Ko e Hā ʻOku Hoko ʻi he Taimi ʻOkú Ke Mate Aí?
Tali ʻa e Tohi Tapú
ʻOku pehē ʻe he Tohi Tapú: “Ko e kau moʻuí ʻoku nau ʻiloʻi te nau mate, ka ko e kau maté ʻoku ʻikai te nau ʻiloʻi ha momoʻi meʻa.” (Tangata Malanga 9:5; Saame 146:4) Ko ia ai, ʻi he taimi ʻoku tau mate aí, ʻoku ngata ʻa ʻetau ʻi aí. ʻOku ʻikai lava ke fakakaukau, ngāue, pe ongoʻi ha meʻa ʻe he maté.
“Ko e efu te ke foki ki aí”
Naʻe fakamatalaʻi ʻe he ʻOtuá ʻa e meʻa ʻoku hoko ʻi he taimi ʻoku tau mate aí ʻi heʻene lea ki he ʻuluaki tangatá, ʻa ʻĀtama. Koeʻuhi naʻe talangataʻa ʻa ʻĀtama, naʻe folofola ʻa e ʻOtuá kiate ia: “Ko e efu koe pea ko e efu te ke foki ki aí.” (Sēnesi 3:19) Ki muʻa ke fakatupu ʻe he ʻOtuá ʻa ʻĀtama “mei he efu ʻo e kelekelé,” naʻe ʻikai ke ʻi ai ha ʻĀtama. (Sēnesi 2:7) ʻI he founga meimei tatau, ʻi he taimi naʻe mate ai ʻa ʻĀtamá, naʻá ne toe foki ki he efú pea naʻe ngata ʻa ʻene ʻi aí.
ʻOku hoko ʻa e meʻa tatau ki he faʻahinga ʻoku nau mate he taimi ní. ʻI he lau ʻo fekauʻaki mo e tangatá mo e fanga manú, ʻoku pehē ʻe he Tohi Tapú: “Ko ʻenau haʻu kotoa pē mei he efú, pea ʻoku nau foki kotoa pē ki he efú.”—Tangata Malanga 3:19, 20.
Ko e maté ʻoku ʻikai ʻaupito ko e ngataʻanga ia ʻo e meʻa kotoa pē
ʻOku faʻa fakahoa ʻe he Tohi Tapú ʻa e maté ki he mohe. (Saame 13:3; Sione 11:11-14; Ngāue 7:60) Ko ha tokotaha ʻoku mohe maʻu ʻoku ʻikai te ne ʻiloʻi ʻa e meʻa ʻoku hoko takatakai ʻiate iá. ʻI he founga meimei tatau, ʻoku ʻikai ke ʻiloʻi ʻe he maté ha meʻa. Neongo ia, ʻoku akoʻi ʻe he Tohi Tapú ko e ʻOtuá ʻoku lava ke ne fafangu ʻa e kau maté ʻo hangē naʻa nau mohé pea toe ʻoange kiate kinautolu ʻa e moʻuí. (Siope 14:13-15) Ki he faʻahinga ʻe fokotuʻu hake ʻe he ʻOtuá, ko e maté ʻoku ʻikai ko e ngataʻanga ia ʻo e meʻa kotoa pē.