ʻAi Hoʻo Ako Fakafoʻituituí ke Mohu ʻUhinga Ange

ʻUHINGA ʻOKU MAHUʻINGA AÍ: Ko hono ako fakafoʻituitui ʻa e Folofola ʻa e ʻOtuá ʻoku tokoniʻi ai kitautolu ke “mahinoʻi kakato ʻa e fālahi mo e lōloa mo e māʻolunga mo e loloto ʻo e moʻoní.” (ʻEf. 3:18) ʻOku tokoniʻi foki ai kitautolu ke tau nofoʻaki taʻehalaia mo taʻehamele ʻi he lotolotonga ʻo ha māmani fulikivanu pea ke hanganaki “piki ke maʻu ki he folofola ʻo e moʻuí.” (Fil. 2:15, 16) Ko hono ako fakafoʻituitui ʻa e Folofola ʻa e ʻOtuá ʻoku fakaʻatā ai kitautolu ke tau fili ha maʻuʻanga fakamatala ʻa ia ʻoku tau fiemaʻu tāutahá. ʻE lava fēfē ke tau ngāueʻaongaʻaki ʻa e lahi taha ʻo e taimi ʻoku tau maʻu ke lau ai mo ako ʻa e Tohi Tapú?

FOUNGA HONO FAI IÁ:

• Fakaʻilongaʻi ʻa e ngaahi vēsí pea hiki mo ha nouti ʻi hoʻo Tohi Tapu ki he ako fakafoʻituituí, pe ʻi hoʻo tohí tonu pe ko e tatau fakaʻilekitulōniká

• ʻEke hifo kiate koe ʻa e ngaahi fehuʻi ko ení ʻi hoʻo lau ʻa e Folofola ʻa e ʻOtuá: ‘Ko hai? Ko e hā? ʻA fē? ʻI fē? Ko e hā hono ʻuhinga? Anga-fēfē?’

• Kumi ki he moʻoniʻi meʻá. Ngāueʻaki ʻa e ngaahi meʻangāue fakaefekumi ʻoku ala maʻú, kumi ki he ngaahi tuʻunga-lea pe veesi Fakatohitapú

• Fakalaulauloto ki he meʻa ʻokú ke laú ke ʻiloʻi ʻa e founga ke ngāueʻaki fakafoʻituitui ai ʻa e fakamatalá

• Ngāueʻaki ʻa e meʻa ʻokú ke akó ʻi hoʻo moʻui fakaʻahó.—Luke 6:47, 48

SIO ʻI HE VITIŌ HANGANAKI “PIKI KE MAʻU”—FAKAFOU ʻI HE AKO FAKAFOʻITUITUI OLA LELEI, PEA TALI LEVA ʻA E NGAAHI FEHUʻI KO ENÍ:

• Kuo anga-fēfē hono fakamatalaʻi ʻe he niʻihi ʻa e ako fakafoʻituituí?

• Ko e hā ʻoku totonu ai ke tau kamataʻaki ʻa e ako fakafoʻituitui taki taha ʻaki ha lotú?

• Ko e hā te ne tokoniʻi kitautolu ke tau mahinoʻi lelei ange ʻa e ngaahi konga Tohi Tapú?

• Te tau fakaʻilongaʻi fēfē ʻa ʻetau Tohi Tapu ki he ako fakafoʻituituí?

• Ko e hā ʻoku mahuʻinga ai ʻa e fakalaulaulotó ʻi heʻetau ako ʻa e Folofola ʻa e ʻOtuá?

• Ko e hā ʻoku totonu ke tau fai ʻaki ʻa e meʻa kuo tau akó?