Tonú mo e Halá: Ko ha Fili Kuo Pau Ke Ke Fai
Ko e ngaahi tuʻunga fakaeʻulungaanga ʻoku tau fili ke moʻuiʻakí te ne tākiekina lahi ʻa e ikuʻanga ʻetau moʻuí. ʻOku ʻiloʻi ia ʻe Sihova ko e ʻOtuá. Ko e ʻuhinga ʻeni ʻokú ne fiemaʻu ai ke tau moʻui ʻo fakatatau ki heʻene ngaahi tuʻungá.
ʻOku loto ʻa Sihova ke tau maʻu ha moʻui nonga mo fiefia.
“Ko au Sihova, ko ho ʻOtuá, ʻa e Tokotaha ʻokú ne akoʻi koe ke ke maʻu ʻaonga aí, ʻa e Tokotaha ʻokú ne tataki koe ʻi he hala ʻoku totonu ke ke fou aí. Pehē ange mai te ke tokanga ki heʻeku ngaahi tuʻutuʻuní! ʻE hoko leva ai ʻa hoʻo nongá ʻo hangē ko ha vaitafé pea ko hoʻo māʻoniʻoní ʻe hangē ko e ngaahi peau ʻo e tahí.”—ʻAisea 48:17, 18.
ʻI hono tuʻunga ko hotau Tokotaha-Fakatupú, ʻoku ʻiloʻi ʻe he ʻOtuá ʻa e founga lelei taha ʻoku totonu ke tau moʻui aí. ʻOkú ne fakaafe mai ke tau muimui ki heʻene tatakí koeʻuhí ʻe lelei pē ia maʻa kitautolu. ʻI he taimi ʻoku tau muimui ai ki he ngaahi fekau ʻa e ʻOtuá, heʻikai fiemaʻu ke tau fifili pe ʻe ola lelei koā ʻa e fili ʻoku tau faí. Te tau fai maʻu pē ʻa e fili totonú, ʻa e fili ʻe taki atu ki he nongá mo e fiefiá.
ʻOku ʻikai ke kole mai ʻe Sihova ke tau fai ʻa e meʻa ʻoku taʻemalavá.
“Ko e fekau ko eni ʻoku ou fekauʻi atu kiate koe he ʻaho ní ʻoku ʻikai ke fuʻu faingataʻa kiate koe, pe ʻikai lava ke ke aʻu ki ai.”—Teutalōnome 30:11.
ʻE fiemaʻu nai ke liliu ʻa e anga ʻetau fakakaukaú mo e tōʻongá ke moʻui ʻo fakatatau ki he ngaahi tuʻunga fakaeʻulungaanga ʻa e ʻOtuá. Kae kehe, ʻoku ʻikai ke kole mai ʻe Sihova ha meʻa lahi meiate kitautolu. He ko ē, ʻi hono tuʻunga ko hotau Tokotaha-Fakatupú, ʻokú ne ʻiloʻi ʻa e meʻa ʻoku tau malava ke faí. Pea ʻi heʻetau hoko ʻo ʻiloʻi ʻa Sihová, te tau sio ai “ko ʻene ngaahi fekaú ʻoku ʻikai ke fakamafasia.”—1 Sione 5:3.
ʻOku talaʻofa ʻe Sihova ke tokoniʻi ʻa e faʻahinga ʻoku nau fili ke moʻui ʻo fakatatau ki heʻene ngaahi tuʻungá.
“Ko au Sihova ko ho ʻOtuá, ʻoku ou puke ho nima toʻomataʻú, ʻa e Tokotaha ʻoku lea atu kiate koe, ‘ʻOua ʻe ilifia. Te u tokoniʻi koe.’”—ʻAisea 41:13.
ʻE lava ke tau moʻuiʻaki ʻa e ngaahi tuʻunga fakaeʻulungaanga ʻa e ʻOtuá koeʻuhi te ne tokoniʻi kitautolu. ʻE lava ke ne tokoniʻi kitautolu fakafou ʻi heʻene Folofolá, ʻa e Tohi Tapú, ʻa ia ʻoku ʻomai ai ʻa e fakalototoʻa mo e ʻamanaki.
Ko e laui miliona ʻo e kakai takatakai he māmaní kuo nau ʻiloʻi ko e moʻui ʻo fakatatau ki he ngaahi tuʻunga Fakatohitapú kuó ne fakaleleiʻi ʻenau moʻuí. Fēfē ke ke ako lahi ange fekauʻaki mo e faleʻi lelei ʻoku ʻomai ʻi he Tohi Tapú? ʻE lava ke ke kamata ʻaki hono vakaiʻi ʻa e polosiua Fakatohitapu Fiefia ʻi he Moʻuí ʻo Taʻengata! ʻa ia ʻoku ala maʻu taʻetotongi ʻi he jw.org. ʻOku maʻu ai ʻa e ngaahi lēsoni ko ení:
ʻE Lava Fēfē ke Tokoniʻi Koe ʻe he Tohi Tapú?
ʻOku ʻOmai ʻe he Tohi Tapú ʻa e ʻAmanaki
ʻE Lava Ke Ke Falala ki he Tohi Tapú?
ʻI hoʻo sivisiviʻi ʻa e Folofola ʻa e ʻOtuá, ʻa e Tohi Tapú, te ke ʻiloʻi ʻoku ʻikai ke ʻolokuonga ia; ʻoku “falalaʻanga maʻu pē ia, ʻi he taimí ni pea taʻengata.” (Saame 111:8) Ko e muimui ki he ngaahi tuʻunga fakaeʻulungaanga ʻoku maʻu ʻi he Tohi Tapú ʻa e founga lelei taha ke tau moʻui aí. Kae kehe, heʻikai ke fakamālohiʻi kitautolu ʻe he ʻOtuá ke tau fai pehē. (Teutalōnome 30:19, 20; Siosiua 24:15) Ko ha fili ia kuo pau ke fai ʻe kitautolu taki taha.