Ko e Hā ʻOku Lahi Fau Ai ʻa e Faingataʻaʻiá?

KO E ngaahi mēmipa ʻo e haʻa faifekaú ʻoku nau taukaveʻi ʻoku nau ʻilo ʻa e tali ki he fehuʻi ʻoku ʻomai he toʻohemá ʻoku nau faʻa akoʻi ko e faingataʻaʻiá ko e tautea ia mei he ʻOtuá. Ko e fakatātaá, ʻi ha ngaahi ʻaho hili e mofuike ʻi Haití, naʻe tala ai ʻe ha pātele he kolomuʻá ki heʻene fakatahaʻangá ko e fakatamakí ko ha pōpoaki ia mei he ʻOtuá. ʻOku ʻikai loko fakamatematē ʻa e niʻihi. Ko ha palōfesa fakalotu ʻAmelika ʻokú ne pehē ko e kakai tokolahi ʻoku hā ngali ʻoku nau vakai ki ai ʻo peheni: “Ko e ʻuhinga ʻoku fakatupunga ai ʻe he ʻOtuá ʻa e ngaahi fakatamaki peheé ko ha misiteli ia ʻoku ʻikai ʻatautolu ke fehuʻia. Ko ʻetau ngāué pē taha ke tui.”

ʻOku “fakatupunga” moʻoni ʻe he ʻOtuá ʻa e faingataʻaʻia ʻa e tangatá? ʻOku tali ʻikai mālohi ki ai ʻa e Tohi Tapú! Ko e faingataʻaʻiá naʻe ʻikai ko e konga ia ʻo e taumuʻa ʻa e ʻOtua ko Sihová ki he tangatá. Kae kehe, ko e ʻuluaki ongo meʻa fakaetangatá naʻá na angatuʻu ki he pule ʻa e ʻOtuá, ʻo fili ke fokotuʻu ʻena tuʻunga pē ʻanaua ki he leleí mo e koví. Naʻá na sītuʻa mei he ʻOtuá pea faingataʻaʻia ʻi hono nunuʻá. ʻI he ʻahó ni ʻoku tau hokosia ai ʻa e nunuʻa ʻo ʻena fili koví. Ka naʻe ʻikai ʻaupito fakatupunga ʻe he ʻOtuá ia ʻa e faingataʻaʻia ʻa e tangatá. ʻOku pehē ʻe he Tohi Tapú: “ʻI he tofanga ʻi he ʻahiʻahí, tuku ke ʻoua naʻa pehē ʻe ha taha: ‘Kuo ʻahiʻahiʻi au ʻe he ʻOtuá.’ He ʻoku ʻikai malava ke ʻahiʻahiʻi ʻa e ʻOtuá ʻaki ʻa e ngaahi meʻa ʻoku koví pea ʻoku ʻikai te ne ʻahiʻahiʻi ʻaki ia ha taha.” (Sēmisi 1:13) Ko e faingataʻaʻiá ʻoku lava ke ne uesia ha taha pē​—naʻa mo e faʻahinga ʻoku hōifua ki ai ʻa e ʻOtuá. Fakakaukau ki he ngaahi fakatātā ko ení:

● Ko e palōfita ko ʻIlaisá naʻe ʻi ai hono mahaki fakatupu mate.​—2 Tuʻi 13:14.

● Ko e ʻapositolo ko Paulá naʻá ne tohi ʻo pehē naʻe hokohoko ʻene “fiekaiá mo e fieinuá pea mo e masiva kofú pea mo hono ngaohikoviá pea mo e ʻikai ha ʻapí.”—1 Kolinitō 4:11.

● Ko e Kalisitiane ko ʻEpafalotaitó naʻá ne puke pea “loto-mafasia.”—Filipai 2:​25, 26.

ʻOku ʻikai ha feituʻu te tau lau ai ko e kau tangata ko eni ʻe toko tolú naʻe tauteaʻi kinautolu ʻe he ʻOtuá ʻi heʻenau angahalá. Neongo ia, ʻoku fai ʻe he Tohi Tapú ʻa e meʻa lahi ange ʻi hono fakahaaʻi pē ʻa e tokotaha ʻoku ʻikai tupu mei ai ʻa e faingataʻaʻiá. ʻOku toe fakahaaʻi ai ʻa e ʻuhinga tefito ʻe tolu ʻoku faʻa tupu mei ai ʻa e faingataʻaʻiá.

