ʻOku Mālohi Fēfē Hoʻo Tui ki he Ngaahi Talaʻofa ʻa Sihová?

Ko Siosiua mo Solomone fakatouʻosi naʻá na fakapapauʻi naʻe ʻikai tō kelekele ha foʻi lea ʻe taha ʻo e ngaahi talaʻofa ʻa Sihová. (Sios. 23:14; 1Tuʻi 8:​56) Ko e fakamatala fakamoʻoni ʻa e ongo fakamoʻoni alafalalaʻanga ko ení ʻoku tānaki atu ia ki he makatuʻunga fefeka ʻoku lava ke tau langa ai ʻetau tuí.—2 Kol. 13:1; Tai. 1:​2.

Naʻe anga-fēfē hono fakahoko ʻe Sihova ʻene ngaahi talaʻofá ʻi he taimi ʻo Siosiuá? Sio fakataha mo ho fāmilí ʻi he foʻi vitiō tulama ‘​Kuo ʻIkai To Kelekele ha Momoʻi Lea ʻe Taha.’ Lāulea leva ki he ngaahi fehuʻi ko ení: (1) ʻE lava fēfē ke ke faʻifaʻitaki ki he ngāueʻi ʻe Lēhapi ʻa e tuí? (Hep. 11:31; Sēm. 2:​24-​26) (2) ʻOku anga-fēfē hono fakamoʻoniʻi ʻe he meʻa fekauʻaki mo ʻĀkaní ko e talangataʻa loto-leleí ʻoku taki atu ki he fakatuʻutāmaki? (3) Neongo ko e kau pāteʻi tau ʻa e kau tangata ʻo Kipioné, ko e hā naʻa nau kākaaʻi ai ʻa Siosiua pea fakamelino mo ʻIsilelí? (4) Naʻe anga-fēfē ʻa e hoko moʻoni ʻa e folofola ʻa Sihová ʻi hono fakamanamanaʻi ʻe he ngaahi tuʻi ʻe toko nima ʻo ʻĀmolí ʻa ʻIsilelí? (Sios. 10:​5-​14) (5) Kuo anga-fēfē ʻa e ngāue ʻa Sihova maʻau ʻi hoʻo fakamuʻomuʻa ʻi hoʻo moʻuí ʻa e Puleʻanga ʻo e ʻOtuá mo ʻene māʻoniʻoní?​—Māt. 6:​33. ʻI heʻetau fakakaukau atu ki he meʻa kotoa kuo fai ʻe Sihová, mo e meʻa ʻokú ne lolotonga faí, mo e meʻa te ne faí, ʻe fakaʻau ke toe mālohi ange ai ʻetau tui ki heʻene ngaahi talaʻofá.​—Loma 8:​31, 32.