ʻOku ʻi he Feituʻu Kotoa Pē ʻa e ʻOtuá?
Tali ʻa e Tohi Tapú
ʻOku malava ʻa e ʻOtuá ke sio ki he meʻa kotoa pē pea ngāue ʻi ha feituʻu pē ʻokú ne fili. (Palōveepi 15:3; Hepelū 4:13) Neongo ia, ʻoku ʻikai ke akoʻi ʻi he Tohi Tapú ko e ʻOtuá ʻoku ʻi he feituʻu kotoa pē, ʻi he meʻa kotoa pē. ʻI hono kehé, ʻoku fakahaaʻi ai ko ha tokotaha ia pea ʻokú ne ʻafio ʻi ha ʻafioʻanga.
Sino ʻo e ʻOtuá: Ko e ʻOtuá ko ha tokotaha laumālie. (Sione 4:24) ʻOkú ne taʻehāmai ki he faʻahinga ʻo e tangatá. (Sione 1:18) Ko e ngaahi vīsone fekauʻaki mo e ʻOtuá ʻi he Tohi Tapú ʻoku fakahaaʻi maʻu pē ai ʻokú ne ʻi ha feituʻu pau. ʻOku ʻikai ʻaupito ke fakahaaʻi ʻokú ne ʻi he feituʻu kotoa pē.—ʻAisea 6:1, 2; Fakahā 4:2, 3, 8.
ʻAfioʻanga ʻo e ʻOtuá: Ko e ʻOtuá ʻokú ne ʻafio ʻi he nofoʻanga laumālié, ʻa ia ʻoku kehe mei he meʻa fakatupu he māmaní. ʻI he nofoʻanga ko iá, ʻoku ʻi ai ʻa e “ʻafioʻangá ʻi he langí” ʻo e ʻOtuá. (1 Tuʻi 8:30) ʻOku lave ʻa e Tohi Tapú ki ha taimi naʻe hū atu ai ʻa e ngaahi meʻa fakatupu laumālié “ke nau tuʻu ʻi he ʻao ʻo Sihová,”a ʻoku fakahaaʻi ai ʻi ha ʻuhinga, ʻoku ʻafio ʻa e ʻOtuá ʻi ha feituʻu pau.—Siope 1:6.
Kapau ʻoku ʻikai ke ʻi he feituʻu kotoa pē ʻa e ʻOtuá, ʻe lava moʻoni ke ne tokanga fakafoʻituitui mai kiate au?
ʻIo. Ko e ʻOtuá ʻokú ne tokanga lahi ʻaupito ki he faʻahinga tāutahá. Neongo ʻokú ne ʻafio ʻi he nofoʻanga laumālié, ʻoku fakatokangaʻi ʻe he ʻOtuá ʻa e faʻahinga ʻi he māmaní ʻoku kumi loto-moʻoni ke fakahōifuaʻi iá, pea ʻokú ne tokoniʻi kinautolu. (1 Tuʻi 8:39; 2 Kalonikali 16:9) Fakakaukau ki he anga hono fakahāhā ʻe Sihova ʻene tokanga ki he kau lotu loto-moʻoní:
ʻI he taimi ʻokú ke lotu aí: ʻOku lava ke fanongo atu ʻa Sihova ki hoʻo lotú naʻa mo e mōmeniti pē ʻokú ke leaʻaki ai iá.—2 Kalonikali 18:31.
ʻI hoʻo loto-mafasiá: “ʻOku ofi ʻa Sihova ki he loto-laveá; ʻokú ne fakahaofi ʻa e faʻahinga ʻoku laumālie mafesí.”—Saame 34:18.
ʻI hoʻo fiemaʻu ha tatakí: Ko Sihova te ne “ʻoatu kiate koe ʻa e fakamaama pea fakahinohino koe” fakafou ʻi heʻene Folofolá, ʻa e Tohi Tapú.—Saame 32:8.
Maʻuhala fekauʻaki mo e ʻi he feituʻu kotoa pē ʻa e ʻOtuá
Maʻuhala: Ko e ʻOtuá ʻoku ʻi he feituʻu kotoa pē ʻi he fakatupú.
Moʻoni: ʻOku ʻikai ke ʻafio ʻa e ʻOtuá ʻi he māmaní pe ʻi ha toe feituʻu pē ʻi he ʻuniveesi fakamatelié. (1 Tuʻi 8:27) Ko e moʻoni ko e ngaahi fetuʻú mo e ngaahi ngāue fakaefakatupu kehé ʻoku nau fakahā “ʻa e lāngilangi ʻo e ʻOtuá.” (Saame 19:1) Kae kehe, ʻoku ʻikai ke ʻafio ʻa e ʻOtuá ʻi heʻene fakatupú ʻo hangē pē ko e ʻikai ke pehē ha tokotaha ʻaati ʻi heʻene tā valivalí. Neongo ia, ʻoku lava ke tala mai ʻe he tā valivalí ha meʻa fekauʻaki mo e tokotaha naʻá ne tā iá. ʻI he tuʻunga meimei tatau, ko e māmaní ʻokú ne tala mai ʻa e “ngaahi anga ʻoku taʻehāmaí” ʻo e Tokotaha-Fakatupú, hangē ko hono mālohí, potó mo e ʻofá.—Loma 1:20.
Maʻuhala: Kuo pau ke ʻi he feituʻu kotoa pē ʻa e ʻOtuá koeʻuhi ke ne ʻiloʻi ʻa e meʻa kotoa pē pea ke mālohi fakaʻaufuli.
Moʻoni: Ko e laumālie māʻoniʻoni pe ivi ngāue ʻo e ʻOtuá, ko e ngāue ia ʻo e mālohi ʻo e ʻOtuá. Fakafou ʻi he laumālie māʻoniʻoni ʻo e ʻOtuá, ʻoku lava ke ne ʻiloʻi pea fai ha meʻa pē, ʻi ha faʻahinga feituʻu pē mo ha taimi, ʻo ʻikai ke ne ʻi ai.—Saame 139:7.
Maʻuhala: ʻOku akoʻi ʻi he Saame 139:8 ko e ʻOtuá ʻokú ne ʻi he feituʻu kotoa pē ʻaki ʻa e pehē: “Kapau te u ʻalu hake ki he langí, te ke ʻi ai, pea kapau te u ngaohi hoku mohengá ʻi he Faʻitoká, vakai, te ke ʻi ai.”
Moʻoni: Ko e konga Tohi Tapu ko ení ʻoku ʻikai ke lave ia ki he feituʻu ʻoku ʻi ai ʻa e ʻOtuá. ʻOku fakamatalaʻi fakapunake mai ai ʻoku ʻikai ha feituʻu ʻe fuʻu mamaʻo fau ki he ʻOtuá ke ne tokoniʻi kitautolu.
a Ko Sihova ʻa e huafa ʻo e ʻOtuá ʻoku fakahaaʻi ʻi he Tohi Tapú.