ʻOku Anga-Fēfē Fakafeangai ʻa e Kau Fakamoʻoni ʻa Sihová ki he Niʻihi Naʻa Nau Kau ki Muʻa ʻi Heʻenau Lotú?

ʻOku mau fai homau lelei tahá ke fakafeangai ki he tokotaha kotoa ʻi he ʻofa, anga-lelei mo e fakaʻapaʻapa. Kapau kuo hōloa pe tuku ʻe ha taha ʻo e Kau Fakamoʻoni ʻa Sihová ʻene lotú, ʻoku mau feinga ke fakapapauʻi ange kiate ia ʻoku mau ʻofa ʻiate ia pea feinga ke tokoniʻi ia ke tafunaki ʻene mahuʻingaʻia fakalaumālié.​—Luke 15:4-7.

ʻI he ngaahi tuʻunga ʻe niʻihi, ʻe fai nai ʻe ha taha ha meʻa ʻe iku ai ki hono fakamavaheʻi ia mei he fakatahaʻangá. (1 Kolinitō 5:13) Kae kehe, koeʻuhí ʻoku mau ʻofa lahi ʻi homau kaungātuí, ʻoku mau fai ha feinga ki muʻa ke tokoniʻi ʻa e tokotaha ko iá koeʻuhí ke ʻoua ʻe fakamavaheʻi ia. Pea neongo kapau ʻe fakamavaheʻi ia, ʻoku mau kei fakahāhā pē kiate ia ʻa e ʻofa mo e fakaʻapaʻapa, ʻo hangē ko ia ʻoku fakalototoʻaʻi kimautolu ʻe he Tohi Tapú ke mau faí.​—Maʻake 12:31; 1 Pita 2:17.

Ko e hā ʻa e ʻuhinga ʻoku fakamavaheʻi ai ha taha mei he fakatahaʻangá?

ʻOku fakahaaʻi mahino ʻe he Tohi Tapú kapau ʻe fakahoko ʻe ha Kalisitiane ha angahala mamafa pea fakafisi ke liliu, ko e tokotaha ko iá ʻoku totonu ke fakamavaheʻi mei he fakatahaʻangá.a (1 Kolinitō 5:11-13) ʻOku fakahaaʻi māʻalaʻala mai ʻe he Tohi Tapú ʻa e ngaahi angahala ʻoku fuʻu mafatukitukí ʻa ia ʻe ala taki atu ai ha taha ke fakamavaheʻi. Hangē nai ko ení, ʻoku lisi ai ʻa e ngaahi tōʻonga hangē ko e tono, faʻa konaá, fakapō, ngaohikovia ha taha ʻi he fāmilí mo e kaihaʻá.​—1 Kolinitō 6:9, 10; Kalētia 5:19-21; 1 Tīmote 1:9, 10.

Kae kehe, ʻoku ʻikai ke mau fakamavaheʻi ʻi he taimi pē ko iá mei he fakatahaʻangá ha taha kuó ne fakahoko ha angahala mamafa. Ko e kau mātuʻab ʻi he fakatahaʻangá te nau ʻuluaki feinga ki he tokotahá ke liliu ʻene tōʻongá. (Loma 2:4) Te nau feinga ʻi he anga-malū, anga-fakaalaala pea ʻi he anga-lelei ke aʻu ki hono lotó. (Kalētia 6:1) ʻI he founga ko ení ʻe ueʻi nai ai ʻa e tokotaha faihalá ke ne lāuʻilo ki heʻene ngaahi fehālaakí pea fakatomala. (2 Tīmote 2:24-26) Neongo ʻenau toutou feinga ke tokoniʻi iá ka ʻokú ne kei maumauʻi pē ʻa e ngaahi lao fakaeʻulungaanga ʻa e Tohi Tapú pea ʻikai ke fakatomalá, ko e tokotaha ko iá kuo pau ke fakamavaheʻi ia mei he fakatahaʻangá. ʻE fakahoko leva ʻe he kau mātuʻá ha fanongonongo ki he fakatahaʻangá ko e tokotaha ko iá ʻoku ʻikai ke ne kei hoko ko ha taha ʻo e Kau Fakamoʻoni ʻa Sihová.

Ko e hā hono lelei ʻa hono fakamavaheʻi ha taha ʻoku kei hokohoko atu pē ʻi heʻene faiangahalá? Ko e meʻa ʻe taha, ʻoku pouaki ai ʻe he fakatahaʻangá ʻa e tuʻunga ʻa e ʻOtuá ki he maʻa fakaeʻulungāngá pea maluʻi ʻa e fakatahaʻangá mei he tākiekina kovi ʻa e tokotaha faihalá. (1 Kolinitō 5:6; 15:33; 1 Pita 1:16) Tānaki atu ki aí, ʻe ueʻi nai ʻa e tokotaha faihalá ke ne siʻaki ʻene tōʻonga angahalaʻiá pea feinga ke liliu.​—Hepelū 12:11.

ʻOku anga-fēfē fakafeangai ʻa e Kau Fakamoʻoni ʻa Sihová ki he niʻihi kuo fakamavaheʻi mei he fakatahaʻangá?