Fili Fakafoʻituitui

“Ko e hā pē ha meʻa ʻoku tō ʻe ha taha, ko e meʻa ia te ne utú foki.” (Kalētia 6:7) Ko e moʻoni, ko ha tokotaha ʻoku fili ke ifi, fakaʻuli taʻetokanga, pe tolovekaʻaki ʻene paʻanga hū maí kuo pau ke ne fua ha faingataʻaʻia pē ʻe tupu nai mei heʻene ngaahi filí.

Te tau toe faingataʻaʻia nai koeʻuhi ko e ngaahi fili siokita ʻa ha taha kehe. Ko e moʻoni, kuo fakahoko ʻe he tangatá ʻa e ngaahi kovi fakalotohohaʻa lahi tahá, mei he fakamamahi ʻa e kau Nasí ki hono pāʻusiʻi ʻa e fānaú. ʻI hono ngāuehalaʻaki ʻa e tauʻatāina ke filí, ʻoku fai ai ʻe he niʻihi ʻa e ngaahi fili ʻoku faingataʻaʻia ai ʻa e niʻihi kehé.

Ngaahi Meʻa Naʻe Hokonoa

ʻI he ʻuluaki senituli T.S., naʻe holo ai ha fuʻu taua ʻi Selusalema, ʻo mate ai e kakai ʻe toko 18. ʻI he lave ki he kau maʻukovia ʻi he meʻa ko eni naʻe hokó, naʻe pehē ʻe Sīsū: “ʻOku mou fakakaukau naʻa nau halaia lahi ange ʻi ha toe taha kehe pē ʻa ia naʻe nofo ʻi Selusalema? ʻIkai ʻaupito!” (Luke 13:​4, 5, The New American Bible) Naʻe ʻiloʻi ʻe Sīsū ko e kau maʻukoviá naʻe ʻikai tautea kinautolu ʻe he ʻOtuá. Naʻá ne ʻiloʻi naʻe fakahaaʻi ki muʻa ange ʻe he Folofola ʻa e ʻOtuá: “ʻOku hokonoa ki he faʻahinga kotoa pe ʻa e faingamalie mo e tuʻutamaki.” (Koheleti 9:​11) ʻOku hoko ʻa e meʻa fakamamahi lahi koeʻuhi ko e ʻi ha feituʻu hala ʻi he taimi hala ʻa e tokotaha maʻukoviá pe koeʻuhí ko ha fehālaaki fakaetangata. Ko e fakatātaá, ʻoku fakahaaʻi ʻi he līpōtí ʻoku lahi ʻaupito ange ʻa e faingataʻaʻiá ʻi he taimi ʻoku tukunoaʻi ai ʻe he kakaí ʻa e fakatokangá pea ʻi he ʻikai fai e langá ke ne matuʻuaki e kovi ʻa e ʻeá pe ko e mofuiké. ʻI he tuʻunga peheé, ko e ngaahi meʻa ʻoku hokonoá ʻokú ne uesia ʻa e kakai tokolahi ange pea fakatupunga ai ʻa e faingataʻaʻia lahi ange.

“Ko e Pule ʻo e Māmani ko Ení”

ʻOku fakahaaʻi ʻe he Tohi Tapú: “Ko e māmaní kotoa ʻoku tokoto ia ʻi he mafai ʻo e tokotaha fulikivanú.” (Sione 12:31; 1 Sione 5:​19) Ko e ‘tokotaha fulikivanu’ ko iá ʻa Sētane ko e Tēvoló, ko ha meʻamoʻui laumālie mālohi ia. ʻOku ui ia ʻe he Tohi Tapú ko e “tokotaha pule ʻo e mafai ʻoku ʻi he ʻeá, ʻa e laumālie ko ia ʻoku ngāue he taimí ni ʻi he ngaahi foha ʻo e talangataʻá.” ʻOku ʻuhinga ení ʻokú ne maʻu ʻa e mafai ke puleʻi ʻa e (anga ʻo e) fakakaukau ʻa e tokolahi taha ʻo e kakai ʻi he māmaní, pea ʻokú ne tākiekina kinautolu ke nau talangataʻa ki he ʻOtuá.—ʻEfesō 2:2.

Kae kehe, ʻoku ʻuhinga ení ʻoku ʻikai tokanga mai ʻa e ʻOtuá ia ki heʻetau faingataʻaʻiá? ʻE lava ke ne—te ne—fai ha meʻa ke fakangata ia?