Ko ha Angahala ʻa e Pelepaʻangá?

Tali ʻa e Tohi Tapú

Neongo ʻoku ʻikai ke lāulea fakaikiiki ʻa e Tohi Tapú ki he pelepaʻangá, ʻoku lava ke tau ʻiloʻi mei he ngaahi tefitoʻi moʻoni Fakatohitapú ʻoku vakai ʻa e ʻOtuá ki he pelepaʻangá ko ha angahala.​​—ʻEfesō 5:​17.a

• Ko e pelepaʻangá ʻoku ueʻi ia ʻe he mānumanú, ʻa ia ʻoku fehiʻa ai ʻa e ʻOtuá. (1 Kolinitō 6:​9, 10; ʻEfesō 5:​3, 5) Ko e kau pelepaʻangá ʻoku nau fakaʻamu ke maʻu ha paʻanga fakafou ʻi he mole ʻa e niʻihi kehé, ka ʻoku fakahalaiaʻi ʻe he Tohi Tapú ʻa e mānumanu ki he koloa ʻa e kakai kehé.​​—ʻEkisoto 20:17; Loma 7:7; 13:​9, 10.

• Ko e pelepaʻangá, naʻa mo e faiʻaki ha kiʻi paʻanga siʻisiʻí, ʻe lava ke ne langaʻi ha ʻofa ki he paʻangá pea ʻoku fakatupu maumau ia.​​—1 Tīmote 6:​9, 10.

• ʻOku faʻa fakafalala ʻa e kau pelepaʻangá ki he tui fakafaʻahikehé pe monuú. Kae kehe, ʻoku vakai ʻa e ʻOtuá ki he tui peheé ko ha tauhi ʻaitoli, ʻa ia ʻoku ʻikai ke fehoanaki ia mo e lotu kiate iá.​​—ʻAisea 65:11.

• ʻI he ʻikai ke pouaki ha holi ke maʻu taʻetotongi pē ha meʻá, ʻoku fakaʻaiʻai ʻe he Tohi Tapú ʻa e ngāue mālohí. (Tangata Malanga 2:​24; ʻEfesō 4:​28) Ko e faʻahinga ʻoku nau muimui ki he faleʻi ʻa e Tohi Tapú ʻe lava ke nau “kai ʻa e meʻakai ʻoku nau ngāueʻi ʻe kinautolu tonu.”​​—2 Tesalonaika 3:​10, 12.

• ʻE lava ke langaʻi ʻe he pelepaʻangá ha laumālie ʻikai lelei ʻo e feʻauʻauhí, ʻa ia ʻoku ʻikai tali ʻi he Tohi Tapú.​​—Kalētia 5:​26.