3 | Maʻu ʻAonga mei he Faʻifaʻitakiʻanga ʻi he Tohi Tapú

ʻOKU FAKAMATALA ʻA E TOHI TAPÚ . . . Fekauʻaki mo e kau tangata mo e kau fefine faitōnunga naʻa nau maʻu “ʻa e ngaahi ongo ʻo hangē pē ko kitautolú.”—SĒMISI 5:17.

Ko Hono ʻUhingá

Ko e ngaahi peesi ʻo e Tohi Tapú ʻoku fonu ʻi he ngaahi talanoa moʻoni fekauʻaki mo e kau tangata mo e kau fefine ʻa ia naʻa nau hokosia ha ngaahi ongoʻi kehekehe. ʻI heʻetau lau ʻenau ngaahi hokosiá, te tau ʻiloʻi nai ai ha tokotaha ʻi he Tohi Tapú ʻa ia ʻoku tau maʻu ha ongoʻi tatau mo ia.

Founga ʻe Tokoni Ai Ení

ʻOku tau fiemaʻu kotoa ke mahinoʻi kitautolu ʻe he niʻihi kehé. Ka ʻoku tautefito ʻa e moʻoni ení ʻi he taimi ʻoku tau fāinga ai mo e palopalema fakaʻatamaí. ʻI he taimi ʻoku tau lau ai ʻa e ngaahi hokosia ʻa e faʻahinga ʻi he Tohi Tapú, te tau ʻiloʻi nai ai mo mahinoʻi ʻenau ngaahi fakakaukaú mo ʻenau ongoʻí. Ko hono olá, ʻoku tau ʻiloʻi ai ʻoku ʻikai ko kitautolu pē ʻoku tau hokosia ʻa e mamahí pea ʻoku siʻi ange ai ʻetau ongoʻi tuēnoa ʻi he taimi ʻoku tau fekuki ai mo e loto-moʻuá mo e ngaahi ongoʻi fakahohaʻá.

ʻOku hiki ʻi he Tohi Tapú ʻa e ngaahi fakamatala ʻa e faʻahinga naʻa nau ongoʻi ʻoku ʻikai hanau tokoni pea siva ʻenau ʻamanakí. Kuo faifai ange peá ke ongoʻi, ‘Heʻikai pē lava ke u toe makātakiʻi ia’? Naʻe ongoʻi pehē ʻa Mōsese, pehē kia ʻIlaisiā mo Tēvita.—Nōmipa 11:14; 1 Tuʻi 19:4; Saame 55:4.
ʻOku talanoa ʻa e Tohi Tapú ki ha fefine ko ʻAna ʻa ia naʻá ne ongoʻi “mātuʻaki loto-mamahi” koeʻuhi naʻe ʻikai lava ke ne maʻu fānau pea naʻe lumaʻi anga-fakamamahi ia ʻe he uaifi ʻe taha hono husepānití.—1 Sāmiuela 1:6, 10.
ʻOku talanoa ʻa e Tohi Tapú ki ha tangata ko Siope ʻa ia ʻe lava ke tau mahinoʻi ʻene ongoʻí. Neongo ko ha tangata ia ʻo e tuí, naʻá ne tofanga ʻi ha mamahi fakaeongo lahi pea naʻe tuʻo taha ʻene pehē: “ʻOku ou fehiʻa ʻi heʻeku moʻuí; ʻoku ʻikai te u loto ke u kei moʻui atu.”—Siope 7:16.

ʻI he ako fekauʻaki mo e founga naʻe fekuki lavameʻa ai ʻa e faʻahinga ko eni ʻi he Tohi Tapú mo e sīpinga fakaefakakaukau taʻepaú, ko kitautolu foki ʻe lava ke tau maʻu ʻa e mālohi ʻoku fiemaʻú ke fekuki mo ʻetau ngaahi mamahí.

Tokoni ʻa e Tohi Tapú Kevin

Anga Hono Uesia Au ʻe he ʻĀvanga Femaleleakí

“Naʻe ʻiloʻi ʻoku ou maʻu ʻa e ʻāvanga femaleleakí ʻi heʻeku taʻu 40 tupu lahí. ʻOku ʻi ai ʻa e ngaahi taimi ʻoku ou ongoʻi ʻe lava ke u fekuki mo ha meʻa pē ʻoku ou fepaki mo ia ʻi he moʻuí. Ka ʻi he taimi ʻe niʻihi, ʻoku ou ongoʻi ʻoku ʻikai ke u toe fie moʻui.”

