Talitali Loto-Māfana Kinautolu

Ko hai ke talitali loto-māfaná? Ko ha taha pē ʻokú ne maʻu ʻetau ngaahi fakataha faka-Kalisitiané—mei he tokotaha haʻu foʻoú ki he ngaahi kaungāmeʻa fuoloá. (Loma 15:7; Hep. 13:2) Mahalo ko ha kaungātui ʻoku ʻaʻahi mai mei ha fonua ʻe taha, pe ko ha Kalisitiane ʻikai longomoʻui ko e ʻuluaki taimi eni ʻi he taʻú ʻokú ne maʻu ʻa e fakatahá. Fakaʻuta atu ki he anga hoʻo ongoʻí ʻi ha tuʻunga pehē. ʻIkai nai te ke houngaʻia ʻi hano maʻu ha fakafeʻiloaki loto-māfana? (Māt. 7:12) Ko ia ai, ko e hā ʻoku ʻikai te ke fai ai ha feinga lahi ke ke ʻalu holo ʻi he Fale Fakatahaʻangá ʻo fakafeʻiloaki ki he niʻihi kehé ʻi he ki muʻa mo e hili ʻa e fakatahá? Ko e meʻa eni ʻe tokoni ki hono maʻu ha ʻatimosifia māfana mo ʻofa pea ʻomi ai ʻa e lāngilangí kia Sihova. (Māt. 5:16) Ko hono moʻoní, heʻikai nai ke malava ke tau lea fakafoʻituitui ki he tokotaha kotoa ʻoku ʻi aí. Kae kehe, kapau te tau feinga kotoa ke fai ʻetau tafaʻakí ʻe ongoʻi ʻe he tokotaha kotoa ʻoku talitali lelei ia.a

Ko e anga-talitali kakai moʻoní ʻoku ʻikai ke fakahāhā pē ia ʻi he ngaahi taimi makehé, hangē ko e Fakamanatú ka ʻi he taimi kotoa pē. ʻI he taimi ʻoku vakai ai mo hokosia ʻe he faʻahinga ʻoku toki kau foʻou maí ʻa e fakahāhā ʻo e ʻofa faka-Kalisitiané, ʻe ueʻi ai kinautolu ke fakahīkihikiʻi ʻa e ʻOtuá pea kau fakataha mo kitautolu ʻi he lotu maʻá.—Sione 13:35.