MOʻUI KO HA KALISITIANE

Tokoniʻi ʻa e Kakai Taʻelotú Ke Nau Hoko ʻo ʻIloʻi Honau Tokotaha-Fakatupú

Kuó ke toumoua nai ke faifakamoʻoni ki he kakai taʻelotú, ʻi he fakakaukau ngalingali heʻikai ke nau tali lelei? Kapau ko ia, ko e kakai taʻelotu tokolahi—kau ai ʻa e kau fakaʻikaiʻi-ʻOtuá—kuo nau hoko ko e Kau Fakamoʻoni ʻa Sihova. Ko e meʻa pē naʻa nau faʻa fiemaʻú ko ha kiʻi fakamoʻoni naʻe tokoni ke sivisiviʻi ʻa e ʻi ai moʻoni ʻa e ʻOtuá.—Loma 1:20; 10:14.

SIO ʻI HE VITIŌ MANATUʻI!—ʻOKU LAVA ʻA E KAU TAʻETUÍ KE NAU HOKO ʻO TUI!—KAKAI TAʻELOTU, PEA TALI LEVA ʻA E FEHUʻI KO ENÍ:

ʻOku anga-fēfē hono tokoniʻi koe ʻe he hokosia ʻa Tommaso ke maʻu ha vakai pau fekauʻaki mo e faifakamoʻoni ki he kakai taʻelotú?

Ko hoʻo talí

Founga hono fai iá

Kapau ʻoku pehē ʻe ha taha ʻoku ʻikai ke ne tui ki he ʻOtuá, hoko ʻo anga-lelei, fakapotopoto pea fakahāhā ʻa e mahuʻingaʻia loto-moʻoni ʻi heʻene ngaahi fakakaukau mo e ongoʻi ki he kaveingá. (2 Tīm. 2:24) Lāulea ki he ngaahi kaveinga ʻoku ngalingali ʻe fakamānako kiate iá. ʻOkú ne loto-lelei nai ke lāulea ki ha fakamoʻoni ʻa ia naʻá ne ueʻi ʻa e tokolahi ke nau tui ki he Tokotaha-Fakatupú? Kapau ko ia, ngāueʻaki ʻa e ʻū tohi mo e ʻū vitiō naʻe faʻu ʻo fakataumuʻa ki aí.

ʻI he kamatá, te ke ongoʻi manavasiʻi nai ʻi he fakakaukau atu ke vahevahe ʻa e moʻoní ki ha tokotaha ʻoku ʻikai tui ki he ʻOtuá. Fēfē ke kole tokoni ki ha tokotaha malanga taukei? ʻIkai ko ia pē, manatuʻi ʻe lava ke tokoniʻi kitautolu ʻe Sihova ke aʻu ki he loto ʻo e faʻahinga ʻoku hehema totonú—neongo kapau ko e fuofua taimí ʻoku ʻikai ke nau tui ʻokú ne ʻi ai moʻoni.—Ngā. 13:48.