Fehuʻi mei he Kau Lautohí

Ko e ngaahi ʻulungaanga pē ʻi he Kalētia 5:22, 23 ʻa e “fua ʻo e laumālié”?

ʻOku hiki ʻi he ongo veesi ko iá ʻa e ngaahi ʻulungaanga faka-Kalisitiane ʻe hiva: “Ko e fua ʻo e laumālié ko e ʻofa, fiefia, melino, kātaki, anga-lelei, lelei, tui, anga-malū, mapuleʻi-kita.” Ka, ʻoku ʻikai fiemaʻu ke tau vakai ki ai ko e ngaahi ʻulungaanga lelei pē ia ʻe lava ʻe he laumālie ʻo e ʻOtuá ʻo tokoniʻi kitautolu ke fakatupulekiná.

Fakatokangaʻi ʻa e meʻa naʻe hiki ʻe he ʻapositolo ko Paulá ʻi he ngaahi veesi ki muʻá: “Ko e ngaahi ngāue ʻa e kakanó . . . ko e fehokotaki fakasino taʻetaau, taʻemaʻa, faikovi taʻemīngao, tauhi ʻaitoli, fakahaʻele fakafaʻahikehe, fakafili, fekeʻikeʻi, meheka, ʻita tōlili, fekīhiaki, fakafaʻafaʻahi, muimui ʻi he akonaki ʻa e tangatá, loto-kovi, konā, ngaahi paati uatau, mo e ngaahi meʻa hangē ko ʻení.” (Kal. 5:19-21) Ko ia naʻe mei lava ke lave ʻa Paula ki he ngaahi meʻa kehe “ko e ngaahi ngāue ʻa e kakanó,” hangē ko ia ʻoku lave ki ai ʻi he Kolose 3:5. ʻI he tuʻunga meimei tatau, hili hono hiki ʻa e ngaahi ʻulungaanga lelei ʻe hivá, naʻá ne pehē: “ʻOku ʻikai ha lao ke ne taʻofi ʻa e ngaahi meʻa ko ʻení.” Ko ia naʻe ʻikai feinga ʻa Paula ke ne lisi ʻa e kotoa ʻo e ngaahi ʻulungaanga lelei ʻe lava ke tau fakatupulekina ʻi he tokoni ʻa e laumālie māʻoniʻoní.

ʻOku hā mahino eni ʻi heʻetau fakahoa ʻa e lisi ko ení mo e meʻa naʻe hiki ʻe Paula ki he fakatahaʻanga ʻi ʻEfesoó: “Ko e fua ʻo e māmá ʻoku ʻi ai ʻa e faʻahinga kotoa pē ʻo e leleí mo e māʻoniʻoní mo e moʻoní.” (ʻEf. 5: 8, 9) ʻIo ko e “lelei,” fakataha mo e māʻoniʻoní mo e moʻoní, ko e konga ia ʻo e “fua ʻo e māmá,” ka ko e toe tafaʻaki ia ʻo e “fua ʻo e laumālié.”

Pehē foki, naʻe ekinaki ʻa Paula kia Tīmote ke ne “tuli ki he māʻoniʻoní, anga-līʻoa fakaʻotuá, tuí, ʻofá, kātakí, mo e anga-maluú”—ko e ngaahi ʻulungaanga lelei ʻe ono. (1 Tīm. 6:11) Ko e ʻulungaanga pē ʻe fā ko ení (tui, ʻofa, anga-malū mo e kātaki) ʻoku lave ki ai ko e tafaʻaki ʻo e “fua ʻo e laumālié.” Kae kehe, naʻe loto foki ʻa Tīmote ke maʻu ʻa e tokoni ʻa e laumālié ke fakatupulekina ʻa e ongo ʻulungaanga kehe naʻe lave ki ai hení ʻa ia ko e māʻoniʻoni mo e anga-līʻoa fakaʻotua.—Fakafehoanaki mo e Kolose 3:12; 2 Pita 1:5-7.

Ko ia, ʻoku ʻikai ʻomai ʻi he Kalētia 5:22, 23 ha lisi kakato ʻo e ngaahi ʻulungaanga faka-Kalisitiané. ʻOku lava ke tokoniʻi kitautolu ʻe he laumālie ʻo e ʻOtuá ke fakatupulekina ʻa e tafaʻaki ʻe hiva ʻo e “fua ʻo e laumālié.” Ka ʻoku ʻi ai mo e ngaahi ʻulungaanga kehe ʻe lava ke fakatupulekina ʻi heʻetau hokohoko atu ke matuʻotuʻa faka-Kalisitiané pea “kofuʻaki ʻa e angaʻitangata foʻou ʻa ia naʻe fakatupu ʻo fakatatau ki he finangalo ʻo e ʻOtuá ʻi he māʻoniʻoni moʻoni mo e mateaki moʻoni.”—ʻEf. 4:24.