ʻE Ngata ʻAfē ʻa e Taú?​—Ko e Hā ʻa e Lau ʻa e Tohi Tapú?

“Ko e taimi eni ke fakaleleiʻi pea fakasiʻisiʻi ʻa e tuʻunga ko ení. Ko e taimi eni ke fakahāhā ai ʻa e mapuleʻi-kitá,” ko e lau ia ʻa António Guterres ko e Sekelitali Seniale ʻa e Ngaahi Puleʻanga Fakatahatahá ʻi hono ʻohofi fakahangatonu ʻe ʻIulani ʻa ʻIsileli ʻi he ʻaho Tokonaki ʻo ʻEpeleli 13, 2024.

Ko e tau ʻi he Hahake Lotolotó ko e fakatātā pē ia ʻe taha ʻo e meʻa ʻoku hoko takatakai ʻi he māmaní.

“ʻI he taimí ni, ʻoku fakautuutu ke toe lahi ange ʻa e fepaki fakamālohi ʻoku hokó talu mei he Tau II ʻa māmaní, pea ko e kakai ʻe 2 piliona ʻa ia ko e toko taha ʻi he toko fā kotoa pē ʻoku uesia.”​—Kōsilio Maluʻi ʻa e Puleʻanga Fakatahatahá, Sanuali 26, 2023.

Ko e ngaahi feituʻu naʻe kau ki he ngaahi fepaki fakamālohí ʻoku kau ki ai ʻa ʻIsileli, Kesa, Sīlia, ʻAsapaisani, ʻIukalaine, Sutani, ʻItiopea, Naisa, Mienimā, mo Haiti.a

ʻE ngata ʻafē ʻa e taú? ʻE lava ke ʻomai ʻe he kau taki ʻo e māmaní ʻa e melinó? Ko e hā ʻa e meʻa ʻoku leaʻaki ʻe he Tohi Tapú?

Tau ʻa e māmaní

Ko e ngaahi fepaki ʻoku hoko ʻi māmani lahi he ʻaho ní ko ha fakaʻilonga ia ʻoku vavé ni ke ngata ʻa e tau kotoa pē. Ko e ngaahi tau ko ení ʻoku fakahoko ai ʻa e kikite Fakatohitapu fekauʻaki mo e vahaʻa taimi ʻoku tau moʻui aí. ʻOku ui ia ʻe he Tohi Tapú ko e “fakaʻosiʻosi ʻo e fokotuʻutuʻu lolotongá.”​—Mātiu 24:3.

• “Te mou fanongo ʻi he ngaahi tau pea mo e ongoongo ʻo e ngaahi tau. . . . ʻE tuʻu ʻa e fonua ki he fonua mo e puleʻanga ki he puleʻanga.”​—Mātiu 24:6, 7.

Lau ʻa e kupu “Ko e Hā ʻa e Fakaʻilonga ʻo e ‘Ngaahi ʻAho Fakaʻosí’ pe ‘Taimi Fakamui’?” ke sio ki he founga hono fakahoko ʻa e kikite Fakatohitapú ʻe he ngaahi tau ʻi he ʻaho ní.

Ko ha tau te ne fakangata ʻa e tau kotoa pē

ʻOku tomuʻa tala ʻe he Tohi Tapú ʻa e ngataʻanga ki he ngaahi fepaki ʻa e faʻahinga ʻa e tangatá. ʻE anga-fēfē hono fakahoko ení? ʻE ʻikai fakahoko eni ʻi he ngaahi feinga ʻa e tangatá ka ʻe fakafou ia ʻi ʻĀmaketone, ko e “tau ʻo e ʻaho lahi ʻo e ʻOtua Māfimafi-Aoniú.” (Fakahā 16:14, 16) ʻI he hili ʻa e tau ko ení, ʻe fakahoko ʻe he ʻOtuá ʻa ʻene talaʻofa ki he faʻahinga ʻo e tangatá ʻa ia te nau fiefia ʻi he melino tuʻuloa.​—Saame 37:10, 11, 29.

Ke ako lahi ange fekauʻaki mo e tau ʻa e ʻOtuá ki hono fakangata ʻa e tau kotoa pē, lau ʻa e kupu “Ko e Hā ʻa e Tau ʻo ʻĀmaketoné?”