ʻOku pehē ʻe he Tohi Tapú ko e kau Kalisitiané ʻoku totonu ke ‘tuku ʻenau kei feohi’ mo ha taha kuo fakamavaheʻi mei he fakatahaʻangá, “ʻo aʻu ʻo ʻoua ʻe kai mo ha tangata pehē.” (1 Kolinitō 5:11) Ko ia ʻoku ʻikai ke mau feohi mo ha taha kuo fakamavaheʻi. Kae kehe, ʻoku ʻikai ke mau tukunoaʻi fakaʻaufuli ia. ʻOku mau fakafeangai kiate ia ʻi he fakaʻapaʻapa. ʻOku talitali lelei ia ki heʻemau ngaahi fakataha fakalotú, ʻa ia ʻe lava nai ke lea fakafeʻiloaki ki ai ʻa e Kau Fakamoʻoni ʻa Sihová.c Te ne lava foki ʻo kole ki ha tokoni fakalaumālie mei he kau mātuʻá.

Kae fēfē kapau ko e tokotahá ʻoku fakamavaheʻi mei he fakatahaʻangá ka ko hono hoá mo e fānaú ʻoku nau kei hoko pē ko e Kau Fakamoʻoni ʻa Sihova? Neongo ʻoku ʻikai ke ne toe lotu fakataha mo hono fāmilí kia Sihova, ka ʻokú ne kei hoko pē ko e mēmipa ʻo hono fāmilí. Koeʻuhí ʻoku nau nofo ʻi ha fale pē taha, ko hono vahaʻangatae mo hono hoá mo ʻene fānaú ʻoku kei hoko atu pē pea ʻoku totonu ke nau fefakafeangaiʻaki ʻi he ʻofa.

Ko ha tokotaha kuo fakamavaheʻi ʻe lava ke ne kole ha ʻaʻahi mei he kau mātuʻá, ʻa ia te nau tokonaki ha faleʻi anga-ʻofa mei he Tohi Tapú pea kōlenga loto-māfana ke ne fakatomala pea foki ki he ʻOtuá. (Sākalaia 1:3) Kapau te ne taʻofi ʻene ʻalunga halá pea fakahāhā ʻa e holi loto-moʻoni ke moʻui ʻo fakatatau ki he tuʻunga fakaeʻulungaanga Fakatohitapú, ʻe talitali lelei ia ke toe hoko ko ha konga ʻo e fakatahaʻangá. Ko e fakatahaʻangá levá te nau “anga-lelei ʻo fakamolemoleʻi mo fakafiemālieʻi ia,” ‘o hangē pē ko ia ko e kau Kalisitiane ʻi Kolinitō ʻi he tafoki ha tokotaha faihala mei hono ʻalunga ki muʻá.​—2 Kolinitō 2:6-8.

Ko e hā ʻa e ongoʻi ʻa e faʻahinga naʻe fakamavaheʻi ki muʻá?

Fakatokangaʻi ʻa e fakamatala ʻo e niʻihi ʻo e Kau Fakamoʻoni ʻa Sihová ʻa ia naʻe fakamavaheʻi mei he fakatahaʻangá pea ki mui ai naʻa nau fili ke foki ki he ʻOtuá.

“ʻI heʻeku fili ke toe foki ki he fakatahaʻangá, naʻá ku fakakaukau ko e kau mātuʻá naʻa nau loto ke ʻiloʻi ʻa e meʻa kotoa pē naʻá ku fai ʻi he ngaahi taʻu lahi naʻe fakamavaheʻi ai aú. ʻI hono kehé, naʻa nau pehē mai pē ‘Tokangataha pē ki he meʻa ʻe lava ke ke fai he taimí ni.’ Hili ia, naʻá ku ongo fiemālie.”​—Maria, ʻAmelika.

“Naʻe fiefia lahi ʻa e fakatahaʻangá ʻi heʻeku toe foki maí. Naʻá ku ongoʻi naʻe ʻi ai hoku mahuʻinga. Naʻe tokoniʻi au ʻe hoku fanga tokoua fakalaumālié ke u ongoʻi ʻa e fakamolemole ʻa Sihová pea tokangataha ki he kahaʻú. Naʻe ʻi ai maʻu pē ʻa e kau mātuʻá ke tokoniʻi au ke maʻu ha vahaʻangatae lelei mo Sihova. Naʻa nau fakafiemālieʻi mo tokoniʻi au ke maʻu ʻa e vakai ʻoku kei fakamahuʻingaʻi mo ʻofaʻi au ʻe Sihova.”​—Malcom, Siela Leone.

“ʻOku ou fiefia ʻi he sio ki he ʻofa ʻa Sihova ʻi hono kakaí ʻi heʻene tauhi ke maʻa ʻene kautahá. Neongo ko e kakaí te nau maʻuhala nai ki hono fakamavaheʻi ha taha faihala, ka ko e meʻa mahuʻinga ia mo anga-ʻofa ke fai. ʻOku ou houngaʻia he ko ʻetau Tamai fakahēvaní ko ha ʻOtua anga-ʻofa mo faʻa fakamolemole.”​—Sandi, ʻAmelika.