ʻE Lava Ke Ke Fakalototoʻaʻi ha Kalisitiane ʻIkai Longomoʻui

ʻI he Tūsite ʻo ʻEpeleli 11, ko e tokolahi ʻo e kau Kalisitiane ʻikai longomoʻuí te nau maʻu ʻa e Fakamanatú. Naʻa nau kau ki he lova ki he moʻuí ka kuo nau māmālie hifo ʻi ha ngaahi ʻuhinga kehekehe, ko e niʻihi ʻo e ngaahi ʻuhingá ʻoku hā ʻi he polosiua Foki kia Sihova. (Hep. 12:1) Neongo ia, ko e faʻahinga ʻikai longomoʻuí ʻoku nau kei mahuʻinga pē kia Sihova, he naʻá ne fakatau kinautolu ʻaki ʻa e taʻataʻa hono ʻAló. (Ngā. 20:28; 1 Pita 1:18, 19) ʻE lava fēfē ke tau tokoniʻi kinautolu ke nau foki mai ki he fakatahaʻangá?

ʻOku kumi ʻa e kau mātuʻa ʻi he fakatahaʻangá ki he kau Kalisitiane ʻikai longomoʻuí ke tokoniʻi kinautolu ʻo hangē pē ko ha tauhi-sipi ʻokú ne tōtōivi hono kumi ha sipi kuo hē mei he tākangá. (Luke 15:4-7) ʻOku tapua atu ai ʻa e tokanga ʻofa ʻa Sihová. (Sel. 23:3, 4) ʻOku ʻikai ko e kau mātuʻá pē, ka ko kitautolu kotoa ʻoku lava ke tau tokoniʻi ʻa e faʻahinga ko iá. Ko ʻetau ngaahi feinga ke fakahāhā ʻa e anga-ʻofa mo e kaungāongoʻí ʻoku fakahōifua ia kia Sihova pea ʻoku lava ke tāpuakiʻi lahi ia. (Pal. 19:17; Ngā. 20:35) Ko ia ai, fakakaukau ki he faʻahinga ʻoku lava ke ke fakalototoʻaʻí pea fai ia ʻo ʻikai toloi!

SIO ʻI HE VITIŌ FAKALOTOTOʻAʻI ʻA E FAʻAHINGA ʻIKAI LONGOMOʻUÍ, PEA LĀULEA LEVA KI HE NGAAHI FEHUʻI KO ENÍ:

• Ko e hā ʻa e meʻa naʻe tamuʻomuʻa ʻa Abbey ke faí ʻi heʻene fetaulaki mo ha Fakamoʻoni naʻe teʻeki ai ke ne ʻiloʻi?

• Ko e hā ʻoku totonu ai ke tau fakaofiofi ki he kau mātuʻá kapau ʻoku tau fakakaukau ke tokoniʻi ha tokotaha ʻoku ʻikai longomoʻui?

• Naʻe anga-fēfē ʻa e teuteu ʻa Abbey ki heʻene ʻaʻahi hono ua kia Laura?

• Naʻe anga-fēfē ʻa e fakahāhā ʻe Abbey ʻa e kīvoí, anga-kātakí mo e ʻofá ʻi heʻene feinga ke fakalototoʻaʻi ʻa Laura?

• Ko e hā ʻoku lava ke tau ako mei he talanoa fakatātā ʻa Sīsū ʻi he Luke 15:8-10?

• Ko e hā ʻa e ngaahi tāpuaki naʻe maʻu ko e ola ia mei he ngaahi feinga fakataha ha tokolahi ke tokoniʻi ʻa Laura?