Mole ʻa e Falala ʻa e Kakaí ki he Kau Politikí​—Ko e Hā ʻa e Lau ʻa e Tohi Tapú?

ʻI he 2024 ʻe hoko ʻa e fili kanititeiti ko ha meʻa ʻe failahia takatakai ʻi he māmaní. Neongo ia, ʻoku mole ʻa e falala ʻa e kakai tokolahi ki he kau politikí.

• ʻOku pehē ʻe he tokolahi taha ʻo e faʻahinga naʻe fai ki ai ʻa e savea ʻi ʻAmeliká, “ko e fakaueʻiloto ʻa e kau politiki tokolahi ʻoku makatuʻunga ia ʻi he ngaahi ʻuhinga siokita” kae ʻikai makatuʻunga ʻi heʻenau loto ke ngāue maʻá e kakaí.a​—Pew Research Center, Sepitema 19, 2023.

Naʻa mo e faʻahinga kei siʻí ʻoku nau ongoʻi ʻoku mole ʻenau falala ki he kau politikí.

• “ʻOku loto ʻa e toʻutupu tokolahi ke nau fakaleleiʻi ʻa e ngaahi ʻīsiu mahuʻinga ʻoku hokó, ka ʻi he ngaahi saveá ʻoku nau pehē ai ko e kau politikí ʻoku ʻikai haʻanau fakaleleiʻanga ki he ngaahi meʻá.”​—The New York Times, Sanuali 29, 2024.

• “Fakatatau ki ha savea ʻe taha, ko e faʻahinga kei siʻí ʻoku nau falala lahi ange kinautolu ia ki he kau YouTuber ʻi he kau politikí.”​—The Korea Times, Sanuali 22, 2024.

ʻE lava ke tau falala ki he kau politikí ki ha kahaʻu lelei ange? Ko hai ʻe lava ke tau falala ki aí?

Tokanga ki he faʻahinga ʻokú ke falala ki aí

ʻOku lelei ki he kakaí ke nau tokanga ki he faʻahinga ʻoku nau falala ki aí. ʻOku pehē ʻi he Tohi Tapú “ko e tokotaha taʻefakapotopotó ʻokú ne tui ki he lea kotoa pē, ka ko e tokotaha fakapotopotó ʻokú ne fakakaukauʻi ʻene laka taki taha.”​—Palōveepi 14:15.

• Ki ha fokotuʻu ʻaonga fekauʻaki mo e founga ke sivisiviʻi ai ʻa e pōpoaki ʻokú ke maʻú, lau ʻa e kupu “Maluʻi Koe mei he Fakamatala Halá.”

ʻIkai ko ia pē, naʻa mo e kau politiki ʻoku faitotonu mo fai ʻa e ngaahi meʻá ʻi he ʻuhinga leleí ʻoku fakangatangata pē ʻa e meʻa ʻoku lava ke nau faí. Ko e ʻuhinga ia ʻoku fakatokanga mai ai ʻa e Tohi Tapú:

• “ʻOua naʻa tuku hoʻomou falalá ʻi he kau taki fakaetangatá; ʻoku ʻikai lava ʻe ha tangata ke ne fakahaofi koe.”​—Saame 146:3, Good News Translation.

Ko ha taki ʻe lava ke ke falala ki ai

ʻOku fakamatalaʻi ʻe he Tohi Tapú kuo fakanofo ʻe he ʻOtuá ha taki lavameʻa mo falalaʻanga: Ko Sīsū Kalaisi. (Luke 1:32, 33) Ko Sīsū ʻa e Tuʻi ʻo e Puleʻanga ʻo e ʻOtuá, ko ha founga-pule ʻoku pule mei hēvani.​—Mātiu 6:10.

• Ako ki he ʻuhinga ʻoku lava ke ke falala ai kia Sīsuú pea mo e meʻa te ne fai ke fakaleleiʻi ai ʻa e ngaahi palopalema ʻoku tau fehangahangai mo iá. Lau ʻa e kupu “Ko Hai ʻa e Tuʻi ʻo e Puleʻanga ʻo e ʻOtuá?” mo e “Ko e Hā ʻE Fakahoko ʻe he Puleʻanga ʻo e ʻOtuá?”