Tuʻunga Fakalilifu ʻo e Taú
Ko e ngaahi meʻa siʻi pē ʻokú ne uesia ʻa e kakaí ʻo lahi ange ʻi he taú mo e fetāʻaki anga-fakamālohí. Ko e kau sōtiá mo e kakai siviliane takatakai ʻi he māmaní ʻoku nau hokosia tonu ʻa e ngaahi nunuʻa fakamamahí.
KAU SŌTIA
“Ko e ngaahi meʻa fakalilifú—hangē ko e lavea lahi pe maté—ʻoku hoko takatakai ʻiate koe. ʻOku ʻi ai maʻu pē ʻa e ongoʻi taʻepaú.”—Gary, Pilitānia.
“Naʻe tau ha mahafu ʻi hoku tuʻá mo hoku fofongá, pea naʻá ku sio ki hono tāmateʻi ʻo e tokolahi, kau ai ʻa e fānaú mo e kau taʻumotuʻá. ʻOku ʻai koe ʻe he taú ke ke ongonoa.”—Wilmar, Kolomupia.
“ʻI hono fanaʻi ha taha ʻi muʻa ʻiate koe, ʻoku ʻikai pē ke toe matoʻo ʻa e foʻi ʻata ko iá. ʻOkú ke ongona ʻa e kaikailá mo e toʻé. ʻOku ʻikai ʻaupito mangalo ʻiate koe ʻa e tokotaha ko iá.”—Zafirah, ʻAmelika.
KAKAI SIVILIANÉ
“Naʻá ku ongoʻi heʻikai ʻaupito lava ke u toe fiefia. ʻOkú ke manavahē telia hoʻo moʻuí, ka ko e toe ʻamo ange aí, ʻokú ke manavahē telia ʻa e moʻui ʻa ho fāmilí mo e kaungāmeʻá.”—Oleksandra, ʻIukalaine.
“ʻOku fakamanavahē ke tuʻu laine ke maʻu ha meʻakai mei he 2:00 hengihengi ʻo aʻu ki he 11:00 poʻuli, mo fakaongoongo pē naʻa tau ha foʻi mahafu ʻia koe.”—Daler, Tasikisitani.
“Naʻe mole ʻeku ongo mātuʻá ʻi he taú. Naʻá ku hoko ai ko ha paea ʻo ʻikai ha taha ke ne fakafiemālieʻi pe tokangaʻi au.”—Marie, Luanitā.
Neongo ʻa e ngaahi nunuʻa fakamamahi ʻo e taú, ko e faʻahinga naʻe lave ki ai ʻi ʻolungá kuo nau maʻu ʻa e nongá. Kae mahulu atu aí, ʻoku nau tuipau ko e tau mo e anga-fakamālohi kotoa pē ʻoku vavé ni ke ngata. Ko e ʻīsiu ʻo e Taua Leʻo ko ení te ne ngāueʻaki ʻa e Tohi Tapú ke fakamatalaʻi ʻa e founga ʻe fakahoko ai iá.