Mēmipa Foʻou ʻe Toko Ua ʻo e Kulupu Pulé

ʻI ʻOKATOPA 5, 2024, naʻe fai ha fanongonongo makehe ʻi he fakataha fakataʻú: Ko Tokoua Jody Jedele mo Jacob Rumph kuo fakanofo ke na hoko ko ha mēmipa ʻo e Kulupu Pule ʻo e Kau Fakamoʻoni ʻa Sihová. Ko e ongo tokouá kuó na ngāue faitōnunga kia Sihova ʻi ha laui taʻu.

Ko Tokoua Jedele naʻe fanauʻi ʻi Missouri, ʻAmelika pea naʻe ʻohake ia ʻi he moʻoní. Naʻe nofo hono fāmilí ʻo ofi ki ha feituʻu naʻe tātātaha ke ngāueʻi. Ko ia naʻá ne fetaulaki mo e fanga tokoua mei he puipuituʻa kehekehe ʻa ia naʻa nau ʻaʻahi atu ke tokoni ki hono malangaʻi ʻa e ongoongo leleí. Naʻe maongo lahi kiate ia ʻenau ʻofá mo e fāʻūtahá. Naʻá ne papitaiso ʻi hono taʻu hongofulu tupu siʻí, ʻi ʻOkatopa 15, 1983. Naʻá ne fiefia ʻi he ngāue fakafaifekaú, pea ʻi heʻene ʻosi mei he kolisí, naʻá ne kamata tāimuʻa tuʻumaʻu ʻi Sepitema 1989.

ʻI he kei siʻi ʻa Tokoua Jedele, naʻe ʻave ia ʻe heʻene ongo mātuʻá mo hono tuofefiné ke ʻaʻahi ki Pēteli. Naʻe ueʻi ʻe he ngaahi ʻaʻahi ko ení kinaua ke fokotuʻu ʻa e ngāue Pētelí ko ʻena taumuʻa—ʻa ia naʻá na fakatou aʻusia ia. Naʻe aʻu ʻa Tokoua Jedele ki he Pēteli ʻi Wallkill ʻi Sepitema 1990. Naʻá ne fuofua ngāue ʻi he Potungāue Fakamaʻá pea ki mui ai ʻi he Potungāue Fakafaitoʻó.

ʻI he taimi ko iá, naʻe tupulaki ʻa e ngaahi fakatahaʻanga lea faka-Sipeini ofi maí pea fiemaʻu ʻa e fanga tokoua. Ko ia naʻe kau ʻa Tokoua Jedele ki ha fakatahaʻanga ai ʻe taha pea kamata ako lea faka-Sipeini. Taimi nounou mei ai, naʻá ne fetaulaki mo Damaris, ko ha tuofefine naʻe tāimuʻa ʻi he sēketi tatau. Faai atu pē, naʻá na mali, peá ne kau fakataha mo ia ʻi he ngāue ʻi Pētelí.

ʻI he 2005 naʻá na mavahe mei Pēteli ke tokangaʻi ʻena ongo mātuʻa faitōnungá. ʻI he vahaʻa taimi ko iá, naʻá na tāimuʻa tuʻumaʻu. Naʻe tokoni ʻa Tokoua Jedele ʻi he faiako ʻi he Ako Ngāue Tāimuʻá, pea naʻá ne ngāue ʻi he Kōmiti Fetuʻutaki Fakafalemahaki fakalotofonuá mo e Kōmiti Langa Fakafeituʻú.

ʻI he 2013, naʻe toe fakaafeʻi ʻa Tokoua mo Tuofefine Jedele ki Pēteli ki he poloseki langa ʻi Warwick. Talu mei ai, kuó na toe ngāue ʻi Patterson mo Wallkill. Kuo ngāue ʻa Tokoua Jedele ʻi he Potungāue Tisaini/Langa Fakalotofonuá pea ʻi he ʻUluʻi Potungāue Maʻuʻanga Fakamatala Fakafalemahakí. ʻI Maʻasi 2023, naʻe fakanofo ia ko ha tokotaha-tokoni ki he Kōmiti Ngāué. ʻI he vakai atu ki hono ngaahi vāhenga-ngāué, ʻokú ne pehē: “ʻI he fehangahangai mo e ngaahi vāhenga-ngāue foʻoú, te ke ongoʻi lōmekina ʻi he taimi ʻe niʻihi. Ka ko e taimi ia ʻoku fiemaʻu ke ke manatuʻi ke falala kia Sihova koeʻuhí ko ia ʻa e tokotaha ʻokú ne fakatupunga ia ke hokó.”

