Naʻa Nau Houngaʻia ʻi Heʻene Ngaahi Tohí
Ko Brooke ko e taha ia ʻo e Kau Fakamoʻoni ʻa Sihová ʻoku nofo ʻi ʻAmelika. Lolotonga ʻa e mahaki fakaʻauha COVID-19, naʻá ne malanga fakafou ʻi he faitohí. Ko hono moʻoní, naʻe fai ʻe Brooke ʻa e ngaahi tohi lahi ʻi he uike taki taha. Neongo ia, hili ha taʻu ʻe taha mo e konga, naʻá ne ongoʻi loto-siʻi. ʻI he aʻu mai ki he taimi ko iá, ko e toko taha pē naʻá ne tali lelei ʻene tohí—pea naá ne pehē kiate ia heʻikai ʻaupito te ne faitohi ki ai. Naʻe veiveiua ʻa Brooke pe naʻe ʻaonga koā ʻene ngaahi feingá.
Kae kehe, ʻi he faai atu ʻa e taimí, ko Kim, ko ha kaungā-Fakamoʻoni ʻoku ngāue ʻi ha pangikē, naʻá ne tala ange kia Brooke ʻene fetalanoaʻaki mo ha kasitomaá. Naʻe talanoa ʻa e kasitomaá kia Kim ʻo fekauʻaki mo ha tohi naʻe hiki tohinima mei he taha ʻo e Kau Fakamoʻoni ʻa Sihová. Ko hono moʻoní, naʻá ne ʻuhinga ki he taha ʻo e ngaahi tohi ʻa Brooke! ʻI he uike hokó naʻe toe foki ʻa e kasitomaá ki he pangikeé. Lolotonga ʻene talanoa mo Kim, naʻá ne ʻeke ange pē ʻe lava ke ne maʻu ʻetau ngaahi fakataha ʻa e fakatahaʻangá, ʻa ia naʻe fakahoko ʻi he taimi ko iá ʻo fakafou ʻi he tā vitioó.
ʻI ha taimi nounou ki mui ai, ko David, ko ha Fakamoʻoni ʻe taha, naʻá ne talanoa ange kia Brooke ʻo fekauʻaki mo ha kaungāngāue naʻá ne maʻu ha taha ʻo ʻene ngaahi tohí. Naʻe maongo loloto ki he kaungāngāue ko ení hono hiki tohinima ʻa e tohí. Naʻá ne pehē: “ʻOku totonu ke fakahāhā ʻe he kakai tokolahi ange ʻa e faʻahinga mahuʻingaʻia fakafoʻituitui ko eni ʻi he niʻihi kehé.” Naʻe ngāueʻaki ʻe David ʻa e faingamālie ko ení ke ne fakahoko ai ha faifakamoʻoni lahi ange pea ke ʻoange ha tohi ki hono kaungāngāué, ʻa ia naʻe tali loto-houngaʻia ia ʻe he tangatá.
ʻOku ʻiloʻi ʻe he Kau Fakamoʻoni ʻa Sihová ʻe ʻikai nai ke nau fakatokangaʻi maʻu pē ʻa e taimi ʻoku tō ai ha tenga ʻi heʻenau ngāue fakafaifekaú. (Tangata Malanga 11:5, 6) Ka neongo ia, ko e hokosia ʻa Brooke naʻá ne tokoniʻi ia ke ne houngaʻia lahi ange ʻiate ia ʻi heʻene kau ʻi he ngāue fakafaifekau faka-Kalisitiané.—1 Kolinitō 3:6.