Founga Hono Tokoniʻi Au ʻe he Tohi Tapú

“Ko ha tokotaha ʻi he Tohi Tapú ʻoku lava ke u mahinoʻi ko e ʻapositolo ko Pitá. Naʻá ne fai ʻa e ngaahi fehālaaki naʻe ʻai ai ke ne ongoʻi ʻoku ʻikai hano mahuʻinga. Ka ʻi he ʻikai nōfoʻi ʻi he founga fakakaukau ko iá, naʻe kumi ʻa Pita ki he tokoni ʻa e ngaahi kaumeʻa naʻa nau tokanga kiate iá. ʻI he taimi ʻoku ou hokosia ai ha ʻaho kovi koeʻuhi ko ʻeku fāinga mo e ʻāvanga femaleleakí, ko ʻeku ngaahi taʻehaohaoá ʻe lava ke ne lōmekina au pea ʻai ke u ongoʻi ʻoku ʻikai haku mahuʻinga. Hangē ko Pitá, kuó u ako ke feinga ke nofo ofi ki hoku ngaahi kaumeʻa ʻoku nau loto ke tokoniʻi au ke ngaʻunu ai pē ki muʻa ʻeku moʻuí.

“Ko ha toe tokotaha ʻi he Tohi Tapú ʻa ia naʻe hoko ko ha fakafiemālie lahi kiate au ko Tuʻi Tēvita. Naʻá ne faʻa ongoʻi loto-mafasia fekauʻaki mo hono tuʻungá pea fakaʻiseʻisa ʻi heʻene ngaahi fehālaaki ʻi he kuohilí. ʻOku ou mahinoʻi ʻene ongoʻí koeʻuhí ʻi he taimi ʻe niʻihi ʻoku ou fai pe leaʻaki ʻa e ngaahi meʻa ʻoku ou fakaʻiseʻisa ai. ʻOku fakafiemālie kiate au ʻa e ngaahi lea ʻa Tēvita ʻi he Saame 51. ʻI he veesi 3, ʻoku pehē ʻe Tēvita: ‘ʻOku ou ʻiloʻi lelei ʻa ʻeku faihalá, pea ʻoku ʻi muʻa maʻu pē ʻiate au ʻa ʻeku angahalá.’ ʻOku fakamatalaʻi lelei heni ʻa e anga ʻeku ongoʻí ʻi he ngaahi mōmeniti faingataʻa taha ʻeku moʻuí, he ʻe lava ke faingataʻa ke fakakaukau pau fekauʻaki mo au tonu. Ka ʻoku ou toe mahinoʻi ʻa e ngaahi lea ʻa Tēvita ʻi he veesi 10: ‘ʻE ʻOtua, fakatupu ʻiate au ha loto-maʻa, pea ʻai kiate au ha laumālie foʻou, ha laumālie ʻoku tuʻu maʻu.’ ʻOku ou fai ha kōlenga meimei tatau ki he ʻOtuá ke ne tokoniʻi au ke u maʻu ha ongoʻi pau fekauʻaki mo au tonu. Fakaʻosí, ʻoku ʻomai ʻe he veesi 17 kiate au ha fakafiemālie. ʻOku pehē ai: ‘Ko ha loto-mafesi mo lavea, ʻe ʻOtua, ʻe ʻikai te ke talitekeʻi.’ ʻOku fakapapauʻi mai ʻe he veesi ko ení ʻoku ʻofa ʻa e ʻOtuá ʻiate au.

“ʻI he tokangataha ki he ngaahi faʻifaʻitakiʻanga ʻi he Tohi Tapú pea mo e meʻa kuo foaki mai ʻe he ʻOtuá kiate au ʻi he taimi ní, ʻoku fakaivimālohiʻi ai ʻeku ʻamanaki ki he kahaʻú. Ko e ngaahi talaʻofa ʻi he Tohi Tapú ʻoku hoko ʻo moʻoni kiate au pea ʻoku tokoni moʻoni ia ke u hokohoko atu.”