Naʻe Fakatupu ʻe he ʻOtuá ʻa e Tēvoló?

Tali ʻa e Tohi Tapú

ʻOku fakahaaʻi ʻe he Tohi Tapú naʻe ʻikai ke fakatupu ʻe he ʻOtuá ʻa e Tēvoló. ʻI hono kehé, naʻá Ne fakatupu ʻa e tokotaha naʻe hoko ko e Tēvoló. ʻI he fekauʻaki mo e ʻOtuá, ʻoku pehē ʻe he Tohi Tapú: “Ko e Makatuʻu, ʻoku haohaoa ʻa ʻene ngāué, he ko e fakamaau totonu ʻa ʻene founga fulipē. Ko ha ʻOtua faitōnunga ʻoku ʻikai ʻaupito taʻefaitotonu; ko iá ʻoku māʻoniʻoni mo anga-tonu.” (Teutalōnome 32:3-5) Mei he fakamatala ko iá, ʻoku lava ke tau fakamulitukuʻaki ai ko Sētane ko e Tēvoló naʻá ne haohaoa mo māʻoniʻoni ʻi ha taimi, ʻa ia, ko e taha ia ʻo e ngaahi foha fakaeʻāngelo ʻo e ʻOtuá.

ʻI he Sione 8:44, naʻe pehē ai ʻe Sīsū ko e Tēvoló “naʻe ʻikai te ne tuʻu maʻu ʻi he moʻoní,” ʻo fakahuʻunga ai naʻe moʻoni mo taʻemele ʻa Sētane ʻi ha taimi.

Kae kehe, ʻi he hangē ko e toenga ʻo e ngaahi meʻamoʻui ʻatamaiʻia ʻa Sihová, ko e ʻāngelo naʻe hoko ko Sētané naʻá ne maʻu ʻa e tauʻatāina ke ne fili ʻa e tonú mo e halá. ʻI heʻene fili ha ʻalunga fakafepaki ki he ʻOtuá peá ne fakaʻaiʻai ʻa e ʻuluaki ongo mātuʻa fakaetangatá ke na kau mo iá, naʻá ne ʻai ai ia ke ne hoko ko Sētane, ʻa ia ʻoku ʻuhingá ko e “Tokotaha Fakafepaki.”—Sēnesi 3:1-5; Fakahā 12:9.