Ko Tokoua Rumph naʻe fanauʻi ʻi Kalefōnia, ʻAmelika. ʻI heʻene kei siʻí, naʻe ʻikai longomoʻui ʻene faʻeé ka naʻá ne feinga ke akoʻi kiate ia ʻa e moʻoni Fakatohitapú. Pehē foki, ʻi he taʻu taki taha naʻá ne ʻeva ki heʻene kui fefiné, ko ha Fakamoʻoni faitōnunga. Naʻe tokoniʻi ia ʻe heʻene kuí ke langaʻi ʻene mahuʻingaʻia ʻi he moʻoní, pea ʻi heʻene taʻu 13, naʻá ne loto ke ako Tohi Tapu. ʻI Sepitema 27, 1992, ʻi heʻene kei taʻu hongofulu tupú, naʻá ne papitaiso. Ko e meʻa fakafiefiá, naʻe toe longomoʻui ʻene faʻeé pea ko e kotoa hono fāmilí naʻe kamata ke nau fakalakalaka pea papitaiso.

ʻI heʻene tupu haké, naʻe sio ʻa Tokoua Rumph ki he fiefia ʻa e kau tāimuʻá. Ko ia ʻi heʻene ʻosi mei he kolisí, naʻá ne kamata tāimuʻa ʻi Sepitema 1995. ʻI he 2000, naʻá ne hiki ki ʻEkuatoa ke ngāue ʻi he feituʻu naʻe lahi ange ai ʻa e fiemaʻú. Naʻá ne fetaulaki ai mo Inga, ko ha tuofefine tāimuʻa mei Kānata, pea naʻe faai atu pē ʻo na mali. Hili ʻena malí naʻá na ngāue ʻi ha kiʻi kolo ʻi ʻEkuatoa mo ha kiʻi kulupu ʻo e kau malanga tokosiʻi. ʻI he ʻahó ni kuo hoko ia ko ha fakatahaʻanga lakalakaimonū.

Faai atu ʻa e taimí, naʻe fakanofo ʻa Tokoua mo Tuofefine Rumph ko e ongo tāimuʻa makehe pea ki mui ai ki he ngāue fakasēketí. ʻI he 2011 naʻe fakaafeʻi kinaua ki he kalasi hono 132 ʻo Kiliatí. Hili ʻa e maʻu tohi fakamoʻoni akó, naʻá na ngāue ʻi he ngaahi feituʻu kehekehe he māmaní pea fiefia ʻi he ngaahi tafaʻaki kehekehe ʻo e ngāué, hangē ko e ngāue ʻi Pēteli, ngāue fakamisinale mo e ngāue fakasēketi. Naʻe toe maʻu ʻe Tokoua Rumph ʻa e monū ke faiako ʻi he Ako Maʻá e Kau ʻEvangeliō ʻo e Puleʻangá.

Koeʻuhi ko e mahaki fakaʻauha COVID-19, naʻe foki ʻa Tokoua mo Tuofefine Rumph ki ʻAmelika. Naʻe fakaafeʻi kinaua ki he Pēteli ʻi Wallkill, ʻa ia naʻe akoʻi ai ʻa Tokoua Rumph ʻi he Potungāue Ngāué. Faai atu pē, naʻe toe vaheʻi kinaua ki he vaʻa ʻi ʻEkuatoá, naʻe ngāue ai ʻa Tokoua Rumph ʻi he Kōmiti Vaʻá. ʻI he 2023 naʻá na hiki ki Warwick. ʻI Sanuali 2024, naʻe fakanofo ʻa Tokoua Rumph ke ngāue ko ha tokotaha-tokoni ki he Kōmiti Ngāué. ʻI he fakakaukauloto atu ki he feituʻu kuó ne ngāue aí, ʻokú ne pehē, “Ko e meʻa ʻokú ne ʻai ha vāhenga-ngāue ke makehé ʻoku ʻikai ʻaupito ko e feituʻú ka ko e kakai ʻokú ke ngāue fakataha mo iá.”

ʻOku tau houngaʻia ʻi he ngāue mālohi ʻa e ongo tokoua ko ení, pea ʻoku tau “hanganaki fakamahuʻingaʻi ʻa e kau tangata peheé.”—Fil. 2:29.