MOʻUI KO HA KALISITIANE
Kau Tauhi-Sipi ʻOku Nau Ngāue ki he Lelei Maʻá e Kakai ʻa e ʻOtuá
Ko e kakai tokolahi ʻoku nau maʻu ʻa e vakai ʻikai lelei ki he faʻahinga ʻoku nau maʻu ʻa e mafaí. ʻOku tau mahinoʻi ʻa e ʻuhingá. ʻI he faai mai ʻa e hisitōliá kuo ngāuehalaʻaki ʻe he faʻahinga ʻo e tangatá honau mafaí ki he lelei pē maʻanautolu. (Mai. 7:3) He houngaʻia ē ko kitautolu ko e kau mātuʻa ʻi he fakatahaʻangá ʻoku teuʻi ke nau ngāueʻaki honau mafaí ki he lelei maʻá e kakai ʻa Sihová.—ʻĒseta 10:3; Māt. 20:25, 26.
ʻI he ʻikai hangē ko e kau maʻu mafai ʻi he māmani ko ení, ko e kau mātuʻá ʻoku nau kakapa atu ki he ngaahi tuʻunga fakaetauhí koeʻuhi ko ʻenau ʻofa kia Sihova mo ʻene kakaí. (Sione 21:16; 1 Pita 5:1-3) ʻI he malumalu ʻo e tataki ʻa Sīsuú, ko e kau tauhi-sipi ko ení ʻoku nau tokoniʻi ʻa e tokotaha malanga taki taha ke ne ongoʻi ʻokú ne kau ʻi he fāmili ʻo e kau lotu ʻa Sihová pea ke nofo ofi kia Sihova. ʻOku nau ngāue vave ke ʻoatu ʻa e tokoni fakalaumālie ki he fanga sipi ʻa Sihová pea ke tokoni ʻi he hoko ha fiemaʻu fakafaitoʻo fakavavevave pe ʻi he hoko ha fakatamaki. Kapau ʻokú ke fiemaʻu ha tokoni, fēfē ke ke tamuʻomuʻa ke fetuʻutaki ki ha mātuʻa ʻi hoʻo fakatahaʻangá?—Sēm. 5:14.
SIO ʻI HE VITIŌ KAU TAUHI-SIPI ʻOKU NAU TOKANGAʻI ʻA E TĀKANGÁ, PEA TALI LEVA ʻA E NGAAHI FEHUʻI KO ENÍ:
Naʻe anga-fēfē ʻa e maʻu ʻaonga ʻa Mariana mei he tokoni naʻe ʻoange ʻe he kau mātuʻá?
Naʻe anga-fēfē ʻa e maʻu ʻaonga ʻa Elias mei he tokoni naʻe ʻoange ʻe he kau mātuʻá?
ʻOku anga-fēfē hono tākiekina ʻe he ongo hokosia ko ení ʻa e anga hoʻo vakai ki he ngāue ʻoku fai ʻe he kau mātuʻá?