Maʻu ʻa e Melinó Neongo ʻa e Taú mo e Fakamālohí
“Ki muʻa ke ako ʻa e Tohi Tapú,” ko e lea ia ʻa Gary, ʻa ia naʻá ne ngāue fakakautau ki muʻa, “Naʻe ʻikai ʻaupito ke u mahinoʻi ʻa e ʻuhinga naʻe lahi fau ai ʻa e anga-fakamamahí, fakamaau taʻetotonú mo e faingataʻá ʻi he māmaní. Ka ʻoku ou maʻu he taimí ni ʻa e nonga ʻo e ʻatamaí. ʻOku ou ʻiloʻi ʻe ʻai ʻe Sihova ko e ʻOtuá ʻa e māmaní ko ha feituʻu malu.”
ʻOku ʻikai ko Gary pē ʻokú ne maʻu ʻa e ongoʻi pehení. Fakakaukau ki he founga kuo tokoniʻi ai ʻe he Tohi Tapú ʻa e niʻihi kehé.
MEʻA ʻOKU LEAʻAKI ʻE HE TOHI TAPÚ: “Ko koe, ʻe Sihova, ʻokú ke lelei mo mateuteu ke fakamolemole.”—Saame 86:5.
FOUNGA ʻENE TOKONÍ: “ʻOku fakapapauʻi mai ʻe he veesi ko ení kiate au ko Sihová ʻoku mohu meesi. ʻOku ou ʻiloʻi ʻokú ne loto-lelei ke fakamolemoleʻi ʻa e meʻa kotoa naʻá ku fai ʻi he kuohilí ʻi he taimi naʻá ku kau ai he taú.”—Wilmar, Kolomupia.
MEʻA ʻOKU LEAʻAKI ʻE HE TOHI TAPÚ: “ʻOku ou fakatupu ha ngaahi langi foʻou mo ha māmani foʻou; pea ʻe ʻikai toe manatua ʻa e ngaahi meʻa muʻá, pea ʻe ʻikai ke ʻalu hake ia ʻi he lotó.”—ʻAisea 65:17.
FOUNGA ʻENE TOKONÍ: “ʻOku ou fāinga mo e kulukia tamakí mo e loto-mafasiá koeʻuhi ko e ngaahi meʻa naʻá ku hokosia ʻi he taú. Ka ʻoku fakamanatu mai ʻe he konga Tohi Tapu ko ení ʻoku vavé ni ke fakasīlongoʻi ʻe Sihova ʻeku ngaahi fakakaukau hohaʻatuʻú pea fakangata ʻa e ngaahi manatu tamaki ʻoku ou maʻú. Heʻikai ke nau toe nōfoʻi ʻi hoku ʻatamaí pe lotó. He meʻaʻofa ē ko ia!”—Zafirah, ʻAmelika.
MEʻA ʻOKU LEAʻAKI ʻE HE TOHI TAPÚ: “ʻI hono ngaahi ʻahó ʻe tupu ʻāfaʻafa ai ʻa e māʻoniʻoní, pea ko e melinó ʻe hulu fau kae ʻoua kuo ʻikai ke toe ʻi ai ʻa e māhiná.”—Saame 72:7.
FOUNGA ʻENE TOKONÍ: “ʻOku ou faʻa fakakaukau fekauʻaki mo e ngaahi lea ko iá. ʻOku vavé ni ke mole atu ʻa e ngaahi meʻa fakalilifu ʻoku hoko ʻi he taú, pea ʻe ʻikai fiemaʻu ke tau toe hohaʻa fekauʻaki mo e tuʻunga malu hotau ngaahi ʻofaʻangá.”—Oleksandra, ʻIukalaine.
MEʻA ʻOKU LEAʻAKI ʻE HE TOHI TAPÚ: “ʻE moʻui ʻa hoʻo kau maté. . . . ʻĀ hake ʻo kaila fiefia, ʻa kimoutolu kau nofo ʻi he efú!”—ʻAisea 26:19.
