Kuo Liliu ʻe he Kau Fakamoʻoni ʻa Sihová ʻa e Tohi Tapú ke Fehoanaki mo ʻEnau Ngaahi Tuí?
ʻIkai, ʻoku ʻikai ke mau pehē. ʻI hono kehé, ʻi he taimi kuo mau ʻiloʻi ai naʻe ʻikai fehoanaki kakato ʻemau tuí mo e Tohi Tapú, kuo mau liliu ʻemau tuí.
Ki muʻa fuoloa ke kamata faʻu ʻa e New World Translation of the Holy Scriptures ʻi he 1950, naʻa mau sivisiviʻi ʻa e Tohi Tapú. Naʻa mau ngāueʻaki ʻa e liliu pē naʻe ala maʻú pea faʻu ʻemau tuí ʻo fakatatau ki ai. Fakakaukau ki ha ngaahi fakatātā ʻe niʻihi ʻo e tui fuoloa ʻa e Kau Fakamoʻoni ʻa Sihová, pea sio angé pe ʻoku nau fehoanaki mo e meʻa ʻoku akoʻi moʻoni ʻe he Tohi Tapú.
Meʻa ʻoku mau tui ki aí: Ko e ʻOtuá ʻoku ʻikai ko ha Tolu-Tahaʻi-ʻOtua. Naʻe pehē ʻi he ʻīsiu ʻo Siulai 1882 ʻo e Zion’s Watch Tower: “ʻOku lāuʻilo ʻemau kau lautohí neongo ʻoku mau tui kia Sihova mo Sīsū mo e Laumālie māʻoniʻoní, ʻoku mau talitekeʻi ʻoku taʻefakatohitapu fakaʻaufuli, ʻa e akonaki ko ia ko e ʻOtua ʻe tolu ʻi he toko taha pe hangē ko e lau ʻa e niʻihi, ko e ʻOtua ʻe taha ʻi he toko tolu.”
Lau ʻa e Tohi Tapú: “Ko Sihova ko hotau ʻOtua ko e tahaʻi Sihova ia.” (Teutalōnome 6:4, Paaki Foʻou) “Ka ʻoku ʻi ai ʻa e ʻOtua ʻe taha, ko e Tamaí, ʻa ia ʻoku ʻaʻana ʻa e meʻa kotoa, pea mo kitautolu; pea taha ʻa e ʻEiki ko Sīsū Kalaisí, ʻa ia ʻoku ʻaʻana ʻa e meʻa kotoa pē mo kitautolu.” (1 Kolinitō 8:6, American Bible Union Version) Naʻe pehē ʻe Sīsū tonu: “Ko e Tamaí ʻoku lahi ange ia ʻiate au.”—Sione 14:28, Douay-Rheims Version.
Meʻa ʻoku mau tui ki aí: ʻOku ʻikai ha fakamamahi taʻengata ʻi ha afi ko heli. ʻI he toʻo lea mei he Loma 6:23 ʻi he Paaki Motuʻa, naʻe fakakaveinga ʻe he Zion’s Watch Tower ʻa ʻene ʻīsiu ʻo Sune 1882 “Ko e Totongi ʻo e Angahalá ko e Mate,” ʻo pehē: “He māʻalaʻala mo faingofua ē ko e fakamatala ko ení. He ngalikehe ē ko e pehē ʻe he fuʻu tokolahi ʻoku nau maʻu ʻa e Tohi Tapú ko e Folofola ʻa e ʻOtuá pea kīvoi ʻi hono fakafepakiʻi ʻa e fakamatala lelei ko ení, pea fakapapauʻi ʻenau tuí mo e meʻa ko ia ʻoku akoʻi ʻe he Tohi Tapú ʻo pehē ko e totongi ʻo e angahalá ko e fakamamahiʻi taʻengata.”
Lau ʻa e Tohi Tapú: “Koe laumalie oku agahala e mate ia.” (ʻIsikeli 18:4, 20, Paaki Motuʻa) Ko e tautea fakaʻosi ki he faʻahinga ʻoku fakafepaki ki he ʻOtuá, ʻoku ʻikai ko e fakamamahi taʻengata, ka ko e “fakaauha taegata.”—2 Tesalonaika 1:9, Paaki Motuʻa.
Meʻa ʻoku mau tui ki aí: Ko e Puleʻanga ʻo e ʻOtuá ko ha puleʻanga moʻoni, ʻikai ko ha tuʻunga pē ʻo e lotó. ʻI he fekauʻaki mo e Puleʻanga ʻo e ʻOtuá, naʻe pehē ʻi he ʻīsiu ʻo e Zion’s Watch Tower ʻo Tīsema 1881: “Ko hono moʻoní, ko e fokotuʻu ʻo e puleʻanga ko ení, ʻoku kau ai ʻa hono toʻo ʻa e ngaahi puleʻanga kotoa ʻo e māmaní.”
Lau ʻa e Tohi Tapú: “I he gaahi aho oe gaahi tuʻi ni e fokotuʻu e he Otua oe lagi, ha buleaga, aia e ikai auha o lauikuoga: bea e ikai tuku ae buleaga ki ha kakai kehe, ka te ne laiki mo fakaauha ae gaahi buleaga ni kotoabe, bea e tuu mau ia o taegata.”—Taniela 2:44, Paaki Motuʻa.
ʻOku fakafalala ʻa e Kau Fakamoʻoni ʻa Sihová ki he New World Translation ke poupouʻi ʻenau ngaahi tuí?
ʻIkai, he ʻoku mau hokohoko atu ke ngāueʻaki ʻa e ngaahi liliu Tohi Tapu lahi ʻi heʻemau ngāue faifakamoʻoní. Ko e moʻoni, neongo ʻoku mau ʻoatu taʻetotongi ha tatau ʻo e New World Translation ko e konga ia ʻemau polokalama ako Tohi Tapu taʻetotongí, ʻoku mau toe fiefia ke ako mo e faʻahinga ʻoku nau saiʻia ke ngāueʻaki ha ngaahi liliu kehe.