2 | “Fakafiemālie mei he Folofolá”

MEʻA ʻOKU LEAʻAKI ʻE HE TOHI TAPÚ: “Ko e ngaahi meʻa kotoa pē naʻe tohi ʻi muʻá naʻe tohi ko hotau fakahinohino, koeʻuhí ke tau lava fakafou ʻi heʻetau kātakí pea fakafou ʻi he fakafiemālie mei he Folofolá ke tau maʻu ai ha ʻamanaki.”—LOMA 15:4.

Ko Hono ʻUhingá

ʻOku maʻu ʻi he Tohi Tapú ʻa e ngaahi fakakaukau fakafiemālie ʻe lava ke ne ʻomai kiate kitautolu ʻa e mālohi mo e kātaki ʻoku fiemaʻu ke tau fekuki ai mo e ngaahi sīpinga fakaefakakaukau taʻepaú. Ko e pōpoaki ʻi he Tohi Tapú ʻokú ne ʻomai foki kiate kitautolu ʻa e ʻamanaki ʻe vavé ni ke hoko ʻa e mamahi fakaeongó ko ha meʻa ʻi he kuohilí.

Founga ʻe Tokoni Ai Ení

ʻOku tau fekuki kotoa mo e ngaahi ongoʻi mamahi ʻi he taimi ʻe niʻihi; ka ko e faʻahinga ʻoku nau tofanga ʻi he loto-mafasiá pe loto-tailiilí ʻoku nau fāinga fakaʻaho nai mo e ngaahi ongoʻi mamahi fakaeongo hokohoko. ʻE lava fēfē ke tokoni ʻa e Tohi Tapú?

ʻOku tokonaki mai ʻi he Tohi Tapú ʻa e ngaahi fakakaukau pau ʻe lava ke fetongi ʻaki ʻa e ngaahi fakakaukau taʻepaú. (Filipai 4:8) ʻOku lava ke fakafonu ai hotau ʻatamaí ʻaki ʻa e ngaahi fakakaukau fakafiemālie mo fakanonga ʻa ia ʻe tokoniʻi ai kitautolu ke mapuleʻi ʻetau ngaahi ongoʻí.—Saame 94:18, 19.
ʻE lava ke tokoniʻi kitautolu ʻe he Tohi Tapú ke fakafepakiʻi ʻa e fakakaukau ʻo pehē ʻoku ʻikai hatau mahuʻinga.—Luke 12:6, 7.
ʻOku fakapapauʻi mai kiate kitautolu ʻe he ngaahi veesi Tohi Tapu lahi ʻoku ʻikai ke tau tuēnoa pea ko e ʻOtuá, ʻa hotau Tokotaha-Fakatupú, ʻokú ne mahinoʻi kakato ʻetau ngaahi ongoʻí.—Saame 34:18; 1 Sione 3:19, 20.
ʻOku talaʻofa mai ʻe he Tohi Tapú ko e ʻOtuá te ne fakangata ʻa e ngaahi manatu tamakí. (ʻAisea 65:17; Fakahā 21:4) ʻI he taimi ʻoku tau fāinga ai mo ha ngaahi fakakaukau mo e ongoʻi tailiili, te tau ʻiloʻi ko e talaʻofa ko ení te ne ʻomai kiate kitautolu ʻa e mālohi ke hokohoko atu.

Tokoni ʻa e Tohi Tapú Jessica

Anga Hono Uesia Au ʻe he Loto-Mafasiá

“ʻI heʻeku taʻu 25, naʻe kamata ke u loto-puna tamaki pea naʻe ʻiloʻi naʻá ku maʻu ʻa e loto-mafasia tōtuʻá. Naʻe lōmekina au ʻe he ngaahi manatu tamaki ki he kuohilí. Naʻe tokoniʻi au ʻe he kau toketaá ke mahinoʻi ko ʻeku loto-mafasiá naʻe felāveʻi ia mo e ngaahi sīpinga fakaefakakaukau taʻepau ʻa ia naʻe fakatupunga ʻe he ngaahi meʻa fakamamahi naʻe hoko ʻi heʻeku moʻuí. Tānaki atu ki he faitoʻo naʻá ku ngāueʻakí, naʻe fiemaʻu ke u sio toketā ke tokoniʻi au ke ʻiloʻi pea fakatonutonu ʻa e ngaahi sīpinga fakaefakakaukau ʻikai leleí.”

Founga Hono Tokoniʻi Au ʻe he Tohi Tapú

“ʻI he ngaahi mōmeniti faingataʻa taha ʻo ʻeku loto-mafasiá, naʻá ku hokosia ʻa e ngaahi loto-puna tamaki, loto-moʻua tōtuʻa, pea mo e taʻemamohe. ʻI he poʻulí naʻe faʻa felēleaki ʻeku ngaahi fakakaukau fakahohaʻá ʻo ne lōmekina au. Hangē ko ia ʻoku fakamatalaʻi ʻi he Saame 94:19, ko e ʻOtuá ʻoku lava ke ne fakafiemālieʻi mo fakanonga kitautolu ʻi he taimi ʻoku lōmekina ai kitautolu ʻe he loto-moʻuá. Ko ia naʻá ku tuku ʻeku Tohi Tapú mo ha pepa ʻoku hiki ai ʻa e ngaahi konga Tohi Tapu fakalototoʻa ʻo ofi ki hoku mohengá. ʻI he ʻikai lava ke u mohé, te u lau ha niʻihi ʻo e ngaahi veesi Tohi Tapú, ʻo fakaʻatā ai ʻa e fakakaukau ʻa e ʻOtuá ke ne fakafiemālieʻi au.

“ʻOku fakalototoʻaʻi kitautolu ʻe he Tohi Tapú ke tau fulihi ʻa e ngaahi fakakaukau ʻoku fepaki mo e meʻa ʻoku tau ʻiloʻi fekauʻaki mo e ʻOtuá. ʻI he kuohilí, naʻá ku tuipau naʻe ʻikai haku mahuʻinga, ʻikai ʻofaʻi au peá u ongoʻi taʻeʻaonga. Ka kuó u ako ko e ngaahi tui ko iá ʻoku fepaki moʻoni ia mo e Tohi Tapú, ʻa ia ʻoku fakahaaʻi ai ʻa e ʻOtuá ko ha Tamai ʻofa mo manavaʻofa ʻokú ne tokanga mai kiate kitautolu tāutaha. Naʻe faai atu pē ʻo u mapuleʻi ʻeku ngaahi fakakaukaú kae ʻikai fakaʻatā ʻeku ngaahi fakakaukaú ke ne puleʻi au. Kuó u ako ke vakai kiate au ʻo hangē ko e vakai mai ʻa e ʻOtuá. Naʻe hoko eni ko ha sitepu mahuʻinga ke u holoki ai ʻa e vakai taʻepau naʻá ku maʻu fekauʻaki mo au tonú.

“ʻOku ou fakatuʻotuʻa atu ki he taimi ʻe mole atu ai ʻa e ngaahi manatu tamakí mo e ngaahi sīpinga fakaefakakaukau ʻikai lelei kotoa pē. ʻI hono ʻiloʻi ko e puke fakaʻatamaí ʻe hoko ia ko ha meʻa ʻi he kuohilí ʻokú ne ʻomai kiate au ʻa e mālohi ke fekuki mo hoku ngaahi fakangatangata ʻi he taimi ní pehē foki mo ha ʻamanaki fakaofo ki he kahaʻú ʻi he taimi ʻe ngata ai ʻeku faitau mo e loto-mafasiá.”