FOUNGA ʻENE TOKONÍ: “Naʻe tāmateʻi ʻa e meimei kotoa hoku fāmilí lolotonga ʻa e fakaʻauha fakafaʻahinga ʻa e kau Tutisií. Ka ʻoku fakapapauʻi mai ʻe he veesi ko ení kiate au te u toe sio kiate kinautolu. ʻOku ou fakatuʻotuʻa atu ke fanongo ki honau ngaahi leʻo fiefiá ʻi he taimi ʻe fokotuʻu mai ai kinautolú!”—Marie, Luanitā.
MEʻA ʻOKU LEAʻAKI ʻE HE TOHI TAPÚ: “ʻOku toe siʻi pē, pea ʻe ʻikai toe ʻi ai ʻa e kau fulikivanú . . . Ka ko e anga-vaivaí te nau maʻu ʻa e māmaní, pea te nau maʻu ʻa e fiefia lahi ʻi he melino hulu fau.”—Saame 37:10, 11.
FOUNGA ʻENE TOKONÍ: “Neongo kuo ʻikai ke toe fai ha tau, ʻoku kei ʻi ai pē ʻa e fakamaau taʻetotonú mo e kakai koví. Ko e veesi Tohi Tapu ko ení kuo tautefito ʻene fakaivia aú. ʻOku ʻafioʻi ʻe Sihova ʻa e meʻa kotoa pea ʻokú ne mahinoʻi hoku tuʻungá. ʻOkú ne talaʻofa ʻoku vavé ni ke fakangata ʻa e faingataʻa kotoa pea ʻe ʻikai ke toe manatua.”—Daler, Tasikisitani.
Ko e faʻahinga ʻoku lave ki ai ʻi he makasini ko ení ʻoku nau kau ʻi he laui miliona ʻo e Kau Fakamoʻoni ʻa Sihova kuo tokoniʻi kinautolu ʻe he Tohi Tapú ke maʻu ʻa e nongá. Kuo nau ako ʻa e founga ke ikuʻi ai ʻa e ngaahi tāufehiʻa fakamatakali, fakafonua, fakafaʻahinga mo e fakatāutahá. (ʻEfesō 4:31, 32) Ko e Kau Fakamoʻoni ʻa Sihová ʻoku nau tuʻu-ʻatā fakapolitikale pea ʻoku nau fakafisi ke kau ʻi he anga-fakamālohí.—Sione 18:36.
ʻOku toe maʻu ʻe he Kau Fakamoʻoni ʻa Sihová ʻa e poupou mei honau fetokouaʻaki anga-ʻofa ʻi māmani lahí. (Sione 13:35) Ko e fakatātaá, ko Oleksandra, naʻe lave ki ai ki muʻá, naʻe pau ke ne hola mo hono tokouá ki ha fonua ʻe taha koeʻuhi ko e taú. ʻOkú ne pehē: “ʻI heʻema kolosi ʻi he kauʻāfonuá, naʻá ma sio ʻi he taimi pē ko iá ki he Kau Fakamoʻoni fakalotofonuá naʻa nau ʻi ai ke talitali kimaua. Ko ʻenau poupoú naʻe tokoniʻi ai kimaua ke feʻunuʻaki ki he nofo ʻi ha fonua foʻou ko ha ongo kumi hūfanga.”
ʻOku mau fakaafeʻi loto-māfana koe ke kau fakataha mo kimautolu ʻi heʻemau ngaahi fakatahá ʻa ia ʻoku mau ako ai ʻa e pōpoaki ʻo e melino ʻa e Tohi Tapú pea mo e founga ke ngāueʻaki ai iá. ʻAʻahi ki he jw.org ke kumi ki ha feituʻu ʻoku ofi kiate koé pe ke kole ha ako Tohi Tapu fetalanoaʻaki taʻetotongi mo ha taha ʻo e Kau Fakamoʻoni ʻa Sihová, ʻo ngāueʻaki ʻa e tohi Fiefia ʻi he Moʻuí ʻo Taʻengata!