Naʻe Faitau ʻa e Kau ʻIsileli ʻo e Kuonga Muʻá​—Ko e Hā ʻOku ʻIkai Ke Tau Fai Pehē Aí?

“KAPAU ʻoku fakafisi ha taha ʻo kimoutolu ke faitau mo Falanisē pe ko ʻIngilani, ko kimoutolu kotoa kuo pau ke mou mate!” ko e kaikaila ia ʻa ha ʻōfisa Nasi ki ha kulupu ʻo e Kau Fakamoʻoni ʻa Sihová lolotonga ʻa e Tau II ʻa Māmaní. Neongo naʻe ʻi ai ha kau sōtia SS ʻosi fakamahafu naʻa nau tatali ofi mai, naʻe ʻikai foʻi ha taha ʻo hotau fanga tokouá. He loto-toʻa ē ko ia! Ko e faʻifaʻitakiʻanga ko ení ʻokú ne mātuʻaki fakamamafaʻi ʻa e vakai ʻoku tau maʻu ko e Kau Fakamoʻoni ʻa Sihova: ʻOku tau fakafisi ke kau ʻi he tau ʻa e māmani ko ení. Naʻa mo e taimi ʻoku fakamanamanaʻi ai ʻaki ʻa e maté, ʻoku tau fakafisi ke kau ʻi he ngaahi fakakikihi ʻa e māmani ko ení.

1. KO E KAKAI ʻA E ʻOTUÁ NAʻA NAU KAU KI HA PULEʻANGA PĒ TAHA

ʻI he kuohilí, naʻe fakatahatahaʻi ʻe Sihova ʻene kakaí ki ha puleʻanga pē ʻe taha​—ko ʻIsileli. Naʻá ne ui ʻa e kau ʻIsilelí ko ʻene “koloa makehe ʻi he ngaahi kakai kotoa pē.” (ʻEki. 19:5) Naʻe toe vaheʻi ʻe he ʻOtuá kiate kinautolu ha tofiʻa pau. Ko ia ʻi he taimi naʻe fekauʻi ai ʻe he ʻOtuá ʻa e kau ʻIsilelí ke nau faitau mo e ngaahi puleʻanga kehé, naʻe ʻikai ke nau faitau pe tāmateʻi honau kaungālotú.a

ʻI he ʻahó ni, ko e kau lotu moʻoní ʻoku nau haʻu “mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea.” (Fkh. 7:9) Kapau ʻe kau ʻa e kakai ʻa e ʻOtuá ʻi he taú, ʻe lava ke nau faitau​—pea aʻu ʻo tāmateʻi​—ʻa honau kaungālotú.

2. NAʻE FEKAUʻI ʻE SIHOVA ʻA E KAU ʻISILELÍ KE NAU ʻALU HE TAÚ

ʻI he kuohilí, naʻe fili ʻe Sihova ʻa e taimi mo e ʻuhinga naʻe fiemaʻu ai ke ʻalu ʻa e kau ʻIsilelí ʻi he taú. Ko e fakatātaá, naʻe fakahinohino ʻe he ʻOtuá ki he kau ʻIsilelí ke nau fakahoko ʻene fakamaau ki he kau Kēnaní, naʻa nau ʻiloa ʻi he lotu ki he fanga tēmenioó, fehokotaki fakasino taʻetaau mātuʻaki pangó mo e feilaulauʻaki ʻa e fānaú. Naʻe fekau ʻe Sihova ʻa e kau ʻIsilelí ke nau toʻo atu ʻa e tākiekina fulikivanu ko ení mei he fonua naʻá ne talaʻofa kiate kinautolú. (Liv. 18:24, 25) Hili ʻa e fakanofonofo ʻa e kau ʻIsilelí ʻi he Fonua ʻo e Talaʻofá, naʻe fakangofua ʻe he ʻOtuá ʻi he taimi ʻe niʻihi ke nau faitau ke maluʻi ʻa ʻIsileli mei he ngaahi filí. (2 Sām. 5:17-25) Neongo ia, naʻe ʻikai ha taimi naʻe fakaʻatā ai ʻe Sihova ki he kau ʻIsilelí ke nau fili pē ʻiate kinautolu ke faitau. ʻI heʻenau fai peheé, ko e olá naʻe faʻa fakatupu ʻauha.​—Nōm. 14:41-45; 2 Kal. 35:20-24.

