ʻOku Totonu ke Tukuakiʻi ʻa e ʻOtuá ki Heʻetau Faingataʻaʻiá?

Tali ʻa e Tohi Tapú

Ko e tali papau ʻa e Tohi Tapú ko e ʻikai! Ko e faingataʻá naʻe ʻikai ko ha konga ia ʻo e taumuʻa ʻa Sihova ko e ʻOtuá ki he faʻahinga ʻo e tangatá. Kae kehe, naʻe angatuʻu ʻa e ʻuluaki ongo mātuʻa fakaetangatá ki he pule ʻa e ʻOtuá, ʻo na fili ke fokotuʻu ʻena tuʻunga pē ʻanaua ki he leleí mo e koví. Naʻá na tafoki mei he ʻOtuá peá na faingataʻaʻia ʻi hono ngaahi nunuʻá.

ʻI he ʻahó ni ʻoku tau hokosia ai ʻa e ngaahi nunuʻa ʻo ʻena fili koví. Ka naʻe ʻikai ʻaupito ke tupu mei he ʻOtuá ʻa e faingataʻaʻia ʻa e tangatá.

ʻOku pehē ʻe he Tohi Tapú: “ʻI he tofanga ʻi he ʻahiʻahí, tuku ke ʻoua naʻa pehē ʻe ha taha: ‘Kuo ʻahiʻahiʻi au ʻe he ʻOtuá.’ He ʻoku ʻikai malava ke ʻahiʻahiʻi ʻa e ʻOtuá ʻaki ʻa e ngaahi meʻa ʻoku koví, pea ʻoku ʻikai te ne ʻahiʻahiʻi ʻaki ia ha taha.” (Sēmisi 1:13) ʻOku lava ke faingataʻaʻia ha taha pē—naʻa mo e faʻahinga ʻoku hōifua ki ai ʻa e ʻOtuá.