Sio ki he Kau Palōfitá ko ha Sīpinga—Hapakuke

1. Ko e hā e meʻa ʻoku tau faitatau ai mo e palōfita ko Hapakuké?

¹ ʻI he māmaní takatakai ʻoku tau fekuki ai mo e fakautuutu ʻa e fulikivanú, te tau maʻu nai ʻa e ongoʻi hangē ko Hapakuké, naʻá ne ʻeke kia Sihova: “Ko e ha ʻoku ke tuku ai ke u sio ki he kovi? pea ke moʻu vakaia ʻe koe ʻa e fakamamahi?” (Hap. 1:3; 2 Tīm. 3:1, 13) Ko e fakalaulauloto ki he pōpoaki mo e faitōnunga ʻa Hapakuke ʻi he tuí ʻoku lava ke ne fakaivimālohiʻi kitautolu ʻi heʻetau tatali ki he ʻaho fakamaau ʻo Sihová.—2 Pita 3:7.

2. ʻE lava fēfē ke tau fakahāhaaʻi ʻoku tau moʻuiʻaki ʻa e tuí ʻi he ʻahó ni?

² Moʻuiʻaki ʻa e Tui: ʻI he ʻikai hoko ʻo lōmekina ʻe he ngaahi tuʻunga koví, naʻe kei hoko pē ʻa Hapakuke ʻo ʻāʻā mo longomoʻui fakalaumālie. (Hap. 2:1) Naʻe fakapapauʻi ʻe Sihova ki he palōfitá ko ʻEne Folofolá ʻe fakahoko ʻi he taimi totonu pea “ko e maʻoniʻoni te ne moʻui mei heʻene tui.” (Hap. 2:2-4) Ko e hā ʻene ʻuhinga ki he kau Kalisitiane ʻoku nau moʻui ʻi he uhouhonga ʻo e taimi ʻo e ngataʻangá? Ko hono fakapapauʻi ʻe hoko ʻa e ngataʻangá ʻoku mahuʻinga lahi ange ia ʻi he ʻiloʻi ko ʻafē ʻe hoko mai aí. ʻOku ueʻi kitautolu ʻe he tuí ke tau hanganaki ʻāʻā mo fakamuʻomuʻa ʻa e ngāue fakafaifekaú.—Hep. 10:38, 39.

3. Ko e hā kuo pau ai ke tau tauhi maʻu ʻetau fiefiá ʻi he ngāue kia Sihová?

³ Fiefia ʻia Sihova: ʻI he taimi ʻe ʻohofi ai ʻe Koki ʻo Mēkokí ʻa e kakai ʻa Sihová, ʻe ʻahiʻahiʻi ai ʻetau tuí. (ʻIsi. 38:1 [38:2, PM], 10-12) Ko e taú ʻe hoko ai ʻa e faingataʻa, naʻa mo e kau ikuná. ʻE ʻi ai ʻa e nounou fakameʻatokoni, ʻe mole nai ʻa e koloá, pea ʻe tō lalo ʻa e tuʻunga ʻo e moʻuí. ʻE fēfē ʻetau fakafeangai ʻi he hoko ʻa e ngaahi faingataʻá? Naʻe ʻamanekina ʻe Hapakuke ʻa e ngaahi faingataʻá, ko ia naʻá ne fakapapau ke tauhi maʻu ʻene fiefiá ʻi he ngāue kia Sihová. (Hap. 3:16-19) Ko e “fiefia a Jihova” te ne toe tokoniʻi kitautolu ke kātaki ʻi he ngaahi ʻahiʻahi ʻi he kahaʻú.—Nehe. 8:10, PM; Hep. 12:2.

4. Ko e hā ʻa e fiefia ʻe lava ke tau maʻu ʻi he ʻahó ni mo e kahaʻú?

⁴ Ko e faʻahinga ʻe hao ʻi he ʻaho fakamaau ʻo Sihová ʻe hokohoko atu hono akoʻi kinautolu ki he founga moʻui ʻa e ʻOtuá. (Hap. 2:14) ʻE toe ako foki mo e faʻahinga ʻe toetuʻú fekauʻaki mo Sihova. Naʻa mo e taimí ni, ʻofa ke tau ngāueʻaki ʻa e faingamālie kotoa pē ke lea fekauʻaki mo Sihova pea mo ʻene ngaahi ngāue fakaofó!—Saame 34:1; 71:17.