Hiki-Leʻo—Founga Hono Ngāueʻakí
1. Tānaki atu ki he ʻū tohi kuo pulusí, ko e hā ha toe tokonaki ʻaonga ʻoku tau maʻu?
1 Ko e tokolahi ʻoku nau fiefia ʻi hono ngāueʻaki ʻa e jw.org ke lau ʻa e ngaahi lea vovo mo totonu ʻo e moʻoní. (Koh. 12:10) Kae kehe, kuó ke ngāueʻaki ʻa e ngaahi hiki-leʻó? ʻOku lava ke ke fanongo heni ki he lahi taha ʻo e fakamatalá ʻi heʻetau uepisaití. ʻE lava fēfē ke tau maʻu ʻaonga mei he hiki-leʻó?
2. ʻE lava fēfē ke tau ngāueʻaki ʻa e ngaahi hiki-leʻó ʻi he ako fakafoʻituituí pe fakafāmilí?
2 Ako Fakafoʻituituí pe Fakafāmilí: Ko e fanongo ki he ngaahi tulama hiki-leʻo ʻo e lau Tohi Tapú mo e ʻū tohí ʻi he lolotonga e fefonongaʻakí pe ngaahi ngāue fakaʻahó ʻe tokoniʻi ai kitautolu ke ngāueleleiʻaki ʻa e taimí. (ʻEf. 5:15, 16) ʻE lava ke tau fakakau ki heʻetau efiafi lotu fakafāmilí ʻa e fanongo ki he ngaahi fakamatala kuo ʻosi hikí pea muimui ʻi he tatau kuo pulusí. Ko hono ngāueʻaki ʻa e ngaahi hiki-leʻó ʻi hoʻo ako fakafoʻituituí ʻoku tautefito ʻene tokoní kapau ʻoku tau loto ke fakalakalaka ʻetau lautohí pe ako ʻa e leá.
3. Ko hai ʻe maʻu ʻaonga ʻi hotau feituʻu ngāué mei he ngaahi hiki-leʻó?
3 Ngāue Fakafaifekau: Ko e kakai ʻi hotau feituʻu ngāué ʻoku nau fuʻu femoʻuekina ke lautohí te nau fie fanongo nai ki he ngaahi hiki-leʻó. Pe te tau fetaulaki nai mo ha faʻahinga ʻoku nau lea ʻi ha lea kehe pea te nau tali lelei nai kapau te nau fanongo ki he pōpoaki ʻo e Puleʻangá ʻi he “lea ʻa ia naʻe fanauʻi hake ai” kinautolú. (Ngā. 2:6-8) ʻI he ngaahi feituʻu ʻe niʻihi, ko e fanongó ʻa e konga mahuʻinga taha honau anga fakafonuá. Ko e fakatātaá, ko e anga fakafonua ʻo e kau Hamongo, ʻoku nau faʻa tala ʻenau hisitōliá ki he toʻutangata kei siʻi angé ʻi hono tala ngutu pē pea ʻoku lelei ʻenau manatuʻi ʻa e meʻa ʻoku nau fanongo ki aí. Ko e lahi taha ʻo e anga fakafonua ʻo e kau ʻAfiliká ʻoku nau saiʻia ʻi he ako fakafou ʻi he talanoa fananga.
4. Ko e hā e ngaahi fehuʻi ʻe lava ke tau ʻeke hifo ʻi hono tokoniʻi ʻa e kakai ʻi hotau feituʻu ngāué?
4 ʻI ho feituʻu ngāué, ʻe lelei ke tā ha hiki-leʻo ʻi he lea ʻa e tokotaha-ʻapí? ʻE maʻu ʻaonga nai ha taha mei he hiki-leʻo ʻo e ʻū tohi naʻa tau ʻīmeili ki aí? ʻE lava ke tau hiki ki ha CD ha hiki-leʻo ʻo ha tohi pea ʻoange ia ki he tokotaha mahuʻingaʻiá, mo hatatau nai kuo pulusi? Ko ha tatau fakaʻilekitulōnika ʻo ha tohi, polosiua, makasini pe tuleki ʻoku tau ʻoatu ki ha taha ʻi he ngāue fakafaifekaú ʻe lau ia ko ha tatau kuo tufa. Ko e ngaahi hiki-leʻó ʻoku fakataumuʻa ia ke tau ngāueʻaki ki heʻetau ako fakafoʻituituí pea mo hono tō ʻa e ngaahi tenga ʻo e moʻoni ʻo e Puleʻangá.—1 Kol. 3:6.