ʻOku Anga-Fēfē ʻEku Hoko ko e Taha ʻo e Kau Fakamoʻoni ʻa Sihová?

Ko e ngaahi sitepu ke hoko ai ko e taha ʻo e Kau Fakamoʻoni ʻa Sihová ʻoku fakamatalaʻi ia ʻe Sīsū pea ʻe lava ke maʻu ia ʻi he Mātiu 28:19, 20. ʻOku ʻomai ʻi he ngaahi veesi ko iá ʻa e meʻa ʻe fiemaʻu ki ha taha ke ne fai ke hoko ai ko ha ākonga ʻa Kalaisi, ʻa ia ʻoku kau ki ai ʻa e lea, pe faifakamoʻoni fekauʻaki mo Sihova.

Sitepu 1: Ako ki he meʻa ʻoku akoʻi ʻe he Tohi Tapú. Naʻe fakahinohino ʻe Sīsū hono kau muimuí ke “ngaohi ko e kau ākonga . . . , akoʻi kinautolu.” (Mātiu 28:19, 20) Ko e foʻi lea naʻe liliu ko e “ākonga” ʻoku ʻuhinga fakafoʻilea ia “ki ha tokotaha ako.” Ko e Tohi Tapú, tautefito ki he ngaahi akonaki ʻa Sīsū Kalaisi ʻoku maʻu aí, ʻoku ʻi ai ʻa e fakamatala ʻokú ke fiemaʻú koeʻuhí ke ke maʻu ha moʻui fiefia mo mohu ʻuhinga. (2 Tīmote 3:​16, 17) ʻOku mau fiefia ke tokoniʻi koe ke ke ako ki he meʻa ʻoku akoʻi ʻe he Tohi Tapú fakafou ʻi heʻemau polokalama ako Tohi Tapu taʻetotongí.​—Mātiu 10:​7, 8; 1 Tesalonaika 2:​13.

Sitepu 2: Ngāueʻaki ʻa e meʻa ʻokú ke akó. Naʻe pehē ʻe Sīsū ko e faʻahinga ʻoku nau akó kuo pau ke nau toe “tauhi ʻa e ngaahi meʻa kotoa pē [naʻá ne] fekau atu.” (Mātiu 28:20) ʻOku ʻuhinga ení ko hoʻo ako ʻa e Tohi Tapú kuo pau ke mahulu hake ia ʻi he ʻilo pē ki aí​—ʻe fiemaʻu ke ke fai ha liliu lahi ʻi hoʻo fakakaukaú mo e tōʻongá. (Ngāue 10:42; ʻEfesō 4:​22-​29; Hepelū 10:24, 25) Ko e faʻahinga ʻoku nau tauhi ʻa e ngaahi fekau ʻa Sīsuú ʻoku ueʻi kinautolu ke fai ha fili fakafoʻituitui ke muimui kiate ia ʻaki hono fakatapui ʻenau moʻuí kia Sihova ko e ʻOtuá.​—Mātiu 16:24.

Sitepu 3: Papitaiso. (Mātiu 28:19) ʻI he Tohi Tapú, ʻoku fakahoa ʻa e papitaisó ki hano tanu. (Fakafehoanaki mo e Loma 6:​2-4.) ʻOku hoko ia ko ha fakaʻilonga ʻo e mate ki ha ʻalunga moʻui ʻi he kuohilí pea kamata ha ʻalunga foʻou. Ko ia, ko hoʻo papitaisó, ko ha talaki fakahāhā ia kuó ke lavaʻi ʻa e ongo ʻuluaki sitepu naʻe fakamatalaʻi ʻe Sīsuú pea kole ki he ʻOtuá ki ha konisēnisi maʻa.​—Hepelū 9:​14; 1 Pita 3:​21.

Te u ʻilo fēfē kuó u mateuteu ke papitaiso?

Lea ki he kau mātuʻa ʻi he fakatahaʻangá. Te nau talanoa mo koe ke fakapapauʻi ʻokú ke mahinoʻi ʻa e meʻa ʻoku kaunga ki aí, ʻokú ke ngāueʻaki ʻa e meʻa kuó ke akó, pea kuó ke fakatapui loto-lelei ki he ʻOtuá.​—Ngāue 20:28; 1 Pita 5:​1-3.

ʻOku ngāueʻaki ʻa e ngaahi sitepu ko ení ki he fānau ʻa e ongo mātuʻa Fakamoʻoní?

ʻIo. ʻOku mau ʻohake ʻemau fānaú “ʻi he akonaki mo e enginaki ʻa Sihová,” ʻo hangē ko e fekau ʻa e Tohi Tapú. (ʻEfesō 6:4) Kae kehe, ʻi heʻenau tupu haké, kuo pau ke nau fai ha fili fakafoʻituitui ke ako, tali, pea ngāueʻaki ʻa e meʻa ʻoku akoʻi ʻe he Tohi Tapú ki muʻa ke nau taau ki he papitaisó. (Loma 12:2) Ko e moʻoni, kuo pau ke fai ʻe he tokotaha taki taha ʻene fili pē ʻaʻana fekauʻaki mo e lotú.​—Loma 14:12; Kalētia 6:5.