Fakaleleiʻi ʻEtau Pōtoʻi ʻi he Ngāue Fakafaifekaú—Kamataʻaki ha Fetalanoaʻaki ʻe Taki Atu ki ha Faifakamoʻoni

Naʻe malava ʻe Sīsū ke faifakamoʻoni ʻi he founga ʻikai anga-mahení ki ha fefine Samēlia koeʻuhi naʻá ne kamata ha fetalanoaʻaki mo ia. ʻE lava fēfē ke tau fakaleleiʻi ʻetau pōtoʻí ʻi hono kamata ha fetalanoaʻaki mo e kau solá?

• Hoko ʻo anga-fakakaumeʻa pea lea ki he kakaí. Neongo ne helaʻia ʻa Sīsū, naʻá ne kamata ʻa e fetalanoaʻakí ʻaki pē ha kole inu. Ko ia ʻe lava ke ke kamataʻaki nai ha fakalea loto-māfana pea lave ki he anga ʻo e ʻeá, pe ko ha meʻa ʻoku lolotonga hoko. Manatuʻi, ko e muʻaki taumuʻá ko hono kamata ha fetalanoaʻaki, ko ia talanoa fekauʻaki mo ha meʻa pē ʻoku mahuʻinga ki he tokotahá. Kapau ʻoku ʻikai te ne fai mai ha tali, feinga pē. Toe feinga ʻi ha tokotaha kehe. Kole kia Sihova ki ha loto-toʻa.—Nehe. 2:4; Ngā. 4:29.

• ʻIloʻilo ki ha faingamālie ke ʻoatu ai ʻa e ongoongo leleí, kae ʻoua ʻe fakavave ia. ʻAi ke anga-fakafetalanoaʻaki. Kapau te ke fakamālohiʻi atu ke fai ha fetalanoaʻaki, ʻe taʻefiemālie nai ʻa e tokotahá peá ne taʻofi ʻa e fetalanoaʻakí. ʻOua ʻe siva ʻa e ʻamanakí ʻi he ʻosi ʻa e fetalanoaʻakí ʻoku teʻeki ai ke ke fai ha fakamoʻoni. Kapau ʻokú ke manavasiʻi ʻi he kamataʻi ha fetalanoaʻaki ʻo fekauʻaki mo e ongoongo leleí, ʻahiʻahi kamata ha fetalanoaʻaki ʻo ʻikai fakataumuʻa ki ha faifakamoʻoni. [Huluʻi pea fetalanoaʻaki ʻi he vitiō 1.]

• Feinga ke fakatupunga ha faingamālie ki ha faifakamoʻoni ʻaki hono fai ha fakamatala loto-moʻoni fekauʻaki mo hoʻo tuí ʻa ia ʻe ʻai nai ʻa e tokotaha fanongó ke ne kole ki ha fakamatala. Naʻe fai ʻe Sīsū ha fakamatala fakamānako naʻe ueʻi ai ʻa e fefiné ke ne ʻeke ha ngaahi fehuʻi. ʻI he faai atu pē ʻo ne ʻoatu ʻa e ongoongo leleí, naʻá ne tali ai pē ʻa e ngaahi fehuʻi ʻa e fefiné. [Huluʻi pea fetalanoaʻaki ʻi he vitiō 2, pea hili iá huluʻi pea fetalanoaʻaki ʻi he vitiō 3.]