ke tataki ai ʻa e tokotaha-ʻapí ki ha vahe pau ʻi he tohí. Te ke ngāueʻaki nai ha taha ʻo e ngaahi fehuʻi ʻi he kamataʻanga ʻo e vahe taki taha. Hili ʻa e fanongo ki he tali ʻa e tokotaha-ʻapí, lau ha konga Tohi Tapu feʻungamālie pea fakahaaʻi ki ai ʻa e palakalafi ʻi he kaveinga ko iá peá mo fetalanoaʻaki nounou ki ai.
Ko e founga ʻe taha ko hono ngāueʻaki ʻa e peesi talateú ke fakatupulekina e mahuʻingaʻiá pea fakahaaʻi leva ki he tokotaha-ʻapí ʻa e konga ʻi he tohí ʻoku maʻu ai ʻa e tali Fakatohitapú. Ko e fakatātaá, te ke lave nai ki ha meʻa fakamamahi naʻe toki ʻasi ʻi he ongoongó pea fakamatala ʻoku hohaʻa ʻa e tokolahi ki he tali ʻo e ngaahi fehuʻi ʻi he peesi 3. Pe ko hoʻo pehē ʻokú ke ʻaʻahi holo ke vahevahe ʻa e ongoongo lelei fekauʻaki mo e kahaʻú. Fakahaaʻi leva ʻa e fakatātā ʻi he peesi 4-5 pea ʻeke ange, “Ko fē ʻi he ngaahi talaʻofa ko ení te ke saiʻia ke sio ʻoku fakahokó?” Ko e toe meʻa ʻe taha ko hoʻo pehē ʻokú ke ʻaʻahi nounou holo ke tokoniʻi ʻa e kakaí ke ʻilo ʻa e tali ki he ngaahi fehuʻi mahuʻinga ʻi he moʻuí. Fakahaaʻi leva ki he tokotaha-ʻapí ʻa e ngaahi fehuʻi ʻi he ngataʻanga ʻo e peesi 6, pea ʻeke ange pe ko fē ʻoku mahuʻingaʻia taha aí.
Ngāueʻaki ha tuʻuaki fakahangatonu ki hono kamataʻi ha ako Tohi Tapu. Te ke pehē nai: “ʻOku mau fakahaaʻi ʻa e tohi ako Tohi Tapu ko ení ki he kakaí. Kuó ke ʻosi sio ai ki muʻa? [Tuku ke ne tali.] Kapau ʻoku ʻi ai haʻo kiʻi faingamālie, ʻoku ou fiefia ke fakahaaʻi atu ʻa e founga hono ngāueʻaki ia fakataha mo e Tohi Tapú.”

ʻAhiʻahiʻi Eni ʻi he Lolotonga ʻa e Māhiná:

ʻAi ha taimi ʻahiʻahi lolotonga hoʻo lotu fakafāmilí.
ʻI he ngāue fakafaifekaú, vahevahe mo e kau malanga kehé ʻa e meʻa te ke leaʻakí. (Pal. 27:17) Liliu hoʻo tuʻuakí kapau ʻoku ʻikai ola lelei.