Ikunaʻi ʻe he Ako Fakaʻotuá ʻa e Tomuʻa Fehiʻá

ʻOku ʻikai filifilimānako ʻa Sihova. (Ngā. 10:34, 35) ʻOkú ne tali ʻa e kakai “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” (Fkh. 7:9) Ko ia ai, ʻoku ʻikai ke ʻi ai ha meʻa ʻi he fakatahaʻanga faka-Kalisitiané ko e tomuʻa fehiʻa pe lau lanu. (Sēm. 2:1-4) Koeʻuhi ko e ako fakaʻotuá ʻoku tau fiefia ai ʻi he palataisi fakalaumālié pea kuo tau vakai ai ki hono liliuʻi ʻo e ngaahi angaʻitangatá. (ʻAi. 11:6-9) ʻI heʻetau ngāue tōtōivi ke taʻaki fuʻu atu mei hotau lotó ha faʻahinga tafaʻaki pē ʻo e tomuʻa fehiʻá, ʻoku tau fakamoʻoniʻi ʻoku tau faʻifaʻitaki ai ki he ʻOtuá.—ʻĒf. 5:1, 2.

SIO ʻI HE VITIŌ JOHNY MO GIDEON: ONGO FILI KI MUʻA, ONGO TOKOUA ʻI HE TAIMÍ NI. TALI LEVA ʻA E NGAAHI FEHUʻI KO ENÍ:

• Ko e hā ʻoku māʻolunga ange ai ʻa e ako fakaʻotuá ʻi he ngaahi feinga ʻa e tangatá ke toʻo atu ʻa e tomuʻa fehiʻá mo e lau lanú?

• Ko e hā ʻoku maongo kiate koe fekauʻaki mo ʻetau fetokouaʻaki fakavahaʻapuleʻangá?

• ʻI he founga fē ʻoku fakalāngilangiʻi ai ʻa Sihova ʻi he taimi ʻoku tau tauhi maʻu ai ʻetau fāʻūtaha faka-Kalisitiané?