ʻI he ʻahó ni, ʻoku ʻikai fakangofua ʻe Sihova ʻa e faʻahinga ʻo e tangatá ke nau ʻalu he taú. ʻOku faitau ʻa e ngaahi puleʻangá ke pouaki ʻa e lelei ʻa e tangatá kae ʻikai ko e lelei ʻa e ʻOtuá. Te nau faitau nai ke maʻu ha feituʻu lahi ange pe ke langaʻi hake ai honau ʻekonōmiká pe ʻi ha ʻuhinga fakapolitikale. Kae fēfē ʻa e faʻahinga ʻoku nau taukaveʻi ʻoku nau faitau ʻi he huafa ʻo e ʻOtuá ke maluʻi ʻenau lotú pe ke tāmateʻi ʻa e fili ʻo e ʻOtuá? Ko Sihova te ne maluʻi ʻene kau lotu moʻoní pea fakaʻauha hono ngaahi filí ʻi ha tau ʻi he kahaʻú​—ko e tau ʻo ʻĀmaketoné. (Fkh. 16:14, 16) ʻI he tau ko iá, ko e kau tau ʻa e ʻOtuá ʻe kau ki ai ʻa e kotoa ʻene kau tau fakahēvaní, ʻo ʻikai ko ʻene kau lotu fakaetangatá.​—Fkh. 19:11-15.

3. NAʻE FAKAHAOFI ʻE HE KAU ʻISILELÍ ʻA E FAʻAHINGA NAʻA NAU NGĀUEʻI ʻA E TUÍ

ʻI he kuohilí, naʻe faʻa fakahaaʻi ʻe he kau tau ʻIsilelí ʻa e meesi ki he faʻahinga naʻa nau fakahāhā ʻa e tui ki he ʻOtuá pea tāmateʻi ʻa e faʻahinga pē naʻe fakamāuʻi ʻe he ʻOtuá naʻe tuha ke tāmateʻí. Fakatokangaʻi ha fakatātā ʻe ua. Neongo naʻe fekau ʻe Sihova ke fakaʻauha ʻa Sielikō, naʻe fakahaofi ʻe he kau ʻIsilelí ʻa Lēhapi mo hono fāmilí koeʻuhi ko ʻene tuí. (Sios. 2:9-16; 6:16, 17) Ki mui ai, naʻe fakahaofi ʻa e kotoa ʻo Kipioné hili hono fakahāhā ʻe he kau Kipioné ʻa e manavahē-ʻOtuá.​—Sios. 9:3-9, 17-19.

ʻI he ʻahó ni, ko e ngaahi puleʻanga ʻoku nau kau ʻi he taú ʻoku ʻikai ke nau fakahaofi ʻa e faʻahinga ʻoku nau ngāueʻi ʻa e tuí. Pea ʻi he taimi ʻe niʻihi, ko e kau siviliane tonuhiá ʻoku tāmateʻi ʻi he ngaahi fepaki ʻa e ngaahi puleʻangá.

4. NAʻE PAU KE MUIMUI ʻA E KAU ʻISILELÍ KI HE NGAAHI LAO ʻA E ʻOTUÁ KI HE TAÚ

ʻI he kuohilí, naʻe fiemaʻu ʻe Sihova ki he kau sōtia ʻIsilelí ke nau faitau ʻo fakatatau ki heʻene ngaahi fakahinohinó. Ko e fakatātaá, ʻi he taimi ʻe niʻihi naʻe tala ange ʻe he ʻOtuá ke nau fakaaʻu atu ha “alea melino” ki ha kolo fakafepaki. (Teu. 20:10) Naʻe toe ʻamanekina ʻe Sihova ʻa e kau sōtia ʻIsilelí ke nau tauhi kinautolu mo honau ʻapitangá ke maʻa fakaesino mo fakaeʻulungaanga. (Teu. 23:9-14) Neongo ko e kau tau ʻa e ngaahi puleʻanga takatakaí naʻa nau faʻa tohotohoʻi ʻa e kakai fefine mei he ngaahi feituʻu naʻa nau ikunaʻí, naʻe tapui ʻe Sihova ʻa e kau ʻIsilelí mei haʻanau fai pehē. Ko hono moʻoní, naʻe ʻikai lava ke nau mali mo ha fefine pōpula kae ʻoua ke ʻosi ha māhina ʻe taha mei hono hamu ha kolo.​—Teu. 21:10-13.

