Fiefia ʻi he Moʻuí ʻo Taʻengata! Ngāueʻaki Ia ʻi Hoʻo Ngāue Fakamalangá

He fiefia ē ko kitautolu ʻi hono maʻu ha polosiua mo ha tohi foʻou ke faiʻaki ʻa e ako Tohi Tapú! ʻOku tau lotu ke tāpuakiʻi ʻe Sihova ʻetau ngaahi feinga ke ngaohi ʻa e kau ākonga tokolahi ange. (Māt. 28:18-20; 1 Kol. 3:6-9) ʻE fēfē haʻatau ngāueʻaki ʻa e meʻangāue foʻou ko ení?

Muimui ʻi he ngaahi fakahinohino ko ení ʻi hoʻo teuteu mo fakahoko ha ako Tohi Tapu, he koeʻuhí ko e Fiefia ʻi he Moʻuí ʻo Taʻengata! ko ha ako Tohi Tapu fetalanoaʻaki ia ʻoku fakahaaʻi ai ʻa e founga fakafaiako foʻou.a

• Lau ʻa e fakamatalá pea tali ʻa e ngaahi fehuʻí

• Lau ʻa e ngaahi konga Tohi Tapu ʻoku fakaʻilongaʻi ke “lau” pea tokoniʻi ʻa e tokotaha akó ke ʻiloʻi ʻa e founga ke ngāueʻaki ai iá

• Huluʻi pea lāulea ki he ngaahi vitioó ʻo ʻeke ha fehuʻi pē ʻoku ʻasi mai

• Feinga ke ʻosiki ha lēsoni ʻe taha ʻi he ako taki taha

ʻI he ngāue fakamalangá ʻuluaki tuʻuaki ʻa e polosiuá ke ʻilo pe ʻoku mahuʻingaʻia ʻa e tokotahá. (Sio ki he puha “Founga ke Tuʻuaki ʻa e Polosiua Fiefia ʻi he Moʻuí ʻo Taʻengata! ʻi he ʻUluaki ʻAʻahí.”) Kapau kuó mo ʻosiki ʻa e polosiuá pea ʻoku loto-lelei ʻa e tokotaha akó ke hokohoko atu ʻene akó, tuʻuaki leva ʻa e tohí pea kamata ʻi he lēsoni 04. Kapau ʻokú ke lolotonga ako mo ha tokotaha ʻi he tohi Akoʻi Maí pe ko e tohi Nofo Maʻu ʻi he ʻOfa ʻa e ʻOtuá, hiki leva ki ha lēsoni feʻungamālie ʻi he tohi Fiefia ʻi he Moʻuí ʻo Taʻengata!

SIO ʻI HE VITIŌ TALITALI LELEI KOE KI HOʻO AKO TOHI TAPÚ, PEA TALI LEVA ʻA E NGAAHI FEHUʻI KO ENÍ:

• Ko e hā ʻe ako ki ai ʻa e tokotaha akó ʻi he tohi foʻoú?

• Ko e hā ʻoku totonu ai ke ke huluʻi ʻa e vitiō ko ení ki ha tokotaha ako foʻou?

• Ko e hā ʻa e ngaahi taumuʻa ʻoku totonu ke ke fakalototoʻaʻi ʻa e tokotaha akó ke ne fokotuʻu mo aʻusiá?​—Sio ki he saati “Poini Tefito mo e Taumuʻa ki he Kupu Taki Taha”