Melino ʻi he Māmaní—Ko e Hā ʻOku Mātuʻaki Faingataʻa Ai ke Maʻú?
Tali ʻa e Tohi Tapú
Ko e ngaahi feinga ʻa e tangatá ke ʻomai ʻa e melino ki he māmaní kuo taʻelavameʻa pea ʻe hokohoko atu ʻene taʻelavameʻá ʻi ha ngaahi ʻuhinga:
“ʻOku ʻikai ʻi he tangata ʻoku ʻaʻevá ke ne tataki ʻa ʻene laká.” (Selemaia 10:23) Naʻe ʻikai fakatupu ʻa e faʻahinga ʻo e tangatá fakataha mo e malava pe ko e totonu ke nau pule pē kiate kinautolu, ko ia heʻikai malava ke nau maʻu ha melino tuʻuloa.
“ʻOua naʻa tuku hoʻomou falalá ʻi he kau taki fakaetangatá; heʻikai lava ke fakahaofi kimoutolu ʻe ha tangata. ʻI heʻenau maté, ʻoku nau foki ki he efú; ʻi he ʻaho ko iá ʻoku ngata ai ʻa ʻenau palani kotoa pē.” (Saame 146:3, 4, Good News Translation) Ko e kau taki fakapuleʻangá, naʻa mo e faʻahinga ʻoku nau maʻu ʻa e ngaahi taumuʻa lelei tahá, heʻikai lava ke nau faʻu ha fakaleleiʻanga tuʻuloa ki he ngaahi tupuʻanga tefito ʻo e taú.
“ʻI he ngaahi ʻaho fakaʻosí ʻe ʻi heni ai ʻa e ngaahi taimi fakalilifu ʻa ia ʻe faingataʻa ke fekuki mo ia. He ko e tangatá te nau . . . anga-kakaha, ʻikai ʻofa ki he leleí, kau lavaki, taʻefieauna, fakafuofuolahi ʻi he hīkisia.” (2 Tīmote 3:1–4) ʻOku tau moʻui ʻi he ‘ngaahi ʻaho fakaʻosi’ ʻo e māmani fulikivanu lolotongá, ko ha taimi ʻa ia ʻoku ʻai ai ke faingataʻa hono maʻu ʻa e melinó ʻi he ngaahi fakakaukau ʻoku hoko lahí.
“ʻOiauē ʻa e māmaní pea mo e tahí, koeʻuhi kuo ʻalu hifo ʻa e Tēvoló kiate kimoua, ʻokú ne ʻita lahi, ʻi heʻene ʻiloʻi ʻoku toe siʻi pē hono taimí.” (Fakahā 12:12) Ko e Tēvoló, ʻa e fili ʻo e ʻOtuá, kuo tuku maʻu ʻi he māmaní pea ʻokú ne fakaʻaiʻai ʻa e kakaí ke nau ohi ʻa hono laumālie fulikivanú. Lolotonga ʻene hoko ko e “pule ʻo e māmani ko ení,” heʻikai ʻaupito lava ke tau moʻui ʻi he melino.—Sione 12:31.
“[Ko e Puleʻanga ʻo e ʻOtuá] te ne laiki mo fakaʻauha ʻa e ngaahi puleʻanga kotoa ko ení [ʻoku fakafepaki ki he ʻOtuá], pea ʻe tuʻu toko taha pē ia ʻo taʻengata.” (Taniela 2:44) Ko e Puleʻanga ʻo e ʻOtuá, ʻo ʻikai ko ha founga-pule fakaetangata, te ne fakatōliʻa ʻetau holi ki ha melino tuʻuloa ʻi he māmaní.—Saame 145:16.