ʻI he ʻahó ni, ko e lahi taha ʻo e ngaahi fonuá kuo nau fakamoʻoni ʻi ha ngaahi aleapau fakavahaʻapuleʻanga ke puleʻi ʻa e taú. Neongo ʻoku fakataumuʻa eni ke maluʻi ʻa e kau siviliané, ko e pangó, ʻoku faʻa maumauʻi ʻa e ngaahi laó.

5. NAʻE FAITAU ʻA E ʻOTUÁ MAʻA HONO PULEʻANGÁ

ʻI he kuohilí, naʻe faitau ʻa Sihova maʻá e kau ʻIsilelí, ʻo faʻa ʻoange kiate kinautolu ha ikuna fakaemana. Ko e fakatātaá, naʻe anga-fēfē hono tokoniʻi ʻe Sihova ʻa e kau ʻIsilelí ke ikunaʻi ʻa e kolo ko Sielikoó? ʻI he tataki ʻa Sihová, ʻi he “kailaʻaki [ʻe he kau ʻIsilelí] ha fuʻu kaila ʻo e taú, naʻe holofa ʻa e ʻaá,” ʻo ʻai ai ke faingofua ange ʻenau hamu ʻa e koló. (Sios. 6:20) Pea naʻe anga-fēfē ʻenau ikuna ʻi he faitau mo e kau ʻĀmolí? “Naʻe ʻai ʻe Sihova ke tō hifo ha fuʻu ʻuha-ʻaisi mei he langí kiate kinautolu . . . Ko hono moʻoní, naʻe tokolahi ange ʻa e mate ʻi he ʻuha-ʻaisí ʻi he mate tupu mei he heletā ʻa e kau ʻIsilelí.”​—Sios. 10:6-11.

KO E KAU KALISITIANE MOʻONÍ KO E KAU FAKAMELINO

Hangē ko ia kuo tau vakai ki aí, ko hotau tuʻunga ʻi he ʻaho ní ʻoku mātuʻaki kehe ia mei ʻIsileli ʻo e kuonga muʻá. Kae kehe, ko e ngaahi faikehekehe ko ení ʻoku ʻikai ko e ngaahi ʻuhinga pē ia ʻoku ʻikai ke tau ʻalu ai he taú. ʻOku ʻi ai mo e ngaahi ʻuhinga kehe. Ko e fakatātaá, naʻe tomuʻa tala ʻe he ʻOtuá ʻi he ngaahi ʻaho fakaʻosí, ko e faʻahinga ʻokú ne akoʻí “ʻe ʻikai te nau toe ako tau,” pe naʻa mo e kau ki ai. (ʻAi. 2:2-4) ʻIkai ko ia pē, naʻe pehē ʻe Kalaisi ko ʻene kau ākongá heʻikai ke nau hoko “ko ha konga . . . ʻo e māmaní”; heʻikai ke nau kau ʻi he ngaahi fepaki ʻa e māmaní.​—Sione 15:19.

Naʻe toe ekinaki ʻa Kalaisi ki hono kau muimuí ke nau toe fai ha meʻa lahi ange. Naʻá ne fakahinohino kiate kinautolu ke fakaʻehiʻehi mei he ngaahi tōʻonga ʻe taki atu ki he loto-mamahi, ʻita mo e tau. (Māt. 5:21, 22) ʻIkai ko ia pē, naʻá ne fakahinohino ki hono kau muimuí ke nau “fakamelino” pea ʻofa ki honau ngaahi filí.​—Māt. 5:9, 44.

Kae fēfē kitautolu tāutaha? ʻOku ngalingali, ʻoku ʻikai haʻatau holi ke kau ʻi ha tau, ka ʻoku ʻi ai nai ha fakaʻilonga ʻo e fakafili ʻi hotau lotó ʻe lava ke ne fakatupunga ha kē pe māvahevahe ʻi he fakatahaʻangá? Tau hokohoko atu ke ngāue ke toʻo ʻosi atu ha faʻahinga ongoʻi pehē ʻi loto ʻiate kitautolu.​—Sēm. 4:1, 11.

ʻI he ʻikai ke kau ʻi he fepaki ʻa e ngaahi puleʻangá, ʻoku tau pouaki ʻa e melinó mo e ʻofá ʻi hotau haʻohaʻongá. (Sione 13:34, 35) ʻOfa ke tau fakapapauʻi ke nofoʻaki tuʻu-ʻatā ʻi heʻetau fakatuʻotuʻa atu ki he ʻaho ʻe toʻo ʻosi atu ai ʻe Sihova ʻa e kotoa ʻo e taú ʻo taʻengata.​—Saame 46:9.